ផ្អែកទៅតាមការលើកឡើងរបស់អ្នកគ្រូពេទ្យ ង៉ែត គឹមសយ ឯកទេសផ្នែកឆ្មប និងមានបទពិសោធន៍ជាង១០ឆ្នាំ នៅអង្គការម៉ារីស្តូបផ្នែករោគស្ត្រី ពន្យារកំណើត និងរំលូត និងគ្លីនិក SP ធ្លាប់ពន្យល់ប្រាប់មកកាន់ក្រុមការងារចាបបៃតងឱ្យដឹងថា ចំពោះវ៉ាកសាំងមហារីកមាត់ស្បូននេះគឺ អាចចាក់បានទាំងស្រីទាំងប្រុស ប៉ុន្តែប្រសិនជាចាក់ក្នុងវ័យកាន់តែក្មេងប្រសិទ្ធិភាពកាន់តែខ្ពស់ ជាពិសេសក្នុងវ័យដែលមិនទាន់ឆ្លងកាត់ការរួមភេទតែម្តង។

ចំពោះប្រភេទវ៉ាក់សាំងការពារមហារីកមាត់ស្បូននេះ បច្ចុប្បន្នគឺមានពីប្រភេទដែលគេប្រើប្រាស់៖

១.  Gardasil ៤ ការពារបានមេរោគ HPV ១៦,១៨ដែលបង្កទៅជាជំងឺមហារីកមាត់ស្បូន ញឹកញាប់ជាងគេ រហូតដល់ទៅប្រមាណជា៧០% និងការពារមេរោគHPVប្រភេទ ៦ និង១១ ដែលបង្កទៅជាជំងឺ សិរមាន់។ ចំពោះតម្លៃនៃការចាក់វ៉ាក់សាំងប្រភេទនេះបច្ចុប្បន្នអាចខ្ទង់ចន្លោះពី 85$ ទៅ 150$ ក្នុងម្តង អាស្រ័យនៅតាមមន្ទីរពេទ្យនីមួយៗ។

២. Gardasil ៩ ការពារជំងឺមហារីកប្រពន្ធ័បន្តពូជ និងជំងឺសិរមាន់ អាចការពារទៅលើមេរោគ HPV ប្រភេទ ១៦,១៨,៦,១១, ៣១,៣៣,៤៥,៥២ និង ៥៨។ ចំពោះវ៉ាក់សាំងប្រភេទ Gardasil ៩ ត្រូវបានគេសង្កេតឃើញថា មានប្រសិទ្ធខ្ពស់ជាង Gardasil ៤ ប៉ុន្តែសម្រាប់តម្លៃក៏ខ្ពស់ជាងដែរ ដោយគិតចាប់ពីខ្ទង់200$ឡើង ក្នុងការចាក់ម្តង។

សម្រាប់ដំណាក់នៃការចាក់វ៉ាក់សាំងការពារមហារីនេះ ត្រូវបានគេគិតទៅតាមអាយុដោយ៖

- អាយុ ៩-១៤ ឆ្នាំ ចាក់២ដង (០,៦-១២ ខែ) បានន័យថា ចាក់លើកទី២ គឺចន្លោះពេល ៦ទៅ ១២ខែ ក្រោយពីចាក់លើកទី១។

- អាយុលើសពី ១៤ឆ្នាំ ត្រូវចាក់៣ដង (0, ១-២, ៦ខែ) បានន័យថា លើកទី២ គឺចាក់ចន្លោះ១ទៅ ២ខែ ក្រោយចាក់លើកទី១ ចំណែកលើកទី៣ គឺចាក់៦ខែក្រោយពីលើកទី ១៕

អត្ថបទដោយ៖​ ប៉ាវ ភក្តី