១. បញ្ឈប់ការជក់បារី និងផឹកស្រា៖ ចំពោះបុរសដែលមានទម្លាប់ជក់បារី និងផឹកស្រាញឹកញាប់ គួរតែឈប់ឱ្យបានយ៉ាងហោចណាស់ ៣ ទៅ ៦ ខែមុនពេលមានគម្រោងយកកូន។ ជាតិអាល់កុល និងសារធាតុខុសប្រក្រតីក្នុងបារីអាចប៉ះពាល់ដល់គុណភាពអង់ប្រ៊ីយ៉ុង និងបង្កហានិភ័យឱ្យកូនកើតមកប្រឈមនឹងជំងឺបេះដូង ឬបញ្ហាសុខភាពផ្សេងៗ។ ការបញ្ឈប់ទម្លាប់ទាំងនេះជួយបន្ថយហានិភ័យ និងបង្កើនឱកាសឱ្យកូនកើតមកមានសុខភាពល្អជាងមុន។

២. ពិនិត្យសុខភាពមុនមានផ្ទៃពោះ៖ ស្រ្តីមុនពេលមានគម្រោងយកកូន ត្រូវតែចូលពិនិត្យសុខភាពទូទៅជាមួយគ្រូពេទ្យជំនាញ។ ការត្រួតពិនិត្យដូចជា៖ ពិនិត្យមាត់ស្បូន ទំហំស្បូន សុដន់ និងធ្វើតេស្តឈាមដើម្បីរកមេរោគថ្លើម B និង C។ ប្រសិនបើរកឃើញជំងឺណាមួយ ត្រូវព្យាបាលឱ្យបានជាមុនសិន ដើម្បីសុវត្ថិភាពទាំងម្ដាយនិងកូន។

៣. ស្ត្រីជាម្ដាយត្រូវញុំាថ្នាំអាស៊ីតហ្វូលីកឱ្យបានរាល់ថ្ងៃ៖ ការញុំាថ្នាំអាស៊ីតហ្វូលីក (Folic Acid) ជារៀងរាល់ថ្ងៃយ៉ាងហោចណាស់ ៣ ខែមុនពេលមានផ្ទៃពោះ គឺមានសារៈសំខាន់ណាស់។ វាជួយឱ្យស្បូនរឹងមាំ មានទំហំសមស្រប ស្របពេលដែលអាចបង្កើនឱកាសឱ្យអំប្រ៊ីយ៉ុងអភិវឌ្ឍន៍បានល្អ។ អ្នកជំនាញប្រៀបធៀបថា ការទទួលយកអាស៊ីតហ្វូលីកប្រៀបដូចជាការសាងសង់ផ្ទះមួយដែលមានគ្រឹះរឹងមាំ សម្រាប់ឱ្យទារកអាចរស់នៅក្នុងពោះបានយ៉ាងសុខស្រួល។

៤. ជៀសវាងការទទួលអាហារបំប៉ន ឬថ្នាំបន្ថែម៖ ទាំងបុរស និងស្រ្តីដែលមានទម្លាប់ញ៉ាំវីតាមីន អាហារបំប៉ន ខូឡាជែន ឬថ្នាំសម្រកជាប្រចាំ គួរបញ្ឈប់ជាបណ្តោះអាសន្នរយៈពេល ៣ ទៅ ៦ខែមុនពេលយកកូន។ ព្រោះថ្នាំ ឬសារធាតុជាច្រើននៅក្នុងផលិតផលបន្ថែមទាំងនេះអាចមានហានិភ័យប៉ះពាល់ដល់សុខភាពកូន និងបង្កបញ្ហាក្នុងការមានផ្ទៃពោះ។

ការមានកូនដែលមានសុខភាពល្អ មិនមែនផ្អែកតែជីវសាស្ត្រទេ ប៉ុន្តែទាមទារឱ្យមានការរៀបចំ និងការយកចិត្តទុកដាក់ពីឪពុកម្តាយទាំងពីរ។ ដូច្នេះ មុនពេលសម្រេចចិត្តយកកូន គូស្វាមីភរិយាគួរទៅពិភាក្សាជាមួយគ្រូពេទ្យជំនាញ ដើម្បីទទួលបានការណែនាំត្រឹមត្រូវ និងធានាថាកូននឹងកើតមកជាមួយនឹងសុខភាពល្អ និងអនាគតដ៏រុងរឿង៕

អត្ថបទដោយ៖ សារួ