នៅក្នុងជីវិតរបស់មនុស្សយើងសុទ្ធតែមានរឿងស្រមោលខ្មៅជារឿងមិនល្អ ជាកំហុសឆ្គង និងជាបញ្ហារឿងអតីតកាល បើយើងមិនព្រមដោះលែងវាទេ ចិត្តនឹងកើតដំបៅបញ្ហាផ្លូវចិត្តមិនខានទេ។ ពេលអ្នកលាក់ទុក្ខលំបាកក្នុងចិត្ត តើអ្នកមានអារម្មណ៍លំបាកកម្រិតណា? ពេលអ្នកមកគិតលើរឿង ៣នេះ តាមព្រះភិក្ខុជិរប្បញ្ញោ គូ សុភាព ចិត្តរបស់អ្នកនឹងដើរចេញពីបញ្ហាអតីតកាលមិនខានទេ។

១. បើហួសហើយ ឱ្យវាហួសទៅចុះ៖ តាមព្រះភិក្ខុជិរប្បញ្ញោ គូ សុភាព បានសម្តែងថា “អតីតកាលល្អក្តី ឬមិនល្អក្តី បានកន្លងហួសទៅហើយ ទោះបីអ្នកស្តាយប៉ុនណាក៏ទាញវាមកវិញមិនបានដែរ។ អ្នកអាចចងចាំរឿងល្អៗ ឧស្សហ៍នឹកដល់អំពើល្អដែលអ្នកបានសាង ហើយរឿងមិនល្អចាត់ទុកជាមេរៀន ជាបទពិសោធន៍ ហើយចាប់ផ្តើមសារជាថ្មី អតតីកាលមិនមែនជាទីអាស្រ័យទេ វាគ្រាន់តែជាស្រមោលទេតើ”។ គំនិតរបស់ព្រះអង្គមានន័យថា កុំជាប់ចិត្តចំពោះរឿងដែលអ្នកមិនកែប្រែបាន ចូរកែប្រែចំពោះរឿងណាដែលធ្វើឱ្យជីវិតអ្នករីកចម្រើនបានហើយ ទើបផ្លូវចិត្តអ្នករឹងមាំ។

២. អ្នកមិនបាត់អស់ឯណា អ្នកនៅសល់របស់នេះតើ៖ តាមព្រះភិក្ខុជិរប្បញ្ញោ គូ សុភាព បានសម្តែងថា “បើអ្នកបាត់បង់អ្វីៗ ស្ទើរអស់ពីខ្លួន យ៉ាងហោចណាស់ អ្នកនៅសល់ជីវិត នៅមានថ្ងៃនេះនិងស្អែកសម្រាប់រស់បន្តទៀតដែរ។ ថ្ងៃបានលិចបាត់ទៅហើយ អតីតកាលបានកន្លងហួសទៅហើយ អនុញ្ញាតឱ្យវាទៅចុះ រួចបន្តដំណើរទៅមុខទៀត”។ អ្នកអាចចាប់ផ្តើមអ្វីៗ សារជាថ្មីបានជានិច្ច។ មានមហាសេដ្ឋីជាច្រើនធ្លាប់ធ្លាក់ខ្លួនក្រ នៅតែគេអាចសាងខ្លួនកក្លាយជាអ្នកមានឡើងវិញ។ ព្រោះគេខំធ្វើរាប់ឆ្នាំដើម្បីបង្កើនទ្រព្យ គេមិនអង្គុយស្តាយក្រោយរបស់ដែលបាត់បង់នោះទេ។

៣.​ កុំតូចចិត្តនឹងកំហុស តែវាជាមេរៀនជីវិត៖ តាមព្រះភិក្ខុជិរប្បញ្ញោ គូ សុភាព បានសម្តែងថា “គ្មាននរណាមិនធ្លាប់ធ្វើខុសនោះទេ ក្មេងធ្លាប់ដួលរាប់មិនអស់ ទម្រាំតែចេះដើរ។ រឿងមិនល្អធ្វើឱ្យអ្នកឈឺចាប់ តែវាជួយអ្នកឱ្យមើលបញ្ហាបានច្បាស់ជាងមុន ស្គាល់មនុស្សបានប្រាកដជាងមុន។ កំហុសចាត់ទុកជាគ្រូ តែកុំឱ្យខុសដដែលៗ ណា”! កំហុសមានតម្លៃពេលអ្នកចេះរៀនសូត្រពីវា ហើយវាជាកំហុសកាន់តែធំ ពេលអ្នកធ្វើកំហុសដដែលៗ ពេញមួយជីវិត។ តាមសៀវភៅ លំហូរចិត្ត បានលើកឡើងដែរថា ពេលមានបញ្ហា ចូរមកបញ្ហាធ្វើជាគ្រួ ទើបយើងមានគំនិតឆ្លាតជាងមុន៕ អត្ថបទដោយ៖ ទ្រ សុភាព 

 លោកអ្នកអាចទិញសៀវភៅ លំហូរចិត្ត តាមហាងឆេង២៤>> https://t.me/hangchhengH24