បើស្ត្រីមានបញ្ហាស្រុតស្បួនមិនទទួលការព្យាបាលទេនោះ វានឹងមានផលវិបាកមានការហូរខ្ទុះនៅទ្វារមាស ដំបៅ ឬមានការហូរឈាម និងនាំមកនៅវិបត្តិដល់ផ្លូវចិត្តដូចបាត់បង់ជំនឿចិត្តលើខ្លួនឯង មានវិបត្តិផ្លូវចិត្ត អាចប្រឈមការស្រុតប្លោកនោម ស្រុតពោះវៀនធំ និងស្រុតរន្ធគូថជាដើម។

ហើ់យចំពោះការស្រុតស្បូនមិនមែនជាជំងឺនេះ តែវាគ្រាន់តែជាការខ្សោយនៃសរសៃភ្ជូរស្បូនទើបធ្វើឱ្យស្បូនចាប់ផ្ដើមស្រុត លូនចេញមកខាងក្រៅដូច្នេះ។ លើសពីនេះ វាអាចធ្វើឱ្យស្រ្តីងាយនឹងជួបផលវិបាកដូចជាទល់លាម បត់ជើងតូចមិនអស់នៅសល់ទឹកនោម រំខានក្នុងការរស់នៅផងដែរ។ ហើយមានកត្តាហានិភ័យមួយទៀតគឺស្រ្តីដែលសម្រាលកូនរួច១ខែកន្លះគួរតែមកពិនិត្យសុខភាពស្បូន ដើម្បីឱ្យគ្រូពេទ្យពិនិត្យនិងវិនិឆ្ឆ័យ វាយតម្លៃលើអាងត្រគាក​ទាំងអ្នកសម្រាលធម្មជាតិ និងអ្នកវះកាត់ គ្រាន់តែអ្នកសម្រាលធម្មជាតិហានិភ័យជាង។ ​សម្រាប់ការពិនិត្យនេះបើរកឃើញថាសាច់ដុំអាងត្រគាករបស់អ្នកនៅមិនទាន់ហាប់ណែន គ្រូពេទ្យនឹងបង្រៀនលំហាត់ប្រាណដល់ស្រ្តីដើម្បីជួយពង្រឹងសាច់ដុំអាចហាប់ណែនវិញ។

យោងតាមការចុះផ្សាយលើគេហទំព័រ healthline បានឱ្យដឹងថា មូលហេតុដែលបណ្តាលឱ្យសាច់ដុំត្រគាកមនុស្សស្រីចុះខ្សោយគឺដោយសារកត្តា សម្រាលកូន ស្រ្តីដែលពិបាកក្នុងការសម្រាលកូនប្រឈមមុខទៅនឹងបញ្ហាស្រុតស្បូនគ្រោះថ្នាក់បំផុត ស្រ្តីដែលធាត់លើសគីឡូក៏ប្រឈមទៅនឹងបញ្ហាស្រុតស្បូនដែរ។ លើសពីនេះទៀត ស្រ្តីដែលមានវ័យចំណាស់ អស់វដ្តរដូវ បាត់បង់អរម៉ូនអេស្រ្តូសែន បណ្តាលឱ្យសាច់ដុំដែលនៅទ្រស្បូនសងខាងចុះខ្សោយ ធ្វើឱ្យស្បូនងាយនឹងស្រុតចុះមកមាត់ទ្វារមាសផងដែរ។ បើអ្នកសង្កេតខ្លួនឯងឃើញថាមានរោគសញ្ញាដូចខាងលើសូមប្រញាប់ទៅត្រួតពិនិត្យស្បូននៅមន្ទីរពេទ្យរោគស្រ្តីឱ្យបានទាន់ពេលវេលា កុំទុកយូរឱ្យសោះ៕ អត្ថបទដោយ៖ ទ្រ សុភាព