គីស(Cyst) គឺជាដុំជាលិកាដែលមានលក្ខណៈ រឹង រាវ ខ្ទុះ និងឧស្ម័ន ដែលមានលទ្ធភាពអាចកើតនៅគ្រប់ទីតាំងទាំងអស់នៃរាងកាយ សូម្បីតែខួរក្បាល។ បើទោះជាដុំគីសភាគច្រើនជាគីសស្លូតក៏ពិតមែនប៉ុន្តែបើវាកើតនៅតំបន់ពិសេសដូចជា ខួរក្បាល តម្រងនោម សុដន់...ជាដើម គួរយកចិត្តទុកដាក់ ប្រញាប់ពិនិត្យជាបន្ទាន់ដើម្បីដឹងថាគីសនោះជាគីសកាចឬស្លូត ហើយគួរព្យាបាលឬអត់។

ជាការពិតណាស់ យោងតាមការណែនាំពីគេហទំព័រ medicalnewstoday បានឱ្យដឹងថា ដុំគីសនៅក្នុងខួរក្បាលភាគច្រើនគឺកើតមកពីដំណើត តាមរយៈតំណពូជ ប៉ុន្តែក្នុងនោះមានករណីខ្លះពីកំណើតកើតមកមិនមានដុំគីសទេ ប៉ុន្តែនៅពេលធំពេញវ័យ ដោយសារតែកត្តារស់នៅ កត្តាហូបចុកមិនបានត្រឹមត្រូវគឺបណ្តាលឱ្យឆ្លងមេរោគចូលខួរក្បាលបណ្តាលទៅជាដុំគីស។ ជាទូទៅដុំគីសក្នុងខួរក្បាលមាន៦ប្រភេទផ្សេងគ្នាដូចជា៖ គីស arachnoid គីស pineal គីស colloid គីស dermoid គីស epidermoid គីស neoplastic ។ ក្នុងចំណោមដុំគីសទាំង៦នេះ មានប្រភេទគីសខ្លះកាច គីសខ្លះស្លូត។

ប៉ុន្តែទោះជាយ៉ាងណា អ្នកគួរចំណាំរោគសញ្ញាគីសក្នុងខួរក្បាល បើទោះជាអ្នកកើតគីសកាចឬគីសស្លូតក៏អ្នកត្រូវតែត្រួតពិនិត្យឱ្យបានហ្មត់ចត់ ពីព្រោះខួរក្បាលជាតំបន់សំខាន់ ប្រសិនជាអ្នកមានរោគសញ្ញាខាងក្រោមនេះហើយ មិនគួរនៅព្រងើយកន្តើយនោះទេ៖

·   ឈឺក្បាលញឹកញាប់ ឈឺស្ទើរតែរាល់ថ្ងៃជាពិសេសនៅពេលព្រឹក និងពេលយប់

·   ស្រវាំងភ្នែក ធ្ងន់ត្រចៀក

·   ឧស្សាហ៍វិលមុខ

·   ករណីធ្ងន់ធ្ងរអាចប្រកាច់(នេះជារោគសញ្ញាគីសកាច)

·   រកក្អួតចង្អោរញឹកញាប់(នេះជារោគសញ្ញាគីសកាច)។

គូសបញ្ជាក់ផងដែរថា ជាជម្រើសដ៏ល្អបំផុតអ្នកគួរតាមដាន និងកត់ចំណាំអាការៈខ្លួនឯង ប្រសិនជាមានរោគសញ្ញាដូចដែលបានរៀបរាប់ខាងលើញឹកញាប់ អ្នកគួរតែប្រញាប់ត្រួតពិនិត្យ ឬទៅជួបពិគ្រោះជាមួយគ្រូពេទ្យជំនាញឱ្យបានឆាប់ ដើម្បីការពារក្រែងកើតគីសកាចដោយមិនបានដឹងខ្លួនមុនគឺគ្រោះថ្នាក់ណាស់៕

អត្ថបទដោយ៖ មឿន គន្ធា