វេជ្ជបណ្ឌិតជំនាញ បានចេញព្រមានពីគ្រោះថ្នាក់ ក្រោយពីមាននិន្នាការល្បីបន្ទាប់ពីវីដេអូចែករំលែកក្នុងតិចតុកយកក្រេមលាបបបូរមាត់ទៅលាបលើត្របកភ្នែក ដើម្បីឱ្យមានអារម្មណ៍ស្វាង ស្រស់ថ្លា មិនឱ្យងងុយគេងទោះត្រូវរៀនដល់យប់ជ្រៅក៏ដោយ ផ្អែកតាមការឱ្យដឹងពីDaily mail នៅថ្ងៃទី៣០មីនា ឆ្នាំ២០២៣កន្លងមក។
វីដេអូចែករំលែកពីការលាបក្រេមលើបបូរមាត់លើត្របកភ្នែកនេះ បានចែកចាយដំបូងតាំងពីឆ្នាំ២០១០ ដែលបុរសម្នាក់បានយកលាបបបូរមាត់ឈ្មោះថា Burt's Bees ទៅលាបជុំវិញរវង្វង់ភ្នែករបស់គាត់ ដើម្បីបង្កើនអារម្មណ៍ឱ្យនៅតែស្វាង ឬស្រវឹងក៏នៅតែមានអារម្មណ៍ដឹងស្មារតីធម្មតា។ បន្ទាប់ពីវីដេអូចែករំឡែកជាយូរមកមកហើយនោះ បានផ្ទុះឡើងវិញជាថ្មីដោយមានអ្នកចូលមើលជាច្រើនលានអ្នក អ្នកខ្លះប្រើក្រេមតែ១ចែកគ្នាលាប ថតវីដេចែករំលែកបន្តគ្នាជាបន្តបន្ទាប់។
ដោយមានប្រតិកម្មប្រឆាំងពីវេជ្ជបណ្ឌិតជំនាញក៏បានចេញមកព្រមានគ្រោះថ្នាក់ ដែលធ្វើបែបនេះ អាចធ្វើឱ្យងាយរលាកត្របកភ្នែក ងាយឆ្លងមេរោគ មានហានិភ័យដល់ការមើលឃើញផងដែរ។ ក្រេមលាបមាត់ Burt's Bees Beeswax Lip Balm ជាផលិតផលបែបបុរាណដែលមានសារធាតុផ្សំពីជីអង្កាម អាចលាបលើបបូរមាត់ធ្វើឱ្យមានមានអារម្មណ៍ត្រជាក់ប្រហើរ។ ដោយសារហេតុនេះ ទើបលាបនៅលើត្របកភ្នែក ធ្វើឱ្យមានអារម្មណ៍ស្រស់ស្រាយ ត្រជាក់ប្រហើរដែរ។ ម្យ៉ាងវិញទៀត វាក៏មានផ្ទុកសារធាតុ menthol ផងដែរ។ សារធាតុទាំងពីរនេះនឹងផ្តល់នូវប្រសិទ្ធភាពត្រជាក់នៅពេលលាប ដែលអាចធ្វើអោយមនុស្សមានអារម្មណ៍ស្វាងជាងមុន។
ជាមួយគ្នានេះ វេជ្ជបណ្ឌិត Mike Balgemann អ្នកជំនាញខាងភ្នែកនៅរដ្ឋ Illinois បានប្រាប់ DailyMail ថាសារធាតុ menthol ផ្តល់ឱ្យភ្នែកនូវឥទ្ធិពលត្រជាក់ពីធម្មជាតិនៃជាតិអាល់កុលរបស់វា។ ទោះជាយ៉ាងណាក៏ដោយ នោះគ្រាន់តែជាឥទ្ធិពលបណ្តោះអាសន្នប៉ុណ្ណោះ ដែលវាអាចធ្វើឱ្យស្ទះសរសៃឈាម និងធ្វើឱ្យភ្នែកស្ងួតជាមួយនឹងការប្រើប្រាស់ដដែលៗ។ សារធាតុ menthol ចូលទៅក្នុងភ្នែក ជាទូទៅគ្រាន់តែធ្វើឱ្យភ្នែករលាក និងអាចធ្វើឱ្យហូរទឹកភ្នែក។ ត្របកភ្នែកគឺស្តើងបំផុតនៃ វាមានលក្ខណៈរសើបខ្លាំង និងងាយប៉ះពាល់ខ្លាំងណាស់។
លោកវេជ្ជបណ្ឌិត Balgemann បាននិយាយថា ប្រសិនបើសារធាតុចូលទៅក្នុងភ្នែក វាអាចបង្កើនហានិភ័យនៃជំងឺដក់ទឹកក្នុងភ្នែក ភ្នែកឡើងបាយ និងការឆ្លងមេរោគ។ មួយវិញទៀត ការប្រើក្រេមលាបបបូរមាត់បន្តគ្នាពៅអ្នកដទៃ ទៅលាបលើភ្នែក ងាយស្រួលក្នុងការឆ្លងមេរោគទៅភ្នែក ប្រសិនបើបបូរមាត់នរណាម្នាក់មានកើតជំងឺរើម វាក៏អាចឆ្លងទៅភ្នែក ការបង្កមេរោគណាមួយក៏ដោយ វាសុទ្ធតែអាចបង្កហានិភ័យដល់ការមើលឃើញផងដែរ។
អ្នកជំនាញបានឱ្យដឹងផងដែរថា គ្រប់គ្នាអាចជឿជាក់និងប្រើប្រាស់វាលាបបែបនេះ ដោយគិតថាគ្មានបញ្ហាដោយសារនៅលើក្រែមបានដាក់ថា ផ្សំពីធម្មជាតិ១០០% ប៉ុន្តែគួរឱ្យដឹងថាមិនមែនគ្រប់ធម្មជាតិទាំងអស់សុទ្ធល្អឬគ្មានផលប៉ះពាល់លើភ្នែកនោះទេ៕
អត្ថបទដោយ៖Senghong
