ភ្នំពេញ ថ្ងៃទី 29 ខែ តុលា ឆ្នាំ 2023 – ក្រុមហ៊ុន​ Herbalife កម្ពុជាដែលជាក្រុមហ៊ុនសុខភាព និងសុខុមាលភាពលំដាប់ថ្នាក់ពិភពលោកបានរៀបចំកម្មវិធីចុះហត្ថលេខាបន្តភាពជាដៃគូសហការជាមួយអង្គការសប្បុរសធម៌ចំនួន 3 ដែលជាដៃ​គូ​ ​Casa Herbalife របស់ខ្លួនក្រោមជំនួយរបស់មូលនិធិ Herbalife Nutrition (HNF)។​ កម្មវិធីដ៏អធិកអធ័មមួយនេះបានធ្វើឡើងក្នុងឪកាសព្រឹត្តិការណ៍អបអរគម្រប់ខួប 10 ឆ្នាំរបស់ក្រុមហ៊ុន Herbalife នៅក្នុងប្រទេស​កម្ពុជា។​ អង្គការសប្បុរសធម៌ទាំង 3 ដែលជាដៃ​គូ Casa Herbalife នោះរួមមាន​អង្គការដើម្បីភាពញញឹមនៃកុមារ (PSE) ​មន្ទីរពេទ្យកុមារអង្គរ ​(AHC)​ និងអង្គការអនាគតកុមារអន្តរជាតិ​ (CFI)។​ កម្មវិធីនេះមានការចូលរួមពីតំណាងអធិបតី​នៃអង្គការនីមួយៗ ថ្នាក់ដឹក​​នាំក្រុមហ៊ុន បុគ្គលិកគ្រប់ជាន់ថ្នាក់ និងសមាជិកឯករាជ្យ Herbalife ទាំងក្នុងនិងក្រៅស្រុកប្រមាណជាង 1,200 នាក់។​

ក្នុងរយៈពេល 10 ឆ្នាំកន្លងមកនេះ ក្នុងនាមជាផ្នែកមួយនៃយុទ្ធនាការទំនួលខុសត្រូវសង្គម (CSR) ក្រុមហ៊ុន Herbalife​កម្ពុជាតែងតែគិតគូរជាចាំបាច់ទៅលើការផ្តល់ត្រលប់ទៅវិញទៅកាន់សហគមន៍។ ដោយឈរលើគោលជំហរដ៏មុតមាំមួយ​នេះ ក្រុមហ៊ុន Herbalife កម្ពុជាបានចាប់ដៃគូសហការជាមួយអង្គការសប្បុរសធម៍​នានានៅក្នុងតំបន់តាមរយៈកម្មវិធី​ Casa Herbalife ក្រោមជំនួយឧបត្ថម្ភជាថវិកាពី​មូលនិធិ Herbalife ​Nutrition។​ ការផ្តល់ជំនួយជាហិរញ្ញវត្ថុនេះ គឺដើម្បីគាំទ្រទៅដល់កម្មវិធីអាហារ​​​​ ​និង​ការអប់រំអាហារូបត្ថម្ភ និងសុខុមាលភាពសម្រាប់កុមារ​ងាយរងគ្រោះដែលត្រូវការជំនួយនៅ​ក្នុងតំបន់។​ គួររំលឹកផងដែរថា នៅ​ក្នុងឆ្នាំ​ 2013 អង្គការដើម្បីភាពញញឹមនៃកុមារ​(PSE) ក្នុងរាជធានីភ្នំពេញបានក្លាយ​​ជាដៃគូសហការដំបូងគេបង្អស់នៅក្នុងប្រទេសកម្ពុជា។ បន្ទាប់មក មន្ទីរពេទ្យកុមារអង្គរ (AHC)​ ក្នុងខេត្តសៀមរាបបាន​​ក្លាយជាដៃគូសហការទីពីរក្នុងឆ្នាំ 2019 ហើយនៅឆ្នាំ 2022 អង្គការអនាគតកុមារអន្តរជាតិ (CFI)​ ក្នុងខេត្តបាត់ដំបងបានក្លាយជាដៃគូសហការទីបីរបស់យើង។ ជំនួយហិរញ្ញវត្ថុរបស់មូលនិធិ Herbalife ​Nutrition ទៅកាន់អង្គការសប្បុរសធម៌ទាំងបីខាងលើសម្រាប់គម្រោងឆ្នាំ ​2023-2024 នេះមានទំហំទឹកប្រាក់រហូតទៅដល់ 249,661 ដុល្លារអាមេរិក និងបាន​ជួយទៅដល់កុមារនៅក្នុងតំបន់ប្រមាណជាជាង 11,000 នាក់មកពីជាងរាប់ពាន់គ្រួសារដែលជួបប្រឈម​នឹងការ​លំបាក​។ គូសបញ្ជាក់ផងដែរថា ជំនួយជាថវិកាដ៏ច្រើនសន្ធឹកសន្ធាប់ពីមូលនិធិ​ Herbalife Nutrition នេះ គឺសុទ្ធសឹងតែទទួល​បានពីការបរិច្ចាគជាប្រចាំពីសំណាក់សមាជិកឯករាជ្យរបស់ក្រុមហ៊ុន Herbalife នៅក្នុងតំបន់អាស៊ីប៉ាស៊ីហ្វិកមួយទាំងមូលរួមមានទាំងប្រទេស​កម្ពុជា​​ផងដែរ។​ នេះសបញ្ជាក់អោយឃើញថា សមាជិកឯករាជ្យរបស់ក្រុមហ៊ុន​ Herbalife​កម្ពុជាក៏បានគាំទ្រ និងចូលរួមចំណែកយ៉ាងសកម្មក្នុងយុទ្ធនាការរបស់ក្រុមហ៊ុនក្នុងការផ្តល់ត្រលប់ទៅកាន់សហគមន៍របស់ខ្លួនវិញផងដែរ។​ 

