កាត់ទម្លាប់ផឹកស្រានាំលោកអ្នកកាន់តែឆាប់មានកូន ព្រោះមេជីវិតរបស់អ្នកមានសុខភាពល្អ។ តាមលោកវេជ្ជបណ្ឌិត ខ ហុកស៊ុន ឯកទេសផ្នែកសម្ពពរោគស្ត្រីនិងជំងឺទូទៅ បានចែករំលែកមុននឹងសម្រេចចិត្តថាមានកូន ភាគីទាំងសងខាង ពិសេសបុរសគួរចៀសវាងការទទួលទានគ្រឿងស្រវឹង ព្រោះវាអាចធ្វើឱ្យប៉ះពាល់ដល់សុខភាពមេជីវិត។ គួរតែតមឱ្យបានមុនពី៦ខែកាន់តែល្អ។ គាត់បានបន្តថា ផឹកទឹកឱ្យបានគ្រប់គ្រាន់៖ ទាំងបុរសនិងស្ត្រី ត្រូវផឹកទឹកចន្លោះពី៨ទៅ១០កែវក្នុង១ថ្ងៃ ឬយ៉ាងតិចពី២ទៅ៣.៥លីត្រ ក្នុង១ថ្ងៃ។ ទឹកនឹងជួយឱ្យភាគីបុរសមានទឹកកាមគ្រប់គ្រាន់ ស្ត្រីមានទឹករំអិលច្រើន វានឹងជួយឱ្យមេជីវិតធ្វើដំណើរបានល្អ។ មានទម្លាប់បន្ថែមនោះគឺអ្នកគួរធ្វើលំហាត់ប្រាណដើម្បីពង្រឹងសុខភាពរាងកាយ ឱ្យមេជីវិតមានគុណភាពល្អ។

របបអាហារដើរតួនាទីយ៉ាងសំខាន់ក្នុងការធ្វើអោយប្រសើរឡើងនូវគុណភាពមេជីវិតឈ្មោលរឹងមាំ។ បុរសគួរតែបន្ថែមអាហារដែលសម្បូរទៅដោយសារធាតុប្រឆាំងអុកស៊ីតកម្ម វីតាមីន និងសារធាតុរ៉ែ ដើម្បីបង្កើនសុខភាពបន្តពូជ។ អាហារសម្បូរវីតាមីន C ដូចជា ផ្លែក្រូច ផ្លែស្ត្របឺរី ម្ទេសប្លោក និងបន្លែបៃតង ជួយការពារមេជីវិតឈ្មោលពីការខូចខាតរ៉ាឌីកាល់សេរី។ អាហារសម្បូរជាតិស័ង្កសី ដូចជា អយស្ទ័រ សាច់ក្រហម គ្រាប់ល្ពៅ សណ្ដែក ... គឺជាសារធាតុរ៉ែដ៏សំខាន់សម្រាប់ការលូតលាស់ និងមុខងារមេជីវិតឈ្មោល។ រីឯអាស៊ីតខ្លាញ់ Omega-3 ដែលមាននៅក្នុងត្រីសាលម៉ុន គ្រាប់ធញ្ញជាតិ chia, walnut... ជួយធ្វើឱ្យឈាមរត់ទៅកាន់ប្រដាប់បន្តពូជ ជំនួយដល់ការផលិតមេជីវិតឈ្មោលផងដែរ។

ដូច្នេះ! បើអ្នកមានទម្លាប់រស់នៅល្អហើយ ប៉ុន្តែនៅតែពិបាកមានកូន ឬមានបញ្ហាសុខភាពបន្តពូជណាមួយ សូមកុំខ្លាចក្នុងការទៅជួបប្រឹក្សាជាមួយគ្រូពេទ្យជំនាញ ដើម្បីអាចទទួលបានដំណោះស្រាយដ៏មានប្រសិទ្ធភាព និងបញ្ជៀសហានិភ័យជំងឺធ្ងន់ធ្ងរផ្សេងៗ៕ អត្ថបទដោយ៖ ទ្រ សុភាព