កាហ្វេជាភេសជ្ជៈដ៏ពេញនិយម ដោយសាររសជាតិឆ្ងាញ់ និងអត្ថប្រយោជន៍ដ៏អស្ចារ្យរបស់វា។ ជាការពិត តាមការសិក្សាជាច្រើនបានរកឃើញថា កាហ្វេមានអត្ថប្រយោជន៍ជួយកាត់បន្ថយហានិភ័យជំងឺវង្វេង បង្កើតការរំលាយអាហារ ជួយផ្ដល់ថាមពលដល់រាងកាយ និងការពារជំងឺមហារីក។ ជាមួយគ្នានេះ អ្នកឧកញ៉ាវេជ្ជបណ្ឌិត គួច ម៉េងលី ក៏ធ្លាប់បានលើកឡើងថាកាហ្វេអាចជួយការពារជំងឺបេះដូង មហារីក ទឹកនោមផ្អែម ជំនួយខួរក្បាល ស្មារតីជាដើម។

ដោយឡែក ត្បិតតែកាហ្វេមានផលល្អសម្រាប់សុខភាព ប៉ុន្តែក៏ទាមទារឱ្យទទួលទានត្រូវកាលៈទេសៈផងដែរ។ ប្រសិនបើអ្នកទទួលទានខុសពេលវេលា មិនត្រឹមតែមិនទទួលបានអត្ថប្រយោជន៍ទេ អាចនាំហានិភ័យដល់សុខភាពផងដែរ។ ដូច្នេះហើយពេលវេលាខាងក្រោមទាំង៤នេះ អ្នកមិនគួរទទួលទានកាហ្វេឡើយ៖

១ ពេលព្រឹកពោះទទេ៖ បងប្អូនមួយចំនួនធំ បានយកកាហ្វេធ្វើជាអាហារពេលព្រឹកតែម្ដង ភាគច្រើនជាអ្នករៀននិងអ្នកធ្វើការ រហូតដល់ថ្ងៃទើបទទួលទានអាហារ។ ទម្លាប់បែបនេះ មិនល្អសម្រាប់សុខភាពឡើយ។ ផ្អែកតាមប្រភពTimeofindia បានលើកឡើងថា ផឹកកាហ្វេ ឬតែពេលក្រពះទទេ វាបង្កើនជាតិអាស៊ីតដែលមាននៅក្នុងក្រពះ ដែលអាចបំផ្លាញបំពង់រំលាយអាហារទាំងមូល និងបណ្តាលឱ្យច្រាលអាស៊ីត និងក្រហាយទ្រូង។ នេះអាចធ្វើឱ្យក្រពះងាយនឹងមានបញ្ហា ហើយដើម្បីការពារវា យកល្អគួរតែឈប់ផឹកតែ ឬកាហ្វេពេលពោះទទេ ញ៉ាំអាហារពេលព្រឹកជាមុនសិន។

២ ពេលកាហ្វេក្ដៅខ្លាំងពេក៖ សម្រាប់អ្នកចូលចិត្តផឹកកាហ្វេក្ដៅ (Hot coffee) គួរតែប្រយ័ត្ន។ យោងតាមរបាយការណ៍ថ្មីពីអង្គការសុខភាពពិភពលោកបានឱ្យដឹងថា ការទទួលទានភេសជ្ជៈក្តៅលើសពី ១៤៩ºF អាចបង្កើនហានិភ័យនៃជំងឺមហារីកបំពង់អាហារ។ ប្រសិនបើអ្នកឆុងនៅផ្ទះ ជាធម្មតាអាចមានសីតុណ្ហភាព ១៨៥ºF បើផ្អែកតាមការឱ្យដឹងពីប្រភព prevention ។ ប្រសិនបើបន្ថែមទឹកដោះគោ ឬក្រែមអាចបន្ថយសីតុណ្ហភាពបាន ត្រឹមតែ ៥ដឺក្រេប៉ុណ្ណោះ។ ដំណោះស្រាយល្អបំផុត គឺទុកវាឱ្យត្រជាក់បន្តិចសិន កាហ្វេខ្មៅមួយពែងក្នុងកែវសេរ៉ាមិច ១០oz ជាធម្មតាត្រូវការពេលប្រហែល ៥នាទីដើម្បីឱ្យត្រជាក់ដល់សីតុណ្ហភាព ១៤៩ºF។

៣ ពេលមានបញ្ហាថប់បារម្ភឬគេងមិនលក់៖ អ្នកស្រី Ali Miller អ្នកឯកទេសខាងចំណីអាហារ បាននិយាយថា ជាតិកាហ្វេអ៊ីនមានឥទ្ធិពលរំញោចលើប្រព័ន្ធប្រសាទ ដែលបណ្តាលឱ្យមានការបញ្ចេញអរម៉ូនស្ត្រេសcortisol ប្រសិនបើអ្នកមានបញ្ហាការថប់បារម្ភ បញ្ហាដំណេក ជាពិសេសចំពោះអ្នកដែលមានឆាប់បញ្ហាភ័យស្លន់ស្លោ គួរតែកាត់បន្ថយជាតិកាហ្វេអ៊ីន។ ដើម្បីកាត់បន្ថយឥទ្ធិពលនៃជាតិកាហ្វេអ៊ីន អាចទទួលទានត្រឹម១ឬ២ពែង ប្រមាណ៨oz នៃកាហ្វេក្នុងមួយថ្ងៃ និងជួយឈប់ផឹកកាហ្វេ ៦ម៉ោងមុនពេលចូលគេង ចៀសវាងប៉ះពាល់ដំណេក។

៤ ពេលអ្នកគេងមិនគ្រប់៖ ផឹកកាហ្វេជាដំណោះស្រាយល្អមួយសម្រាប់អ្នកដែលគេងមិនបានគ្រប់គ្រាន់ ពួកគាត់តែងផឹកកាហ្វេជំនួយស្មារតី។ ការស្រាវជ្រាវបានរកឃើញថា កាហ្វេនឹងមិនមានប្រសិទ្ធភាព ឬផ្ដល់អត្ថប្រយោជន៍សម្រាប់សុខភាពឡើយ ប្រសិនបើអ្នកគេងតិចជាង៥ម៉ោងក្នុង១ថ្ងៃ រយៈពេល៣ថ្ងៃជាប់គ្នាឡើយទៅ។ ដោយលើកឡើងថា ការគេងបានតិចវានឹងធ្វើឱ្យថយចុះនូវសមត្ថភាពនៃការយល់ដឹងនៃខួរក្បាល ដែលជាតិកាហ្វេអ៊ីនមិនអាចជួយឱ្យប្រសើរឡើងបានទេ។ ហេតុនេះ ប្រសិនបើអ្នកគេងមិនគ្រប់៧ម៉ោងទេ គួរកាត់បន្ថយកាហ្វេ និងព្យាយាមគេងឱ្យបានគ្រប់ប្រសើរជាង៕

អត្ថបទដោយ៖ Senghong