ស្រីៗពេលរដូវ មានទម្លាប់ថែរក្សាសុខភាពរាងកាយអ្វីខ្លះ អាចប្រាប់បានទេ? ជាការពិតណាស់ មិនថាអ្នកខំថែរក្សាបំប៉នអាហារ គេងឱ្យគ្រប់ ផឹកទឹកឱ្យគ្រប់នៅពេលរដូវថែស្បែកថែខ្លួនកម្រិតណាក៏ដោយ។ ប្រសិនណាអ្នកមិនយកចិត្តទុកដាក់លើរឿង៣យ៉ាងនេះទេ ច្បាស់ជាប្រឈមរោគស្រ្តី ឆ្លងមេរោគចូលទ្វារមាស បង្កជាបញ្ហា រលាករមាស់ចេញមកមិនខាន។
អាស្រ័យហេតុនេះហើយ វិធី៣នេះ ធ្វើអំឡុងពេលស្រីៗមករដូវកុំខាន ចៀសវាងមានផលរំខានដល់ស្បូនប្រឈមជាមួយជំងឺរុំារ៉ៃឡើងមក ដែលជាជំងឺមួយគ្រោះថ្នាក់សម្រាប់មនុស្សស្រីហើយគាត់ មិនប្រាថ្នាចង់ជួបប្រទះនោះឡើយជាពិសេសមនុស្សស្រីដែលមានគ្រួសាររួចហើយ។
ទី១គឺ ការធ្វើអនាម័យ៖ ពេលមករដូវ ស្រីៗតែងប្រើប្រាស់សំឡីអនាម័យដើម្បីទ្រាប់ឈាមរដូវដែលហូរធ្លាក់មក។ ដូច្នេះស្រីៗត្រូវមានចំណេះដឹងពី របៀបប្រើប្រាស់សំឡីឱ្យបានត្រឹមត្រូវ។ មានន័យថាកុំប្រើសំឡីអនាម័យ១រយៈពេលច្រើនម៉ោង ឬក៏ប្រើប្រាស់តែ១ក្នុង១ថ្ងៃដើម្បីចង់សន្សំសំចៃ។ ចង់បញ្ជាក់ថាគ្រោះថ្នាក់ណាស់ការធ្វើបែបនេះ។គឺអាច បណ្ដាលឱ្យងាយឆ្លងមេរោគ កើតរោគផ្សិតក្នុងទ្វារមាស បង្កជាការរលោក រមាស់ ក្រហាយ ឬក៏ប្រឈមចេញជាធ្លាក់សឡើងមកទាំងមិនដឹងខ្លួន។ អាស្រ័យហេតុនេះហើយស្រីៗគួរតែ២ទៅ៣ម៉ោង ឆាប់ប្ដូរសំឡីអនាម័យរបស់អ្នកចេញ ឱ្យសម្អាតទ្វារមាសឱ្យបានត្រឹមត្រូវ។ មួយវិញទៀតក្រៅពីសំឡីអនាម័យ ខោក្នុងក៏ដូចគ្នាគួរតែប្ដូរចេញទាំងព្រម។ សម្រាប់ខោក្នុងទៀតសោតគួរតែកុំស្លៀកខោសើមៗ ឬក៏ស្លៀក បែបរឹបៗជាមួយខ្លួនខ្លាំង ព្រោះអាចរឹបខ្យល់ធ្វើឱ្យខ្យល់ចូលក្នុងរាងកាយមិនបានគ្រប់គ្រង បង្កជាក្លិនមិនល្អឬក៏រលាករុំារ៉ៃ ព្រោះpHមិនល្អ។
