ផ្អែកតាមប្រភពចេញផ្សាយ express បានបង្ហាញឱ្យដឹងថា ចំពោះប្រភេទសាច់កែច្នៃដូចជា សាច់ជ្រូកបន្ទះ,ប្រហិត, សាច់ក្រក, សាច់កំប៉ុង ឬសាច់កែច្នៃផ្សេងៗទៀត អាចបង្កជាដើមហេតុដែលនាំឱ្យកើតជំងឺមហារីកពោះវៀន។

ដោយហេតុថា សាច់ប្រភេទនេះផ្ទុកទៅដោយសារ អំបិល សារធាតុរក្សាទុកបានយូរ និងសារធាតុមួយចំនួនផ្សេងទៀតដែលជះឥទ្ធិពលធំទៅដល់ប្រព័ន្ធរំលាយអាហារ។ សូម្បីតែអ្នកជំនាញក៏ព្យាយាមណែនាំទៅកាន់អ្នកដែលនិយមញុំាដែរថា ឱ្យទទួលទាននូវអាហារប្រភេទនេះ និងសាច់ក្រហម មិនឱ្យលើសពី ៩០ ក្រាមក្នុងមួយថ្ងៃ ឬកាត់បន្ថយមកញ៉ាំត្រឹម ៧០ក្រាម ឬតិចជាងនេះ។

គួរបន្ថែមទៀតដែរថា ហានិភ័យនៃជំងឺមហារីកពោះវៀន ត្រូវបានគេរកឃើញថា មនុស្សវ័យចំណាស់មានអាយុចាប់ពី៦០ឡើង ងាយប្រឈមជាងគេ ដែលទទួលរងឥទ្ធិពលអាក្រក់នៃរបបអាហារមិនល្អកាលពីក្មេងមក។ ជាមួយគ្នានេះផងដែរ ជាង ៩០% នៃអ្នកជំងឺមហារីកពោះវៀន ត្រូវបានសង្កេតឃើញមានរោគសញ្ញាមួយចំនួនដូចជា៖ នោមញឹកញាប់, ហូរទឹករំអិល, ជួនកាលឈឺពោះ, បន្ទោរបង់មានឈាម (អាការស្រដៀងនឹងជំងឺឫសដូងបាត), មានអារម្មណ៍មិនសូវស្រលះក្នុងខ្លួន, ងាយហើម ចុក ឆ្អល់ពោះបន្ទាប់ពីញ៉ាំអាហារ, ជួនកាលបណ្តាលឱ្យបាត់បង់ចំណង់អាហារ និងស្រកទម្ងន់ ដោយគ្មានមូលហេតុ៕

អត្ថបទដោយ៖ ប៉ាវ ភក្តី