មិនមែនឱ្យតែកើតជំងឺទឹកនោមផ្អែមត្រូវលាងឈា.មនោះទេ! អ្នកមានជំងឺ១នេះយូរឬឆាប់ក៏អាចលាងឈា.មដូចគ្នា។
និយាយពីជំងឺលើសសម្ពាធឈាម ជំងឺនេះកើតមានច្រើនខ្លាំងម្ល៉េះ អ្នកខ្លះអាយុ៣០មិនទាន់មានជំងឺលើសឈាមបាត់ទៅហើយ ហើយបើបណ្ដោយមិនព្រមព្យាបាលទៀត គឺមានប្រឈមគ្រោះថ្នាក់ធ្ងន់ធ្ងរមិនខា ពីព្រោះថាជំងឺលើសឈាម បើកើតមកហើយ គឺអាចហៅជំងឺផ្សេងមកជាមួយវាដូចគ្នា។
ជាក់ស្ដែងបើយោងតាមរយៈវេជ្ជបណ្ឌិត ប៊ុន សុជាតិ ជាស្ថានិក មជ្ឃមណ្ឌលឯកទេសជំងឺទឹកនោមផ្អែម មានបទពិសោធន៍លើការព្យាបាលជំងឺទឹកនោមផ្អែម១០ឆ្នាំមមកហើយ។ លោកវេជ្ជបណ្ឌិតបានបកស្រាយបន្តថា ជំងឺលើសសម្ពាធឈាម ឬក៏បងប្អូនខ្មែរយើងនិយមហៅថាជំងឺលើសឈាមនេះគឺមានភាគរយកើតច្រើនជាងជំងឺទឹកនោមផ្អែមទៅទៀត។ តួយ៉ាងនេះបើអ្នកជំងឺកើតលើសឈាម៣ទៅ៥ឆ្នាំ ឬក៏១០ឆ្នាំ ច្បាស់ណាស់ ថាគាត់នឹងអាចប្រឈមកើតជំងឺទឹកនោមផ្អែម១មុខទៀតមិនខាន ព្រោះវេជ្ជបណ្ឌិតបានបញ្ជាក់ថាជំងឺលើសឈាមគឺជាបងប្អូនភ្លោះជាមួយជំងឺទឹកនោមផ្អែម។
លើសពីនេះប្រសិនណាជំងឺ២នេះជួបគ្នា គឺធ្វើឱ្យមានផលវិបាកក្នុងរាងកាយរបស់យើងកាន់តែច្រើន កាន់តែខ្លាំងកាន់តែធ្ងន់ធ្ងរ។ ដូច្នេះប្រសិនណាបងប្អូនទើបតែមានជំងឺ១ក្នុងចំណោមជំងឺ២នេះ សូមថែរក្សាខ្លួនឱ្យបានត្រឹមត្រូវ ព្រោះជាក់ស្ដែងប្រសិនណាបងប្អូនមានជំងឺទឹកនោមផ្អែមគឺអាចរុញបងប្អូនឱ្យងាយនឹងខូចក្រលៀនទៅហើយ បទពិសោធន៍ជាក់ស្ដែង ២នាក់គឺមានម្នាក់ហើយខូចក្រលៀន ចុះទម្រាំមានជំងឺលើសឈាម១បន្ថែមទៀតកាន់តែធ្ងន់ធ្ងរ។ បន្ថែមពីនេះលោកវេជ្ជបណ្ឌិតក៏បានបញ្ជាក់ថា អ្នកមានជំងឺលើសឈាមក៏ដូចគ្នាបើព្យាបាលមិនបានត្រឹមត្រូវ ទៅមុខទៅក៏ប្រឈមខូចក្រលៀន ត្រូវលាងឈាម ដូចជំងឺទឹកនោមផ្អែមដែរ។
អាស្រ័យហេតុនេះហើយ សូមបងប្អូនថែរក្សាសុខភាពរបស់ខ្លួនឱ្យបានត្រឹមត្រូវព្រោះបើកើតជំងឺលើសឈាមព្យាបាលមិនត្រឹមត្រូវក៏អាចវិវត្តធ្វើឱ្យខូចក្រលៀនដូចគ្នា។ ជាពិសេសវេជ្ជបណ្ឌិតផ្ដាំថា បើមានកើតជំងឺ១ណាក្នុងចំណោមជំងឺ២នេះត្រូវប្រយ័ត្ននិងព្យាបាលឱ្យបានទាន់ពេលវេលា ព្រោះ២នេះបូកចូលគ្នាហើយ ឱកាសគ្រោះថ្នាក់ធ្ងន់ធ្ងរដល់រាងកាយអ្នកកាន់តែខ្លាំងទ្វេដង៕
អត្ថបទដោយ៖ ប៉ែត ធីតា
