ជាធម្មតា​វដ្ដរដូវរបស់មនុស្សស្រីគឺមិនដូចគ្នានោះទេ។ក៏ប៉ុន្ដែ​មនុស្សស្រីស្ទើរតែ១០០ភាគរយហើយ ជួបប្រទះបញ្ហានៃការឈឺចុកចាប់ពេលមករដូវ​ មានបញ្ហារដូវមកតិចៗ មានបញ្ហារាំងរដូ​វប្រចាំខែជាដើម។

អាស្រ័យហេតុនេះហើយ ក្រុមការងារចាបៃតងនឹងធ្វើការចែករំលែករបៀបញុំាអាហារនៅអំឡុងពេលបងប្អូនស្រីៗរដូវ ដើម្បីទៅជួយបំបាត់បញ្ហាឈឺចុកចាប់ និងធ្វើឱ្យរដូវមកស្រួលឆាប់អស់ នេះបើយោងតាមរយៈប្រភព clevelandclinic.org។ ដោយក្នុងនោះវេជ្ជបណ្ឌិត McClure បានចែករំលែកថា នៅពេលដែលមករដូវស្រីៗភាគច្រើនប្រាកដជាមិនបានដឹងច្បាស់លាស់ទេ ថាគួរញុំាអាហារណា គួរផឹកភេសជ្ជៈនោះតែមិនត្រូវនោះទេ។ ដូច្នេះអាចធ្វើឱ្យប៉ះពាល់ដល់រោគសញ្ញានៃការរដូវកាន់តែអាក្រក់ មានន័យថាបើកំពុងឈឺចុក អាចឈឺកាន់តែខ្លាំងមិនងាយបាត់ ហើយប្រឈមនឹងមានបញ្ហាលើសជាតិស្ករ ឡើងទម្ងន់ឬក៏ប្រែប្រួលអារម្មណ៍ខ្លាំងខុសធម្មតា ដែលមិនអាចគ្រប់គ្រងបានព្រោះមានចំណែករបបអាហារចូលរួមដូចគ្នា។ បន្ថែមលើសពីនេះ ប្រសិនណាស្រីៗចង់បំបាត់ការឈឺចុកចាប់ តាតឹងមួរម៉ៅ ឈឺក្បាល អស់កម្លាំង ស្លេកស្លាំងខ្លាំងព្រោះហូរឈាមរដូវច្រើន។ គេណែនាំឱ្យស្រីៗញុំាអាហារដូចជា មានបន្លែបៃតង គ្រាប់ធញ្ញជាតិ ដំឡូងជ្វា ស្ពៃក្តោបក្រហម ខាត់ណាខៀវ ផ្លែប៊ឺរី ផ្លែប័រ ផ្លែប៉ោម ខ្ទឹមស ខ្ទឹមក្រហម តែបៃតង សាច់មាន់ សាច់ត្រី ស៊ុត…ជាដើម ព្រោះអាហារទាំងនេះសម្បូរដោយ ដោយសារធាតុចិញ្ចឹមល្អៗសម្រាប់អ្នកកំពុងមករដូវ ដូចជាវីតាមីន A, C, និង E ក៏ដូចជាសេលេញ៉ូម ស័ង្កសី និងបេតាការ៉ូទីនជាដើម ជាពិសេសផឹកទឹកឱ្យបានគ្រប់គ្រាន់ ទឹកធម្មតាក៏បាន ទឹកក្ដៅឧណ្ហៗក៏បាន។​ ស្រីៗគួរញុំាមិនគួររំលង បើញុំាមិនបានទាំងអស់ ក៏មានចំណែកអាហារទាំងអស់ខាងលើនេះខ្លះដែរ ក្នុងរបបអាហាររបស់អ្នកពេលមករដូវ៕

អត្ថបទដោយ៖​ ធីតា