ខ្ទឹមសត្រូវបានគេប្រើប្រាស់សម្រាប់ធ្វើជាឱសថផង អាហារផង និងគ្រឿងទេសផង ហើយខ្ទឹមសរមានវត្តមានស្ទើរតែគ្រប់មុខម្ហូប។ ជាការពិតណាស់ រុក្ខជាតិមួយនេះមានដើមកំណើតនៅអាស៊ីកណ្ដាល ហើយត្រូវមានគេរកឃើញនៅក្នុងផ្នូររបស់ស្ដេច TUT ដែលមានអាយុកាលជាង៣០០០ឆ្នាំមកហើយ។ នេះបើយោងតាមប្រភព Webmd។

ខ្ទឹម គឺជាផ្នែកមួយនៃពពួក Allium ដែលរាប់បញ្ចូលទាំងខ្ទឹមបារាំង ខ្ទឹមក្រហម ខ្ទឹមស និងម្ទេស។ មិនតែប៉ុណ្ណោះទេ ខ្ទឹមសមានអត្ថប្រយោជន៍ចំពោះសុខភាពជាខ្លាំងរួមមាន សុខភាពបេះដូង ថ្នាំសំលាប់មេរោគ និងប្រឆាំងជំងឺមហារីក។

នៅក្នុងអាហារ ខ្ទឹមសត្រូវបានគេប្រើប្រាស់ក្នុងបរិមាណតិចតួចអាចនិយាយបានថាជា គ្រឿងទេស ហើយវាមានកាឡូរី ខ្លាញ់ ប្រតេអ៊ីន និងកាបូអ៊ីដ្រាតតិចតួចណាស់។ ជារួមខ្ទឹមមួយកំហឹសមានបរិមាន០៤កាឡូរី ប្រូតេអ៊ីន០០ក្រាម ខ្លាញ់០០ក្រាម់ កាបូអ៊ីដ្រាត១ក្រាម និងជាតិសរសៃ០០ក្រាម។

ជាមួយគ្នានេះដែរ បើយោងតាមប្រភព Health Shots បានបញ្ជាក់យ៉ាងដូច្នេះថា ខ្ទឹមសគឺល្អសម្រាប់ប្រព័ន្ធភាពសុំា ដែលភាគច្រើនគេតែងតែញុំានៅរដូវរងារ។ ខ្ទឹមសមានលក្ខណៈល្អ និងអត្ថប្រយោជន៍ជាច្រើនដែលល្អសម្រាប់សុខភាព​ ប៉ុន្តែមនុស្សមួយភាគតូចក៏ត្រូវតែជៀសវាងញុំាខ្ទឹមសនេះផងដែររួមមាន៖

១.អ្នកដែលមានបញ្ហាអាស៊ីត ត្រូវចៀសវាងញុំាខ្ទឹមស

សម្រាប់អ្នកដែលមាន​ បញ្ហាអាស៊ីត ការទទួលទានខ្ទឹមសអាចនាំឱ្យក្រហាយទ្រូង។ ដូច្នេះពួកគេគួរតែជៀសវាងជាការប្រសើរ ហើយវាកាន់តែអាក្រក់ទៅទៀត ប្រសិនបើអ្នកមានបញ្ហាអាស៊ីតហើយអ្នកញុំាខ្ទឹមសពេលដែលអ្នកមិនទាន់មានអាហារចូលពោះ។

២.ជៀសវាងញុំាខ្ទឹមស ប្រសិនបើក្រពះរបស់អ្នកងាយប្រតិកម្ម

អ្នកដែលមានបញ្ហាខ្សោយក្រពះ ឬក្រពះងាយប្រតិកម្មក៏ជាផ្នែកមួយដែលគួរជៀសវាងញុំាខ្ទឹមសផងដែរ ពីពញរោះការទទួលទានខ្ទឹមសអាចបណ្ដាលឱ្យឈឺក្រពះ ដូច្នេះហើយ បើអ្នកមិនចង់រត់ចូលបន្ទប់ម្តងហើយម្តងទៀត យល់ល្អអ្នកគួរតែនៅឱ្យឆ្ងាយពីខ្ទឹមស។

៣.អ្នកមានបញ្ហាដង្ហើម ឬមានក្លិនមាត់

ចំពោះអ្នកដែលមានបញ្ហាក្លិនមាត់ និងក្លិនខ្លួន អ្នកគួរតែនៅឱ្យឆ្ងាយពីខ្ទឹមស ជៀសវាងញុំាខ្ទឹមសហើយធ្វើឱ្យខ្យល់ដង្ហើមរបស់អ្នកមានក្លិនមិនល្អ។

៤.កុំពិសារខ្ទឹមសច្រើនពេក ប្រសិនបើអ្នកកំពុងប្រើប្រាស់ថ្នាំបញ្ចុះឈាម

ថ្នាំ Anticoagulants ដែលត្រូវបានគេស្គាល់ថាជាថ្នាំបញ្ចុះឈាម ហើយភាគច្រើនត្រូវបានគេប្រើប្រាស់ចំពោះអ្នកមានជំងឺបេះដូង។ ដូច្នេះអ្នកដែលកំពុងប្រើប្រាស់ថ្នាំបញ្ចុះឈាមមិនគួរទទួលទានខ្ទឹមសច្រើនពេកនោះទេ។

គួរជម្រាបថា ខ្ទឹមសមិនមែនជាអាហារអាក្រក់ ឬបង្កគ្រោះថ្នាក់ដល់មនុស្សគ្រប់គ្នានោះទេ។ ជាការពិតណាស់ ខ្ទឹមសគឺល្អសម្រាប់អ្នកដែលមិនមានបញ្ហាសុខភាព ហើយវាធ្វើឱ្យប្រសើរឡើងនូវប្រព័ន្ធភាពសុំា កាត់បន្ថយសម្ពាធឈាមខ្ពស់ និងជួយកាត់បន្ថយកម្រិតកូឡេស្ដេរ៉ុល។ មួយវិញទៀត ខ្ទឹមសក៏មានលក្ខណៈសមម្បត្តិអង់ទីប៊ីយ៉ូទិក ដែលជួយប្រឆាំងនឹងការឆ្លងមេរោគ។