រូបភាព៖ France24
លោក Joe Biden បានចាក់វ៉ាក់ស៊ាំងកូវីដ១៨ ដូសដំបូងរបស់ Pfizer ហើយ ដើម្បីបង្កើនទំនុកចិត្តសាធារណៈជន និងបន្ថយការព្រួយបារម្ភពីសុវត្ថិភាពវ៉ាក់ស៊ាំង។
ប្រធានាធិបតីអាមេរិកដែលទើបតែជាប់ឆ្នោតថ្មី លោក Joe Biden បានទទួលការចាក់វ៉ាក់ស៊ាំងកូវីដ ១៩ ដូសដំបូងរបស់ Pfizer ដើម្បីជាការបង្ហាញទៅកាន់ប្រជាជនអាមេរិកថាវ៉ាក់ស៊ាំងមានសុវត្ថិភាព នេះបើយោងតាមសេចក្តីរាយការណ៍ពី BBC នាព្រឹកថ្ងៃអង្គារនេះ។
លោកនិយាយថាលោកនឹងចូលរួមជាមួយចំនួនមេដឹកនាំនយោបាយាផ្សេងទៀតឱ្យបានកាន់តែច្រើន ដែលរួមមានអនុប្រធានាធិបតី Mike Pence និងលោក Nancy Pelosi ប្រធានសភាផងដែរ។ គួរបញ្ជាក់ថា កាលពីថ្ងៃអាទិត្យសប្តាហ៍មុននេះ Moderna បានចាប់ផ្តើមចាក់វ៉ាក់ស៊ាំងលើកទី ២ បន្ទាប់ពីត្រូវបានអនុម័តកាលពីមួយសប្តាហ៍មុននេះ ដែលប្រជាជនអាមេរិកជាង ៥ សែននាក់បានចាក់រួចហើយ។
ជាមួយគ្នានេះដែរ សារព័ត៌មាន CNN ក៏បានចុះផ្សាយផងដែរថា លោកអនុប្រធានាធិបតី Pence ក៏បានទទួលការចាក់វ៉ាក់ស៊ាំង ហើយផ្សាយផ្ទាល់តាមទូរទស្សន៍ផងដែរ។ ភរិយារបស់លោក Biden គឺលោកស្រី Jill Biden ក៏បានទៅចាក់វ៉ាក់ស៊ាំងដូសដំបូងនៅថ្ងៃជាមួយគ្នានោះដែរ។ ចំណែកឯមិត្តរួមដំណើររបស់លោក Biden គឺលោក Kamala Harris អនុប្រធានាធិបតីជាប់ឆ្នោតនិងស្វាមីលោកស្រី Doug Emhoff រំពឹងថានឹងទទួលបានការចាក់វ៉ាក់ស៊ាំងដូសដំបូងនៅសប្តាហ៍ក្រោយ។
លោក Biden បានកំណត់គោលដៅថានឹងផ្តល់ការចាក់វ៉ាក់ស៊ាំងឱ្យបានចំនួន ១០០ លាន នៅសហរដ្ឋអាមេរិកក្នុងអំឡុងពេល ១០០ ថ្ងៃដំបូងរបស់រដ្ឋបាលនៅសេតវិមាន។
គិតត្រឹមថ្ងៃច័ន្ទនេះ ក្នុងកំឡុងពេលមានជំងឺរាតត្បាត សហរដ្ឋអាមេរិកបានកត់ត្រាករណីឆ្លងសរុបកើនឡើងដល់ជាង ១៨ លានករណី និងស្លាប់ ៣១៩.០០០ នាក់ នេះបើយោងតាមទិន្នន័យពីសាកលវិទ្យាល័យ Johns Hopkins។
បច្ចុប្បន្ន ប្រធានាធិបតីគឺជាមន្ត្រីម្នាក់ក្នុងចំណោមមន្ត្រីជាន់ខ្ពស់របស់អាមេរិកដែលមិនបានទទួលការចាក់វ៉ាក់ស៊ាំងលើកដំបូងមុនគេ។ លោក Trump បានសរសេរនៅក្នុងសារ Twitter កាលពីថ្ងៃទី ១៣ ធ្នូថា “ខ្ញុំនឹងមិនទាន់ចាក់វ៉ាក់ស៊ាំងនេះទេ រហូតទាល់តែដល់ពេលវេលាសមស្រប”៕
ដោយ ហៃ សុចិន្តា