សព្វថ្ងៃនេះការជ្រើសអាហារជារឿងពិបាកមួយ។ បើពិសារភេទភេសជ្ជៈកាហ្វេដាក់ស្ករច្រើន សូកូឡា ទឹកក្រូចកូកាកូឡា និងអាហារកែច្នៃជាប្រចាំថ្ងៃ នាំឱ្យអ្នកលើសខ្លាញ់ ថែមទាំងកើតជំងឺមហារីកពេលក្រោយទៀត។ ដើម្បីចៀសវាងជំងឺមហារីក និងធាត់ អ្នកគួរហូបសណ្តែកសៀង។ ព្រោះសណ្តែកសៀងជាប្រភេទបន្លែស្ងួតមានផ្ទុកជាតិប្រេងប្រហែល ២០% ជាតិប្រូតេអ៊ីន ៤០% ដែលមានគុណភាពប្រឆាំងធាត់និងមហារីក។
យោងតាមគេហទំព័រសុខភាព Healthline បានចុះផ្សាយថា សារធាតុ isoflavones សារធាតុ genistein និងសារធាតុ daidzein នៅក្នុងសណ្តែកសៀងមានសមត្ថភាពប្រឆាំងនឹងជំងឺមហារីកបានល្អបំផុត។ សូម្បីអ្នកអាយុវែងនៅតំបន់ខៀវហៅថា “តំបន់អាយុវែងទាំង៥” ក៏មានទម្លាប់ហូបសណ្តែកសៀងជាប្រចាំថ្ងៃដែរធ្វើឱ្យពួកគាត់ភាគច្រើនគ្មានជំងឺមហារីកនិងរាងកាយមិនលលើសគីឡូ។ តាមការសិក្សានៅក្នុងទស្សនាវដ្តី BJU International បានរកឃើញថា សណ្តែកសៀងល្អបំផុតកាត់ខ្លាញ់អាក្រក់ ការពារជំងឺមហារីកក្រពេញប្រូស្តាតចំពោះបុរស។
ជាពិសេសសារធាតុប្រូតេអ៊ីនល្អក្នុងបន្លែសណ្តែកសៀងមានគុណប្រយោជន៍រំលាយខ្លាញ់ក្នុងឈាមបានលឿន។ អ្នកគួរញ៉ាំសណ្តែកសៀងចន្លោះចាប់ពី ១៨ ទៅ២៥ក្រាមក្នុងមួយថ្ងៃដើម្បីពង្រឹងសុខភាពរាងកាយប្រឆាំងជំងឺកាចដូចជាជំងឺមហារីក និងលើសឈាម។ បើតាមលទ្ធផលស្រាវជ្រាវនៅសៀងហៃលើស្ត្រី ៨៣២នាក់មានផ្ទុកកោសិកាមហារីក និង៨៤៦នាក់ទៀតមានសុខភាពល្អ ដែលបានញ៉ាំសណ្តែកសៀងរយៈពេល ៥ឆ្នាំ អ្នកស្រាវជ្រាវបានធ្វើការសន្និដ្ឋានថា សណ្តែកសៀងបានជួយកាត់បន្ថយការលូតលាស់ជំងឺមហារីកស្រទាប់ស្បូនបានល្អជាពិសេសស្ត្រីធាត់ជ្រុល។
អ្នកគូរហូបសណ្តែកសៀងក្នុងការចម្អិនម្ហូប ភេសជ្ជៈទឹកសណ្តែកធ្វើដោយខ្លួនឯង ដែលមានកម្រិតជាតិស្ករសមល្មម និងជម្រើសប្រភេទបង្អែម ឬអាហារណាដែលមានគុណភាពខ្ពស់ បន្ថែមជាមួយនឹងការត្រួតពិនិត្យនៅថ្ងៃខែឆ្នាំផុតកំណត់ឱ្យបានត្រឹមត្រូវ។ ហើយអ្នកគួរបន្ថែមទម្លាប់ធ្វើលំហាត់ប្រាណ និងគេងឱ្យបានគ្រប់គ្រាន់ដើម្បីសម្រកគីឡូ និងការពារជំងឺមហារីក ឱ្យអ្នករស់នៅមានសុខភាពល្អ៕ អត្ថបទដោយ៖ ទ្រ សុភាព