ជំងឺទឹកនោមផ្អែម ជាប្រភេទជំងឺរ៉ាំរ៉ៃ អាចបង្កឲ្យមាន ផលវិបាកធ្ងន់ធ្ងរ ចំពោះសុខភាព ប្រសិនបើ អ្នកជំងឺមិនបាន ទទួលការព្យាបាល ឲ្យបានត្រឹមត្រូវនោះទេ ។ អ្នកជំងឺទឹកនោមផ្អែម ច្រើនមានបញ្ហាដំបៅ ជាពិសេសនៅត្រង់ប្រអប់ជើង ឬត្រង់ម្រាមដៃតែម្ដង ។ ដំបៅប្រភេទនេះ អាចនឹងរីករាលដាលធំឡើងៗ ព្រមទាំងមានសភាព ធ្ងន់ធ្ងរ រហូតដល់ពេលខ្លះ គ្រូពេទ្យត្រូវបង្ខំចិត្ត ធ្វើការវះកាត់(កាត់ជើង ឬម្រាមដៃដែលមានដំបៅចេញ) ។
ជំងឺទឹកនោមផ្អែម បានធ្វើឲ្យ ខូចខាតដល់ ប្រព័ន្ធសរសៃប្រសាទ និងជាលិកា ដែលជាមូលហេតុនាំឲ្យ មានការស្ពឹក និងគ្មានការឈឺចាប់ ជាពិសេសនៅពេលដែល មានដំបៅកើតឡើង នៅត្រង់ជើង ប្រអប់ជើង ឬត្រង់ម្រាមដៃជាដើម ។
យោងតាមគេហទំព័រWebmd មានវិធីសាស្រ្តចំនួន៣ ដែលអ្នកជំងឺទឹកនោមផ្អែម គួរធ្វើ ដើម្បីធ្វើឲ្យដំបៅឆាប់ជាសះស្បើយ និងមិនរីករាលដាល កាន់តែធ្ងន់ធ្ងរ ។
១. លាងសម្អាតដំបៅរាល់ថ្ងៃ៖ ការលាងសម្អាត គឺជារឿងដ៏សំខាន់ ចំពោះដំបៅទឹកនោមផ្អែម ។ លោកអ្នក អាចលាងសម្អាត ជាមួយទឹកសេរ៉ូមប្រៃ និងទឹកថ្នាំសំលាប់មេរោគ ។ ករណីនេះ លោកអ្នកគួរចៀសវាង ការត្រាំជើង ឬដៃដែលមានដំបៅ ជាមួយទឹកអំបិល ឬទឹកថ្នាំផ្សេង ព្រោះវាអាចធ្វើឲ្យ ដំបៅមិនងាយជាសះស្បើយឡើយ ។
២. ត្រូវរុំដំបៅ៖ លោកអ្នកចាំបាច់ត្រូវ រុំដំបៅជាមួយស្បៃស្អាត ឲ្យបានជិតល្អ តែមិនត្រូវរុំតឹងណែន រហូតមានសម្ពាធខ្លាំង ទៅលើដំបៅនោះទេ ។ ការធ្វើបែបនេះ គឺដើម្បីចៀសវាង ការបង្ករោគ និងជួយឲ្យដំបៅ ឆាប់បានជាសះស្បើយ ។
៣. គ្រប់គ្រងកម្រិតជាតិស្ករ៖ អ្នកជំងឺទឹកនោមផ្អែម ដែលកើតមានដំបៅ មិនថានៅត្រង់ប្រអប់ជើង ឬត្រង់ម្រាមដៃទេ ការគ្រប់គ្រងកម្រិតជាតិស្ករ ឲ្យមានស្ថេរភាពល្អ គឺជារឿងដ៏សំខាន់បំផុត ។ ប្រសិនបើ កម្រិតជាតិស្ករ មិនត្រូវបានគ្រប់គ្រង ឲ្យបានល្អនោះទេ បំបៅទឹកនោមផ្អែម គឺមិនងាយជាសះស្បើយនោះទេ ។
អ្នកជំងឺទឹកនោមផ្អែម អាចងាយប្រឈម កើតមានដំបៅ ជាពិសេសនៅត្រង់ ប្រអប់ជើង ឬត្រង់ម្រាមដៃ ហើយអ្នកជំងឺអាចមិនដឹងខ្លួនផង ព្រោះភាគច្រើន វាមិនបង្កឲ្យ មានការឈឺចាប់នោះទេ ។ ដូចនេះ សូមឧស្សាហ៍ត្រួតពិនិត្យមើល ជាពិសេស ចំពោះអ្នកជំងឺទឹកនោមផ្អែមដែលមានវ័យចំណាស់ ៕
អត្ថបទដោយ៖ ហួ ភារ៉ា