ទី២ របបអាហារ៖ មិនថាពេលមករដូវឬក៏មិនមករដូវនោះទេ របបអាហារប្រចាំថ្ងៃរបស់អ្នកត្រូវតែល្អជាពិសេសជ្រើសរើសយកប្រភេទអាហារដែលសម្បូរដោយជាតិសរសៃ មានដូចជាបន្លែផ្លែឈើបៃតង ខាត់ណាខៀវ តាសក់ ការ៉ុត ល្ហុង ស្ពៃក្តោប ផ្លែប៉ោម ផ្លែប័រ ផ្លែចេកជាដើម។ ពពួកបន្លែផ្លែឈើទាំងអស់នេះ ជួយបំពេញជាតិទឹកក្នុងរាងកាយរបស់ស្រីៗពេលមករដូវ ប៉ូវកម្លាំង ការពារការខះជាតិទឹកជាដើម។ មួយវិញទៀតក្រៅពីបន្លែផ្លែឈើ ពពួកប្រូតេអ៊ីន មានសាច់គោ សាច់ត្រី ស៊ុតសាច់មាន់ជាដើមគួរតែញុំាឱ្យបានគ្រប់គ្រងដូចគ្នា។ ដើម្បីជួយស្រូបជាតិដែក ចូលរួមក្នុងការផលិតកោសិកាឈាមក្រហម ដែលល្អសម្រាប់ស្រីៗពេលមករដូវអាចនិងបាត់បង់ជាតិច្រើនដែលធ្វើឱ្យគាត់ឆាប់អស់កម្លាំង ស្លេកស្លាំង ម៉ួម៉ោជាដើម។
ទី៣ ការហាត់ប្រាណ៖ នៅពេលមករដូវស្រីៗប្រាកដជាជួបអាការឈឺចុកចាប់ មិនអត់នៅទេ។ដូច្នេះស្រីៗអាចរៀបនក្បូនហាត់ប្រាណខ្លះៗដែលជួយបន្ធូរអាហារឈឺចុកពេលរដូវបានច្រើនជាងមិនហាត់ និងលឿនឆាប់បាត់ចុក។ ចំពោះលំហាត់ប្រាណមានដូចជាការហាត់យូហ្គាជាដើម។
ម្យ៉ាងវិញទៀតសម្រាប់ស្រីៗចង់ថែស្បែកពេលមករដូវឱ្យស្អាត ចាំក្រុមការងារចាបបៃតងចែករំលងខ្លីៗតាមរយៈវេជ្ជបណ្ឌិត អ៊ុត ចាន់ថា ឯកទេសសម្ភព និងរោគស្រ្តីប្រចាំនៅ មន្ទីរព្យាបាលស្រ្តី និងកុមារដំរី Domrey Mother & Child Clinic បានបញ្ជាក់ថាអរម៉ូនអឹស្រ្តូសែននៅក្នុងរាងកាយរបស់មនុស្សស្រីប្រែប្រួលខ្លាំងនៅអំឡុងពេលមុនមករដូវ និងពេលមករដូវ ដូច្នេះហើយបណ្តាលឱ្យសភាពស្បែករបស់មនុស្សប្រែទៅជាស្រអាប់ ខ្សោះជាតិ គ្មានសំណើម ស្ងួតខ្លាំង ជារឿងធម្មតា។ ប៉ុន្តែប្រសិនបើស្រ្តីចេះវិធីថែទាំស្បែកអំឡុងថ្ងៃមករដូវនោះ ស្បែកនឹងអាចប្រែទៅជារលោងហើយសាច់ចាំថែមទៀតផង៖ គឺលាងមុខឱ្យមានគ្រប់គ្រាន់ ញ៉ាំអាស៊ីតខ្លាញ់ Omega-3 ប្រភេទ DHA (docosahexaenoic acid) ដែលមានដូចជាគ្រឿងសមុទ្រ ងាវ សាច់ត្រីផ្សេងៗ ត្រីសាល់ម៉ុង...ជាដើម ផឹកទឹក២លីត្រកន្លះក្នុង១ថ្ងៃ៕
អត្ថបទដោយ៖ ប៉ែត ធីតា