ឆ្លៀតក្នុងឪកាសដ៏វិសេសវិសាលមួយនេះ អ្នកស្រី ឈុន ណៃឈីវ អគ្គនាយិកាក្រុមហ៊ុន Herbalife កម្ពុជា បានមានប្រសាសន៍ថា៖ “តាមបទពិសោធន៍របស់ខ្ញុំ និងសមាជិកឯករាជ្យ Herbalife កម្ពុជាដែលបានចុះធ្វើទស្សនកិច្ចដោយផ្ទាល់​​​ទៅកាន់អង្គការទាំង​បីដែលជាដៃគូ Casa Herbalife របស់យើងពីមួយឆ្នាំទៅមួយឆ្នាំ យើងពិតជាបានមើលឃើញនូវផលប៉ះពាល់ជាវិជ្ជមានទៅកាន់កុមារ និងសហគមន៍ក្នុងតំបន់ចេញពីជំនួយដែលបានមកពីមូលនិធិ Herbalife​​Nutrition ពិតប្រាកដមែន។ ភស្តុតាង​ជាក់ស្តែងទាំងអស់នេះហើយដែលជំរុញឱ្យពួកយើងនៅតែបន្តគាំទ្រទៅដល់សហគមន៍របស់យើង ហើយខ្ញុំពិតជាមានមោទនភាពខ្លាំងណាស់ចំពោះអ្វីដែលក្រុមហ៊ុនបានចូលរួមជាចំណែកក្នុងការផ្តល់ត្រលប់ទៅកាន់សហគមន៍វិញក្នុងរយៈពេល 10 ឆ្នាំកន្លងមកនេះ ហើយខ្ញុំរឹតតែមានមោទនភាព និងសេចក្តីអំណរអរគុណ​​ទៅដល់សមាជិកឯករាជ្យ ​Herbalife កម្ពុជាទាំងអស់នូវទឹកចិត្តដ៏សប្បុរសរបស់ពួកគេដែលបានចូលរួមចំណែកបរិច្ចាគទៅកាន់មូលនិធិ Herbalife Nutrition និងគាំទ្រទៅដល់កម្មវិធីរៃអង្គាសថវិកានានារបស់យើងកន្លងមក។ សូមអរគុណ។”​



ព័ត៌មានបន្ថែមអំពីក្រុមហ៊ុន Herbalife

ក្រុមហ៊ុន Herbalife (NYSE: HLF) គឺជាក្រុមហ៊ុនសុខភាព និងសុខុមាលភាពឈានមុខគេ និងជាសហគមន៍ដែលកំពុងផ្លាស់ប្តូរជីវិតរបស់មនុស្សជាមួយនឹងផលិតផលអាហារូបត្ថម្ភដ៏អស្ចារ្យ និងជាឱកាសអាជីវកម្មសម្រាប់អ្នកសមាជិកឯករាជ្យរបស់ខ្លួនចាប់តាំងពីឆ្នាំ 1980។ ក្រុមហ៊ុនផ្តល់ជូននូវផលិតផលដែលគាំទ្រដោយវិទ្យាសាស្រ្តដល់អ្នកប្រើប្រាស់នៅក្នុងទីផ្សារជាង 90 តាមរយៈសមាជិកឯករាជ្យដែលផ្តល់ជូននូវការបណ្តុះបណ្តាលមួយទល់មួយ និងផ្តល់ការគាំទ្រសហគមន៍ដោយបំផុសគំនិតឱ្យអតិថិជនប្រកាន់ខ្ជាប់នូវរបៀបរស់នៅដែលមានភាពសកម្ម និងមានសុខភាពល្អដើម្បីរស់នៅក្នុងជីវិតដ៏ល្អបំផុតរបស់ពួកគេ។

ព័ត៌មានបន្ថែមអំពីមូលនិធិ Herbalife Nutrition (HNF)

ចាប់តាំងពីឆ្នាំ 2005 មក មូលនិធិ Herbalife Nutrition (HNF) ដែលជាអង្គការមិនរកប្រាក់ចំណេញសកល 501(c)(3) បានប្តេជ្ញាក្នុងការកែលម្អជីវិតរបស់កុមារ និងសហគមន៍ជុំវិញពិភពលោក។ មូលនិធិ Herbalife Nutrition គាំទ្រដៃគូអាហារូបត្ថម្ភ Casa Herbalife ដែលមានមូលដ្ឋាននៅសហគមន៍ជុំវិញពិភពលោក ដែលជួយនាំមកនូវអាហារូបត្ថម្ភល្អដល់សហគមន៍ដែលងាយរងគ្រោះក្នុងសង្គម ក៏ដូចជាអង្គការដែលផ្តោតលើការលើកកម្ពស់លទ្ធភាពទទួលបានការអប់រំ និងការពង្រឹងអាហារូបត្ថម្ភល្អ សុខភាពទូទៅ និងការសង្គ្រោះគ្រោះមហន្តរាយ។ សម្រាប់ព័ត៌មានបន្ថែមអំពី មូលនិធិ Herbalife Nutrition និងរបៀបដែលអ្នកអាចគាំទ្រកម្មវិធី សូមចូលទៅកាន់គេហទំព័រ www.herbalifenutritionfoundation.org​​។