ក្រពះជាសរីរាង្គ១ប្រភេទ ដែលមាននាទីជាអ្នករំលាយអាហារគ្រប់ប្រភេទដែលញុំាចូលទៅ ទាំងអាហារល្អនិងអាហារមិនល្អ ក្រពះរំលាយទាំងអស់ ។ ជាការពិតណាស់ដោយសារអាហារជាច្រើនដែលញុំាចូលជាប្រចាំថ្ងៃ បានបង្កឱ្យក្រពះ ចាប់ផ្ដើមខ្សោយៗទៅ ងាយនឹងខូចឡើងមក។

ដូច្នេះហើយ បើអ្នកកំពុងតែខ្សោយក្រពះទៅហើយ ត្រូវចៀសអាហារមានសារធាតុទាំងអស់នេះ បើយោងតាមរយៈគេហទំព័រ everydayhealth។

 ១. អាហារមានជាតិអាស៊ីត៖ មិនថាជា ទឹកប៉េងប៉ោះ ក្រូចឆ្មារ ក្រូចក្រហម និងក្រូចថ្លុង សុទ្ធតែត្រូវបានគេរាប់បញ្ជូលទៅក្នុងក្រុមអាហារមានជាតិអាស៊ីត និងអាចធ្វើឱ្យរលាកស្រទាប់ក្រពះ បង្កបញ្ហាដល់ប្រព័ន្ធរំលាយអាហារដែលជាទូទៅកើតមានឡើងចំពោះអ្នកមានបញ្ហាក្រពះពោះវៀនស្រាប់។

២. អាហារមានជាតិខ្លាញ់៖ សារជាតិខ្លាញ់ នឹងជំរុញឱ្យមានការកន្ត្រាក់ក្នុងបំពង់រំលាយអាហារ ដែលអាចពន្យឺតការបញ្ចេញអាស៊ីតក្រពះ និងធ្វើឱ្យបញ្ហាទល់លាមក ឬរាគ កាន់តែអាក្រក់ទៅៗ។

៣. ជាតិស្ករកែច្នៃ៖ ប្រភេទអាហារមានជាតិស្ករកែច្នៃរួមមាន ស្ករកៅស៊ូ ស្ករគ្រាប់ និងប្រភេទនំ ឬដណ្តាប់ផ្សេងៗ មានផ្ទុកទៅដោយសារជាតិ sorbitol ដែលជាជាតិស្ករដែលពិបាករំលាយ។ នៅពេលដែល sorbitol ទៅដល់ពោះវៀនធំ ភាគច្រើននឹងបង្កើតជាឧស្ម័ន បង្កឱ្យហើមពោះ និងរាគផងដែរ។

៤. ជាតិកាហ្វេអ៊ីន៖ ជាតិកាហ្វេអ៊ីន ជួយជំរុញចលនានៃក្រពះពោះវៀន ធ្វើឱ្យមានសមត្ថភាពផ្លាស់ទីកាន់តែលឿនតាមរយៈប្រព័ន្ធសរីរាង្គ ហើយបរិមាណច្រើនហួសនៃជាតិកាហ្វេអ៊ីន ក៏ជាកត្តាអាចឱ្យកើតជាបញ្ហារាគរូសចំពោះសុខភាពបុគ្គលមួយចំនួនដូចគ្នា ជាពិសេសកើតមានចំពោះអ្នកមានរោគក្រពះពោះវៀនតែម្តង។

៥. ស្ករសិប្បនិមិ្មត៖ មានផ្ទុកសារធាតុ sorbitol ដែលអាចបង្កឲ្យ​ ហើមពោះ រាក​ និងកើនឡើងខ្យល់ ក្នុងពោះវៀនផងដែរ ។

៦.ទឹកដោះគោ៖ មានផ្ទុក សារធាតុ lactose ដែលនាំឲ្យ មានការលំបាក ក្នុងការរំលាយ អាហារ អាចនាំឲ្យ រាក ហើមពោះ និងមានខ្យល់ក្នុងពោះវៀនផងដែរ ។

អាហារទាំង៦ខាងលើនេះ បើអ្នកកំពុងតែខ្សោយក្រពះពោះវៀន ហាមញុំាប្រសិនណាចង់ជាលឿន។ ​ដូច្នេះបើអ្នកដឹងពីប្រភេទអាហារនេះហើយ គឺងាយស្រួលក្នុងការចៀសវាងញុំា ប្រសើរជាងមិនបានដឹង ញុំាទៅក្រពះធ្វើទុកខ្លាំងមិនដឹងមូលហេតុ។

អត្ថបទដោយ៖​ ប៉ែត​ ធីតា