តាមការជូនដឹងនថ្ងៃទៅ២៥ ខែមេសា ឆ្នាំ២០២៣ ក្រសួងធនធានទឹក និងឧតុនិយម បានជូនដំណឹងដល់សាធារណជន ឱ្យដឹងនិងបង្កើនការប្រុងប្រយ័ត្ន ចំពោះបាតុភូតធម្មជាតិដែលអាចកើតមានឡើងជាយថាហេតុ។ ដោយនៅក្នុងអំឡុងមួយសប្តាហ៍ខាងមុខនេះ ចាប់ពីថ្ងៃទី២៦ ខែមេសា ដល់ថ្ងៃទី០២ ខែឧសភា ឆ្នាំ២០២៣ កម្ពុជាទទួលឥទ្ធិពលពីកម្រិតសម្ពាធទាប ខ្សោយទៅមធ្យមនិងខ្យល់ប្រែប្រួល។

ដោយឡែកនៅថ្ងៃខ្លះ ក៏នឹងអាចកើតមានឡើងនូវសម្ពាធទាបកម្ដៅ(Thermal Low) ផងដែរ។ ជាហេតុនេះធ្វើឱ្យស្ថានភាពអាកាសអាចមានការប្រែប្រួល នៅតំបន់ទំនាបកណ្តាល សីតុណ្ហភាពអប្បបរមា មានពី ២៥-២៧ អង្សាសេ និងសីតុណ្ហភាពអតិបរមា មានពី ៣៦-៣៨ អង្សាសេ។ជាមួយគ្នានេះ ផ្នែកមួយចំនួននៃបណ្តារាជធានី-ខេត្ត អាចមានភ្លៀងធ្លាក់ក្នុងកម្រិតពីខ្សោយទៅមធ្យម និងអាចបង្គួរ នៅផ្នែកខ្លះលាយឡំទៅដោយផ្គរ រន្ទះ និងខ្យល់កន្ត្រាក់ ពិសេសបណ្តាខេត្តភាគពាយ័ព្យ ។

រីឯតំបន់ខ្ពង់រាប នឹងមានសីតុណ្ហភាពអប្បបរមា មានពី ២៥-២៧ អង្សាសេ និងសីតុណ្ហភាពអតិបរមា មានពី ៣៥- ៣៧ អង្សាសេ។ រួមទាំងអាចមានភ្លៀងធ្លាក់ក្នុងកម្រិតពីខ្សោយទៅមធ្យម លាយឡំទៅដោយផ្គរ រន្ទះ និងខ្យល់កន្ត្រាក់។ សម្រាប់តំបន់មាត់សមុទ្រ សីតុណ្ហភាពអប្បបរមាមានពី ២៥-២៧ អង្សាសេ និងសីតុណ្ហភាពអតិបរមាមានពី ៣៣-៣៥ អង្សាសេ។ រួមទាំងអាចមានភ្លៀងធ្លាក់ក្នុងកម្រិតពីខ្សោយទៅមធ្យម លាយឡំទៅដោយផ្គរ រន្ទះ និងខ្យល់កន្ត្រាក់។

ដោយអាកាសធាតុមានការប្រែប្រួល ហេតុនេះសូមបងប្អូនប្រុងប្រយ័ត្ននិងមើលថែសុខភាពឱ្យបានល្អគ្រប់ៗគ្នា៕