ជាំមុខគឺជាបញ្ហាមួយដែលពិបាកក្នុងការព្យាបាលជាងបញ្ហាមុន និងផ្សេងៗ។ ពីព្រោះ ជាំមុខគឺវាកើតឡើងមកពីកត្តាច្រើនដូចជា ជាំកម្តៅថ្ងៃ ជាំឈាម ជាំកំណើតកូន ជាំដោយសារការប្រើប្រាស់ផលិតផលខុស ផលិតជាតិកាត់ជាតិមក ជាហេតុធ្វើឱ្យស្បែកស្តើង ហើយផលិតជាតិមេឡានីនលើសកម្រិត បង្កទៅជាជាំនៅលើស្បែក ជាពិសេសគឺស្បែកមុខតែម្តង។ មួយវិញទៀត គឺបញ្ហាជាំកើតច្រើនទៅលើ មនុស្សស្រី ពីព្រោះជាភេទដែលមានការប្រែប្រួលអរម៉ូនខ្លាំង។

ជាការពិតណាស់ បងប្អូនខ្មែរយើងអ្នកដែលមានបញ្ហាជាំមុខ ឬមុខឡើងស្នាមអុចខ្មៅ ពួកគាត់តែផ្តោចសំខាន់ទៅលើការប្រើប្រាស់Skin care។ ជាក់ស្តែង Skin care តែមួយមុខមិនអាចកម្ចាត់ស្នាមជាំនៅលើមុខបានទេ លុះត្រាតែមានកត្តារួមផ្សំផ្សេងៗទៀត ដូចជារបបអាហារ ការផឹកទឹកឱ្យគ្រប់គ្រាន់។ វេជ្ជបណ្ឌិត Jonathan T. Wolfe, M.D បានប្រាប់ថា អ្នកជាំមុខគឺគេណែនាំឱ្យញ៉ាំទឹកឱ្យបានច្រើន ១ថ្ងៃ៧ទៅ៨កែវ ស្មើនឹង២លីត្រកន្លះទៅ៣លីត្រ។ 

ក្រៅពីផឹកទឹកឱ្យគ្រប់គ្រាន់ គេហទំព័រ manipalhospitals បានណែនាំ ភេសជ្ជៈធម្មជាតិទាំង៣ប្រភេទខាងក្រោមគឺមាននាទីជួយទប់កម្រិតជាតិមេឡានីនកុំឱ្យកើន ជួយបំបាត់ស្នាមជាំបន្តិចម្តងៗ បើព្យាយាមផឹកបានរាល់ថ្ងៃ៖

-ទឹកល្ហុង៖ ផ្លែល្ហុងមានអង់ស៊ីម និងសារធាតុរ៉ែ ដែលជាធាតុផ្សំធម្មជាតិក្នុងការបំបាត់ស្នាមអុចខ្មៅ។ អ្នកត្រូវយកសាច់ល្ហុងទុំចំនួន៣ខាំ ស្មើនឹង៣០០ក្រាម ទៅចិតជាដុំតូចៗ រួចដាក់ក្នុងម៉ាស៊ីនក្រឡុក ថែមទឹកត្រជាក់១កែវ ផឹកមុនអាហារពេលព្រឹក រាល់ព្រឹក។ មួយទៀត អ្នកអាចប្រើវិធីលាប ដោយក្រឡុកសាច់ល្ហុងទុំឱ្យហ្មត់រួចលាបនៅលើស្បែកមុខ ទុកចោលរយៈពេល២០នាទីលាងមុនជាមួយទឹកធម្មតាចេញជាការស្រេច។

-ទឹកប៉េងប៉ោះ+ទឹកឃ្មុំ៖ អ្នកត្រូវមានប៉េងប៉ោះទុំ១ឬ២ផ្លែ ចិតជាចំណិតតូចៗ លាយជាមួយទឹកឃ្មុំមួយស្លាបព្រាកាហ្វេ ក្រឡុកឱ្យហ្មត់ រួចផឹកនៅពេលល្ងាច។

-ទឹកខ្មេះប៉ោម+ក្រូចឆ្មារ+ទឹកក្តៅឧណ្ហៗ៖ លាយខ្មេះប៉ោមកន្លះព្រាបាយ ជាមួយនឹងក្រូចឆ្មារ១ចំណិតក្នុងទឹកក្តៅឧណ្ហៗ១កែវ ផឹកនាពេលព្រឹកក្រោយពីទទួលទានអាហារ អាចជួយរក្សាសុខភាពស្បែកបានល្អ។ ដោយហេតុថា នៅក្នុងក្រូចឆ្មារ និងទឹកខ្មេះប៉ោម ផ្ទុកទៅដោយសារជាតិវីតាមីនC ជំនួយដល់ស្បែកប្រឆាំងនឹងបាក់តេរីអាក្រក់ រ៉ាឌីកាល់សេរី ពន្យាភាពចាស់ បណ្តេញជាតិពុលចេញពីស្បែក ជួយដល់ប្រព័ន្ធរំលាយអាហារឱ្យមានដំណើរការស្រូបយកសារធាតុរ៉ែ និងធ្វើឱ្យសុខភាពក្រពះមានតុល្យភាព pH ឡើងវិញ ដើម្បីធ្វើឱ្យរាងកាយទទួលបាននូវសារចាតិចិញ្ចឹមគ្រប់គ្រាន់ទៅបំប៉នសុខភាពស្បែកពេញរាងកាយ។

-តែជីរអង្កាម៖ តែជីអង្កាមជាប្រភេទភេសជ្ជៈល្អបំផុតសម្រាប់ជួយដល់សុខភាពផ្លូវដង្ហើម ក៏ប៉ុន្តែអត្ថប្រយោជន៍របស់វាមួយផ្នែកទៀតក៏ជួយដោះស្រាយបញ្ហា ស្នាមជាំផងដែរ។ ការទទួលទានតែជីអង្កាមក្តៅៗព្រឹក-ល្ងាច ជាប្រចាំថ្ងៃ អាចទប់ស្កាត់ការកើនឡើងនៃអរម៉ូនស្ត្រេសដែលបង្កឱ្យកើតមុន ប្រឆាំងនឹងការរលាកផ្សេងៗដែលបណ្ដាលឱ្យកើតជាមុនខ្ទុះ ឬមុនកប់ក្រោមស្បែក និងជួយសម្រួលដល់បញ្ហាស្បែកងាយឡើងសរសៃក្រហម។

គូសបញ្ជាក់ផងដែរថា ភេសជ្ជៈទាំង៤ខាងលើមិនមែនជាថ្នាំទេ ប៉ុន្តែវាមាននាទីជំនួយនិងជួសជុលកោសិកាស្បែកដែលខូចខាតពីខាងក្នុង។ ដូច្នេះចំពោះការផឹកគឺមិនអាចផឹកភ្លាមបានផលភ្លាមនោះទេ ទាមទារឱ្យអ្នកមានការព្យាយាម បូកផ្សំជាមួយការប្រើប្រាស់ Skin care ញ៉ាំអាហារសុខភាព ផឹកទឹកឱ្យគ្រប់៕

អត្ថបទដោយ៖ គន្ធា