ឆ្អឹងគឺជាសរីរាង្គសំខាន់ខ្លាំងបំផុត ក្នុងការទ្រទ្រង់សាច់ដុំផ្សេងៗរាងកាយ កាលណាមានការបាក់ឆ្អឹង អាចបណ្ដាលឱ្យអ្នកជំងឺ មិនអាចដើរបានដូចធម្មតា មានការឈឺចាប់ខ្លាំងបំផុត ប្រសិនណា បាក់ចំឆ្អឹងសំខាន់ ដូចជាឆ្អឹងត្រគាក ភ្លៅជាដើម។ មួយវិញទៀត ប្រសិនណា អ្នកមានជំងឺទឹកនោមផ្អែម លើសឈាម ទៀតនោះ ស្ថានភាពនៃការបាក់ឆ្អឹងកាន់តែធ្ងន់មិនងាងព្យាបាលជា ។ ហើយមូលហេតុនៃការបាក់នេះអាចមកពីឆ្អឹងស្ពោធ កំហាប់ឆ្អឹងទាប បណ្ដាលឱ្យមានការប៉ះទង្គិចតិចតួច អាចនាំឱ្យឆ្អឹងងាយបាក់ឡើងមកបាន។
យោងតាមរយៈការចែករំលែករបស់វេជ្ជបណ្ឌិត លីដា លិ ជាគ្រូពេទ្យឯកទេស ព្យាបាលបាក់បែកឆ្អឹងនៅមន្ទីរពេទ្យ មិត្តភាពកម្ពុជា-ចិន ព្រះកុសុមៈ និងនៅគ្លីនិក ដួង ប៊ុណ្ណ វេជ្ជបណ្ឌិតបានបញ្ចប់ការសិក្សា ផ្នែកបាក់ បែកឆ្អឹងនៅ ប្រទេសបារាំង កាលពីឆ្នាំ២០១៧ ។ វេជ្ជបណ្ឌិតក៏ជាគ្រូពេទ្យស្ម័គ្រចិត្តផ្នែកជំនួយឧបករណ៍ព្យាបាលបាក់បែកឆ្អឹង នៅប្រទេសសហរដ្ឋអាមេរិកផងដែរ ។
លោកវេជ្ជបណ្ឌិតបានប្រាប់ក្រុមការងារចាបបៃតងថា ប្រភេទក្រុមមនុស្សដែល ងាយបាក់ឆ្អឹងខ្លាំងបំផុតនោះ គឺមនុស្សស្រីដែលដល់អាយុអស់រដូវ កាលណាអស់រដូវហើយ ស្ត្រីងាយ ពុកឆ្អឹង ស្ពោធឆ្អឹង ដោយសារកំហាប់ប៉ូតាស្យូមថយចុះ ជាហេតុនាំឱ្យងាយបាក់ឆឹ្អងនៅពេលមានការដួលឡើងមក ដូច្នេះ មនុស្សស្រីៗដែលមានវ័យអស់រដូវ ត្រូវតែប្រយ័ត្ន នៅក្នុងការដើរ ទៅណាមកណា ទាំងក្នុងបន្ទាប់ទឹក បន្ទាប់គេង ឬកន្លែងផ្សេងៗ ព្រោះកាលណាមានការដួលប្រឈមគ្រោះថ្នាក់បាក់ឆ្អឹងលឿន។
មួយវិញទៀត ប្រសិនណាមានជំងឺប្រចាំកាយបន្ថែមទៀតដូចជា ជំងឺទឹកនោមផ្អែម លើសឈាម បេះដូងទៀត ស្ថានភាពកាន់តែធ្ងន់ អាចព្យាបាលមិនងាយជា ប្រសិនណាដួលអាចប្រឈមស្លាប់មួយចំហៀងខ្លួនបាន ដោយសារជំងឺលើសឈាមនៅក្នុងស្ថានភាពនិង ។
ជាការពិតណាស់សម្រាប់បុរសៗ អាចថាមិនងាយប្រឈមនឹងការបាក់ឆ្អឹងខ្លាំង ដូចមនុស្សស្រី តែបុរសៗអាចនឹងបាក់ឆ្អឹងបានដូចគ្នា ប្រសិនណាដល់អាយុច្រើន រាងកាយក៏មិនអាច រឹងមាំដូចនៅក្មេងៗដែរ។ ម្យ៉ាងទៀតក្មេងៗក៏អាចបាក់ឆ្អឹងបានដូចគ្នា អាចដោយសារ ការគ្រោះថ្នាក់ចររាចណ៍ ក៏បណ្ដាលឱ្យបាក់ឆ្អឹង តែលោកវេជ្ជបណ្ឌិតបាន បានសង្កត់ធ្ងន់ថា គេរកឃើញមនុស្សចាស់ងាយបាក់ជាងក្មេងច្រើន។
គូសបញ្ជាក់ឱ្យដឹងផងដែរថា ការបាក់ឆ្អឹងសម្រាប់អ្នកមិនមានជំងឺប្រចាំកាយ អាចនឹងហានិភ័យទាប តែប្រសិនណា មានជំងឺប្រចាំកាយផ្សេងៗអាចគ្រោះថ្នាក់ខ្លាំង សម្រាប់មនុស្សចាស់ ដើម្បីការពារ ការរអិលដួល ផ្សេងៗ លោកវេជ្ជបណ្ឌិតបានណែនាំថា អាចមានជាឧបករណ៍ជំនួយការដើររបស់គាត់ ដើម្បីទប់ស្កាត់ហានិភ័យ ការដួលបាក់ឆ្អឹងឡើងមកបាន ការពារប្រសើរជាងព្យាបាល៕
អត្ថបទដោយ៖ ប៉ែត ធីតា