មនុស្សយើងមានសម្រស់ចាស់ជាងវ័យ តែងមានអារម្មណ៍អន់ចិត្តនឹងខ្លួនឯងដែលមានរូបរាងមិនស្អាត ស្បែកស្រអប់ ផ្ទៃមុខមានស្នាមជ្រីវជ្រួញ និងមុខឡើងមុនជាដើម... បញ្ហាទាំងអស់នេះ ធ្វើឱ្យអ្នកកាន់តែបាក់ទឹកចិត្តថែមទៀត។ ដើម្បីថែសម្រស់ស្អាត អ្នកត្រូវមានទម្លាប់ហាត់ប្រាណតែម្យ៉ាងមិនទាន់គ្រប់គ្រាន់នោះទេ អ្នកត្រូវរួមបញ្ចេញរបបអាហារល្អៗ ខាងក្រោមនេះ ដើម្បីព្យាបាលស្បែកពីខាងក្នុង ឱ្យសម្រស់ខាងក្រៅមានពន្លឺស្រស់ស្អាត។
ប្រេងត្រីដែលមានជាតិអាស៊ីតខ្លាញ់អូមេហ្គា៣ ជាសារធាតុបំប៉នសម្រស់ល្អបំផុត។ ជាតិខ្លាញ់ត្រីនេះមានអត្ថប្រយោជន៍មិនត្រឹមតែស្បែកទេ ប៉ូវរាងកាយរឹងមាំផងដែរ។ អ្វីដែលអស្ចារ្យនៃប្រេងត្រីនេះជួយការពារស្បែករបស់អ្នកប្រឆាំងនឹងការរលាកពីកាំរស្មី UV ដែលបង្កគ្រោះថ្នាក់ពីព្រះអាទិត្យ។ អ្នកគួរហូបត្រីធូណា ត្រីសាម៉ុន និងត្រីសាឌីនខ្លះ និងត្រីខ្មែរក៏បានដែរ ដើម្បីស្បែករបស់អ្នកមានសុខភាព សម្រស់កាន់តែក្មេងជាងវ័យ។
វីតាមីនD មានភាពល្បីល្បាញខាងផលិតដោយរាងកាយនៅពេលអ្នកចំណាយពេលគ្រប់គ្រាន់នៅក្រោមពន្លឺថ្ងៃចាប់ពីម៉ោង៦ដល់ម៉ោង៩ព្រឹកជាម៉ោងរាងកាយស្រូបពន្លឺព្រះអាទិត្យបានល្អដែលមានអត្ថប្រយោជន៍ដល់ស្បែក។ គ្រាន់តែចំណាយពេល ៥ទៅ ១០នាទីតែប៉ុណ្ណោះ។ វីតាមីនD មានសារៈសំខាន់សម្រាប់បន្តពូជកោសិកាស្បែក។
ចំពោះផ្លែប៉េងប៉ោះក៏មានផ្ទុកសារធាតុ Lycopene ជួយការពារស្បែកពីកាំរស្មី UV ដែលបង្កដោយកម្តៅព្រះអាទិត្យជាមូលហេតុចម្បងធ្វើឱ្យស្បែកមានស្នាមជ្រីវជ្រួញ និងខ្មៅស្រអាប់។ ពេលអ្នកហូបផ្លែប៉េងប៉ោះជាមួយអាហារផ្សេងក៏បានដែរ វាមានឥទ្ធិពលប្រឆាំងអុកស៊ីតកម្មការពារស្បែករបស់អ្នកពីភាពវ័យចាស់បានល្អបំផុត។ ផ្លែប៉េងប៉ោះនេះ មានផ្ទុកសារធាតុ បេតាការ៉ូទីន (Beta-carotene) ខ្ពស់ ហើយវាបំប្លែងទៅជាវីតាមីន A ដែលដើរតួយ៉ាងសំខាន់ក្នុងការគ្រប់គ្រងស្បែករបស់អ្នកឱ្យក្មេងជាងវ័យ។
អ្នកគួរហូបខ្ទឹមសជាគ្រឿងទេសដែលភាគច្រើនត្រូវបានគេប្រើប្រាស់សម្រាប់ចម្អិនម្ហូបអាហារ វាជួយសរសៃឈាមលាងជាតិពុលឱ្យស្បែករបស់អ្នកកាន់តែមានពន្លឺស្រស់ស្អាត។ ព្រោះខ្ទឹមសមានសមត្ថភាពក្នុងការពង្រឹងភាពរឹងមាំរបស់រាងកាយប្រឆាំងភាពចាស់ និងព្យាបាលជំងឺដូចជាគ្រុនផ្ដាសាយផងដែរ។ ជាមួយគ្នានេះដែរ ខ្ទឹមសក៏មានផ្ទុកនូវសារធាតុប្រឆាំងអុកស៊ីតកម្ម Allincin ដែលប្រឆាំងភាពចាស់ល្អបំផុត៕ អត្ថបទដោយ៖ ទ្រ សុភាព