ប្រព័ន្ធរំលាយអាហារជាផ្នែកសំខាន់បំផុតនៃរាងកាយ ព្រោះវាមាននាទីរំលាយ បឺតស្រូបយកសារធាតុចិញ្ចឹម និងបញ្ចេញចោលនូវកាកសំណល់។ ជារឿងដ៏សោកស្តាយបំផុត មនុស្សជាច្រើនបែរជា ជួបប្រទះនូវបញ្ហាប្រព័ន្ធរំលាយអាហារមិនល្អ បណ្ដាលឱ្យមានការទល់លាមក ហើមពោះ រោគ កើនជាតិអាស៊ីតក្នុងក្រពះ ឈឺក្រពះរ៉ាំរ៉ៃទៅវិញ។ ដើម្បីឱ្យប្រព័ន្ធរំលាយអាហាររបស់អ្នក​ ចៀសផុតពីរោគសញ្ញាធ្វើទុក្ខនិងជំងឺទាំងនេះ ខាងក្រោមនេះជាប្រអាហារដែលងាយរក តម្លៃសមរម្យ ហើយក៏ជួយឱ្យក្រពះ ពោះវៀនរបស់អ្នកមានសុខភាពល្អផងដែរ។

• ផ្លែល្ហុង៖ ផ្លែល្ហុងជាផ្លែឈើ ដែលអាចដាំបានតាមផ្ទះ វាមានរសជាតិឆ្ងាញ់ ផ្ទុកអង់ស៊ីមរំលាយអាហារហៅថា Papain ហើយអង់ស៊ីមនេះក៏អាចជួយកាត់បន្ថយអាការនៃជំងឺរលាកពោះវៀនធំ(IBS) ដូចជាការទល់លាមក និងហើមពោះផងដែរ នេះបើផ្អែកតាមការឱ្យដឹងពីប្រភពHealthline។ មិនតែប៉ុណ្ណោះ Papain ត្រូវបានគេប្រើជាអង់ស៊ីមសំខាន់នៅក្នុងពពួកអាហារបំប៉ន​សម្រាប់ជួយរំលាយអាហារ ហេតុនេះញ៉ាំផ្លូវល្ហុងប្រៀបដូចជាបានញ៉ាំអាហារបំប៉នធម្មជាតិដូច្នេះដែរ។

 • គីមឈី៖ អាហារល្បីរបស់កូរ៉េ ដែលធ្វើចេញពីស្ពៃ ម្សៅអង្ករដំណើប ផ្លែប៉ោម សារី និងគ្រឿងទេសជាច្រើនទៀត។ អាហារប្រពៃណីរបស់កូរ៉េមួយនេះ ត្រូវបានគេដឹងថាមានផ្ទុកប្រូបាយអូទិច ដែលអាចបង្កើនបាក់តេរីល្អនៅក្នុងក្រពះ មានផ្ទុកកាកសរសៃ ជួយជម្រុញដល់ការរំលាយអាហារ និងជួយថែរក្សាសុខភាពក្រពះពោះវៀនបានល្អផងដែរ។ ហេតុនេះហើយ ទើបជនជាតិកូរ៉េ ចូលចិត្តញ៉ាំគីមឈីជាមួយ មី ឬសាច់អាំង ដោយសារអាហារទាំងនោះយូរនិងពិបាករំលាយ ហេតុនេះទទួលទានជាមួយគីមឈី អាចជួយឱ្យវាឆាប់រំលាយលឿន។

• យ៉ាអ៊ួរ៖ យ៉ាអ៊ួរត្រូវបានផលិតឡើងដោយ ទឹកដោះគោដែលត្រូវបាន fermented ដោយបាក់តេរីអាស៊ីតឡាក់ទិក។ វាមានផ្ទុកដោយ ប្រូបាយអូទិច បង្កើនបាក់តេរីល្អ ដែលប្រព័ន្ធរំលាយអាហារត្រូវការ។ ប្រូបាយអូទិច នេះក៏កែលម្អប្រព័ន្ធរំលាយអាហារឱ្យមានសុខភាពល្អឡើងវិញ បំបាត់បញ្ហារាគ មួល ទល់លាមក ការពារក្រពះពីជំងឺ។ ប៉ុន្តែមិនមែនគ្រប់យ៉ាអ៊ួរទាំងអស់សុទ្ធតែមានផ្ទុកប្រូបាយអូទិចនោះទេ ពេលទិញអាចរើសយកប្រភេទយ៉ាអ៊ួរ ដែលមានពាក្យថា (Probiotics ឬ live and active cultures) នៅលើសំបកវិចខ្ចប់។

• គ្រាប់ជី៖ ផ្អែកតាមប្រភពHealthlineដដែល បានឱ្យដឹងថា គ្រាប់ជីជាប្រភពដ៏ល្អនៃជាតិសរសៃ ដែលបណ្តាលឱ្យពួកវាបង្កើតជាសារធាតុដូច gelatin នៅក្នុងក្រពះរបស់អ្នកនៅពេលទទួលទាន។ ពួកវាធ្វើការដូចជា ប្រូបាយទិច(prebiotic) គាំទ្រដល់ការលូតលាស់នៃបាក់តេរីដែលមានសុខភាពល្អនៅក្នុងពោះវៀនរបស់អ្នក ហើយក្នុងនោះរួមចំណែកជួយដល់ការរំលាយអាហារដែលផងដែរ។

• ខ្ញី៖ អាហារសាមញ្ញ មានប្រយោជន៍ច្រើនដល់សុខភាព ហើយក៏អាចយកច្នៃជាម្ហូបអាហារ តែ បង្អែម និងភេសជ្ជៈផ្សេងៗច្រើនមុខទៀតផងដែរ។ វាអាចពន្លឿនការរំលាយអាហារ សម្រួលដល់ការផ្លាស់ទីអាហារពីពោះវៀន ចូលក្នុងក្រពះ។ ទទួលទានខ្ញី អាចជួយកាត់បន្ថយហានិភ័យនៃការក្រហាយទ្រូង ក្អួតចង្អោរ និងឈឺក្រពះបានផងដែរ៕

អត្ថបទដោយ៖ Senghong