១. ថែរក្សាស្បែកឱ្យបានទៀងទាត់៖ វាជាបញ្ហាមួយដែលមិនអាចប្រកែកបាន ស្ត្រីក្រោយពេលសម្រាលកូនរួច ស្បែកច្រើនតែមានបញ្ហា ដូចជា ខ្មៅ ក្រិន ឡើងមុន ឬឡើងសង្វារ ជាដើម។ ដូច្នេះម៉ាក់ៗគួរសម្អាតផ្ទៃមុខជារៀងរាល់ថ្ងៃ (២–៣ ដង អាស្រ័យលើសភាពស្បែក) ដើម្បីកាត់បន្ថយជាំខ្មៅ និងការឡើងមុន។ ក្រៅពីនេះ ការលាបឡេការពារកម្ដៅថ្ងៃជាប្រចាំក៏សំខាន់ណាស់ដែរ ដើម្បីការពារស្បែកពីពន្លឺព្រះអាទិត្យដែលវាអាចបណ្ដាលទៅជា ជាំខ្មៅ ក្រហម ឬជ្រីវជ្រួញ។ អ្នកក៏អាចជ្រើសប្រើផលិតផលថែរក្សាស្បែកដែលមានវីតាមីន C ឬជាតិប្រឆាំងអុកស៊ីតកម្ម ដើម្បីជួយឱ្យស្បែកភ្លឺស្អាត និងស្រស់ថ្លាឡើងវិញ។

២. គេងឱ្យបានគ្រប់គ្រាន់៖ ការគេងគឺជាថ្នាំព្យាបាលសម្រស់តាមបែបធម្មជាតិ។ ម៉ាក់ៗគួរគេងឱ្យបាន ៧ ទៅ ៨ ម៉ោងក្នុងមួយថ្ងៃ។ ការគេងឱ្យបានគ្រប់គ្រាន់ជួយឱ្យស្បែកភ្លឺរលោង និងកាត់បន្ថយភាពស្លក់ជ្រីវជ្រួញនៅក្រោមភ្នែក។ ប្រសិនបើគេងមិនគ្រប់ គឺអាចធ្វើឱ្យស្បែកស្ងួត និងមានភាពជ្រីវជ្រួញ ធ្វើឱ្យឆាប់ចាស់ជាងវ័យថែមទៀត។

៣. របបអាហារមានតុល្យភាព៖ អាហារល្អជាគន្លឹះនាំឱ្យមានសុខភាពល្អ និងជាជំនួយដល់សម្រស់។ ម៉ាក់ៗគួរទទួលទានអាហារដែលមានជីវជាតិគ្រប់ប្រភេទដូចជា បន្លែ ផ្លែឈើ ត្រី សាច់ និងគ្រាប់ធញ្ញជាតិ។ ការផឹកទឹកឱ្យបានគ្រប់គ្រាន់ក៏សំខាន់ដែរ ដើម្បីឱ្យស្បែកស្រស់ស្អាត មានសំណើម និងរក្សាសុខភាពរបស់រាងកាយទាំងមូល។

៤. ហាត់ប្រាណទៀងទាត់៖ ការហាត់ប្រាណមិនត្រឹមតែជួយឱ្យរាងកាយរឹងមាំទេ ប៉ុន្តែថែមទាំងជួយឱ្យឈាមរត់បានល្អ ការពារជំងឺបេះដូង និងជំងឺលើសឈាម។ វាក៏ជួយបំបាត់អារម្មណ៍តានតឹង និងស្រ្តេស ដែលជាកត្តាធ្វើឱ្យបាក់សម្រស់ផងដែរ។ ទោះជាហាត់ស្រាលៗដូចជា ដើរលំហែ ឬហាត់យូហ្គា ក៏អាចផ្តល់អត្ថប្រយោជន៍យ៉ាងច្រើនដែរ។

៥. ពិគ្រោះជាមួយវេជ្ជបណ្ឌិតសើស្បែក៖ បើម៉ាក់ៗជួបប្រទះបញ្ហាស្បែកធ្ងន់ធ្ងរ ឬបញ្ហាដែលថែរក្សាដោយខ្លួនឯងមិនបានប្រសើរ ការទៅជួបវេជ្ជបណ្ឌិតសើស្បែកគឺជាជម្រើសល្អបំផុត។ ការពិគ្រោះជាមួយអ្នកជំនាញនឹងជួយរកដំណោះស្រាយត្រឹមត្រូវ និងឆាប់បានលទ្ធផល។

ក្រោយសម្រាលកូន ការថែរក្សាសម្រស់ត្រូវការពេលវេលា អត់ធ្មត់ និងការយកចិត្តទុកដាក់។ ទោះមិនអាចស្រស់ស្អាតដូចមុន ១០០% ក៏ដោយ ប៉ុន្តែប្រសិនបើអនុវត្តគន្លឹះទាំង ៥ ដូចដែលបានណែនាំ អ្នកអាចស្ដារវិញបានយ៉ាងហោចណាស់ ៧០ ទៅ ៨០%។ គន្លឹះសំខាន់គឺ ត្រូវជឿជាក់ លើកទឹកចិត្ត និងថែរក្សាសុខភាពខ្លួនឯងជាប្រចាំ៕

អត្ថបទដោយ៖ សារួ