ស្បែកស្អាតមិនមែនដោយសារការប្រើប្រាស់ផលិតផលតែមួយមុខទេ តែទម្លាប់តូចៗប្រចាំថ្ងៃរបស់យើងក៏ជាកត្តារួមបញ្ចូលធ្វើឱ្យស្បែករបស់យើងស្អាត មានសុខភាពល្អដូចគ្នា។ តើអ្នកទាំងអស់គ្នាមានឆ្ងល់អត់ថា ហេតុអ្វីមុខរបស់យើងតែងតែឡើងមុនឥតឈប់ ទោះប្រឹងផលិតផលច្រើនហើយនៅតែមិនបានផល ពេលខ្លះប្រើបានផលហើយក៏ឡើងមកវិញ។ ការពិតទៅបញ្ហាទាំងនេះវាអាចបណ្ដាលមកពីទំម្លាប់តូចៗប្រចាំរបស់ថ្ងៃរបស់យើង ដែលយើងភាគច្រើនតែងតែមើលរំលង។ ផ្អែកតាមវេបសាយ phunutoday ខាងក្រោមនេះគឺជាទម្លាប់ប្រចាំថ្ងៃ ៤ ដែលធ្វើឱ្យមុខរបស់យើងឡើងមុនមិនឈប់៖
១. យកដៃប៉ះមុខញឹកញាប់៖ នៅក្នុងមួយថ្ងៃៗដៃរបស់យើងធ្វើការច្រើនណាស់ ហើយក៏មានផ្ទុកនូវបាក់តេរី ភាពកង្វក់ ជាច្រើនដែលយើងមើលមិនដឹង។ ហើយនៅពេលយើងយកដៃមកប៉ះនឹងផ្ទៃមុខ ជាពិសេសស្បែកមុខដែលមានជាតិខ្លាញ់ និងមានរន្ធញើសធំ វាងាយធ្វើឱ្យស្បែកមុខរបស់យើងឡើងមុន និងរាលដាលទៅជាបញ្ហាផ្សេងៗដូចជាការរលាក និងបង្កឱ្យជាស្លាកស្នាមខ្មៅ ជាដើម។ ជំនួសឱ្យការប្រើដៃ អ្នកគួរតែប្រើក្រដាសអនាម័យដើម្បីផ្ដិតយកញើសចេញពីផ្ទៃមុខ និងលាងដៃ ឱ្យបានទៀងទាត់ ដើម្បីកំម្ចាត់បាក់តេរី ភាពកង្វក់ចេញពីដៃ។
២. ការលាងសម្អាតមិនត្រឹមត្រូវ៖ មុខឧស្សាហ៍ឡើងមុនពេលខ្លះអាចបណ្ដាលពីការលាងសម្អាតផ្ទៃមុខមិនបានស្អាតល្អ។ ប្រសិនបើមុខយើងប្រើគ្រឿង Makeup ច្រើនការលាងមុខតែមួយតង់ជាមួយទឹកធម្មតាគឺមិនអាចជួយបានទេ វាត្រូវការលាងមុខពីរតង់ជាមួយសាប៊ូដែលត្រូវតាមប្រភេទស្បែកមុខថែមទៀតទើបទទួលបានប្រសិទ្ធភាព។ ការលាងមុខពីរតង់មិនសម្ដៅថា ត្រូវលាងជាមួយសាប៊ូធម្មតាពីរដងទេ តែសម្ដៅដល់ការសម្អាតមុខដោយប្រើពពួក Cleansing Oil ដែលវាមានសមត្ថភាពសម្អាតគ្រឿង Makeup បានល្អនឹងជួយកម្ចាត់ភាពកខ្វក់យ៉ាងមានប្រសិទ្ធភាព។ ហើយបន្ទាប់មកទើបលាងមុខជាមួយទឹកធម្មតានិងហ្វូម។
៣. រៀបចំរបបអាហារមិនបានត្រឹមត្រូវ៖ អាហារសម្បូរជាតិខ្លាញ់ ចៀន ផ្អែម ឬហឹរ នឹងជំរុញឱ្យក្រពេញ sebaceous ធ្វើការកាន់តែខ្លាំង ធ្វើឱ្យស្បែកកាន់តែមានជាតិខ្លាញ់ ងាយនឹងកើតមុន។ នេះហើយជាកត្តាដែលធ្វើឱ្យស្បែកមានខ្លាញ់ ហើយវាពិតជាពិបាកក្នុងថែទាំណាស់។ ដើម្បីកែលម្អ អ្នកគួរតែផ្តល់អាទិភាពដល់អាហារស្រស់ៗដូចជា បន្លែបៃតង ផ្លែឈើ ញុំាអាហារប្រភេទនេះឱ្យបានច្រើន ផឹកទឹកឱ្យបានគ្រប់គ្រាន់ធ្វើឱ្យស្បែកមានសុខភាពល្អ និងស្រស់ថ្លា។ លើសពីនេះទៀត ការជ្រើសរើសប្រេងបន្លែដែលមានសុខភាពល្អដូចជាប្រេងអូលីវ ឬប្រេងកាណូឡាក៏អាចជួយកាត់បន្ថយហានិភ័យនៃការស្ទះរន្ធញើសផងដែរ។
៤. មិនសម្អាតកន្លែងគេងទៀងទាត់៖ បាក់តេរី ធូលីដី គឺមាននៅគ្រប់ទីកន្លែង សូម្បីតែកន្លែងគេងរបស់យើងក៏មិនអាចជៀសវាងផុត។ ស្រោមខ្នើយ ផួយ កន្សែងជូតមុខគឺសុទ្ធតែជារបស់ដែលប៉ះពាល់ផ្ទៃមុខរបស់យើងរាល់ថ្ងៃ ហើយមនុស្សមួយចំនួនគឺមិនសូវជាចាប់អារម្មណ៍និងយកចិត្តទុកដាក់ទៅលើចំណុចនេះទេ។ ប្រសិនបើអ្នកមិនឧស្សាហ៍សម្អាត ស្រោមខ្នើយ ផួយ កន្សែងជូតមុខ យូរទៅ បាក់តេរី ធូលីដី នឹងកកកុញដែលបណ្តាលឱ្យស្ទះរន្ធញើស ជាពិសេសនៅតំបន់ថ្ពាល់ ចង្កា និងថ្គាម ហើយចាប់ផ្ដើមឡើងមុនជាបន្តបន្ទាប់។ ដើម្បីការពារស្បែករបស់អ្នក អ្នកគួរតែបោកគក់ខ្នើយរបស់អ្នកយ៉ាងហោចណាស់ពីរដងក្នុងមួយសប្តាហ៍ ផ្លាស់ប្តូរកន្សែងជារៀងរាល់ថ្ងៃ ហើយសម្ងួតវាឱ្យបានត្រឹមត្រូវ។ គ្រប់យ៉ាងកើតចេញពីខ្លួនយើង ចាប់ផ្ដើមផ្លាស់ប្ដូរទម្លាប់តូចៗទាំងនេះរបស់អ្នកដើម្បីទទួលបានស្បែកស្អាត សុខភាពរាងកាយល្អ ជីវិតរបស់អ្នកនឹងស្រស់បំព្រង៕
អត្ថបទដោយ៖ សារួ