ប្រេងដូង គឺជារបស់ដែលគេប្រើសម្រាប់មនុស្សគ្រប់វ័យ ព្រោះវាផ្ដល់ឱ្យនូវអត្ថប្រយោជន៍ជាច្រើនដល់មនុស្ស។ តាមលោក Joshua Zeichner, MD នាយកស្រាវជ្រាវផ្នែកគ្រឿងសំអាង និងព្យាបាលរោគសើស្បែកនៅមន្ទីរពេទ្យ Mount Sinai ក្នុងទីក្រុងញូវយ៉កបានបញ្ជាក់ថា ប្រេងដូងមានធាតុផ្សំពិសេសនៃខ្លាញ់ធម្មជាតិ ដែលធ្វើឱ្យវាមានប្រយោជន៍ក្នុងការព្យាបាលស្បែក ។ គាត់និយាយថា អាស៊ីតខ្លាញ់ទាំងនេះរួមមានអាស៊ីត linoleic (ដែលអាចមានប្រយោជន៍សម្រាប់ ស្បែកដែលងាយនឹងកើតមុន) និងអាស៊ីត lauric រហូតដល់ 50% (ដែលផ្តល់ជាតិទឹកនិងប្រឆាំងនឹងមេរោគ) ។
តាមរយៈវេបសាយ The Health Site បានចែករំលែកអត្ថប្រយោជន៍ចំនួន ៧ របស់ប្រេងដូងដែលអាចធ្វើឱ្យស្បែកស្អាត និងសក់ភ្លឺរលោង។
១. ជាឱសថធម្មជាតិសម្រាប់កម្ចាត់ស្នាមមុន៖ ប្រេងដូងមានលក្ខណៈសម្បិត្តិប្រឆាំងបាត់តេរី និងប្រឆាំងការរលាកដែលអាចជួយកាត់បន្ថយស្នាម ជាំ និងស្នាមមុន។ វិធីប្រើ គ្រាន់តែលាបប្រេងដូងស្ដើងៗនៅលើផ្ទៃមុខរបស់អ្នក ហើយទុកវាចោលមួយយប់ នោះអ្នកនឹងអាចសម្គាល់ឃើញថាស្លាកស្នាមចាប់ផ្ដើមរលុប សូម្បីតែពណ៍ស្បែកក៏ភ្លឺជាងមុនដែរ។
២. ជួយឱ្យស្បែកភ្លឺថ្លា៖ ដើម្បីធ្វើបែបនេះបាន អ្នកត្រូវយកស្ករ កាហ្វេ និងប្រេងដូងខ្លះមកច្របល់ចូលគ្នារួចហើយយកមកលាបនៅលើស្បែក។ ជាទូទៅ ការម៉ាស្សាស្បែក នឹងជួយអ្នកកម្ចាត់កោសិកាងាប់ចេញ ហើយផ្តល់សំណើមដល់ស្បែក។ អ្នកនឹងឃើញស្បែកទន់រលោងភ្លឺថ្លាតាមពេលវេលាដែលអ្នកប្រើប្រាស់។
៣. ធ្វើជាទឹកជូតគ្រឿង Makeup៖ ប្រេងដូងអាចលុបគ្រឿង Makeup បានស្អាតល្អ អាចជ្រាបចូលទៅដល់ស្រទាប់យ៉ាងជ្រៅនៃស្បែក ផ្ដល់សារធាតុចិញ្ចឹមដល់ស្បែក ដោយគ្រាន់តែលាបវាត្រឹមតែ ២ ទៅ ៣ ដំណក់នៅលើមុខហើយចាប់ផ្ដើមម៉ាស្សាថ្នមៗ រួចយកក្រណាត់ជ្រលក់ទឹកក្ដៅតិចៗមកជូនមុខរបស់អ្នកដើម្បីទទួលបានស្បែកមុខដែលស្អាតនិងមានសុខភាពល្អ។
៤. ធ្វើក្រែមលាបមាត់ DIY៖ ប្រសិនបើអ្នកកំពុងប្រឈមនឹងបញ្ហាបបូរមាត់ស្ងួត ប្រេះ ប្រេងដូងអាចដើរតួជាស្ក្រាប់ធម្មជាតិជួយជម្រុះកោសិកាដែលងាប់ធ្វើឱ្យបបូរមាត់របស់អ្នកត្រឡប់មកជាទន់ ដោយគ្រាន់តែយកវាមកក្នុងបរិមាណតិចតួចលាយជាមួយស្ករដើម្បីបំបាត់ស្នាមតាមធម្មជាតិ។ វានឹងជួយឱ្យបបូរមាត់អ្នករលោង ទន់ និងមានសំណើម ដោយមិនចាំបាច់ប្រើក្រែមលាបបបូរមាត់ឡើយ។
៥. ធ្វើជាប្រេងលាបសក់៖ ប្រសិនបើអ្នកមានបញ្ហាសក់ជ្រុះ និងបែកចុង ប្រេងដូងគឺល្អបំផុត។ យកប្រេងដូងបន្តិចមកកំដៅវាបន្តិច រួចម៉ាស្សាលើស្បែកក្បាល។ ទុកវាចោលយ៉ាងតិច 30 នាទី បន្ទាប់មកលាងចេញជាមួយនឹងសាប៊ូកក់សក់។
៦. ប្រេងដូងសម្រាប់សុខភាពក្រចក ស្បែក៖ មិនថាតែផ្ទៃមុខ សក់ ទេតែក្រចក ស្បែក របស់អ្នកក៏វាសមនឹងទទួលបានការថែទាំដែរ។ បន្តក់ប្រេងដូង ២ ទៅ ៣ ដំណក់ជារៀលរាល់ថ្ងៃ ដើម្បីការពារស្បែកស្ងួត និងប្រេះ។ បន្ថែមពីនេះវាក៏ជំរុញដល់ការលូតលាស់របស់ក្រចក និងជួយធ្វើឱ្យក្រចករឹងមាំផងដែរ។ នៅពេលព្យាយាមធ្វើបែបនេះ អ្នកនឹងមានអារម្មណ៍ថាដៃរបស់អ្នកទន់ ក្រចករបស់អ្នកនឹងមានសុខភាពល្អជាងមុន។
៧. ប្រេងដូងជាសំណើមធម្មជាតិ៖ ប្រេងដូងមានគុណភាព ផ្តល់សំណើមដល់ស្បែកយ៉ាងជ្រៅ ហើយវាក៏គ្មានសារធាតុគីមីផងដែរ។ ចង់បានស្បែកស មានសំណើម។ យកប្រេងដូង ២ ឬ ៣ ដំណក់ ហើយចាប់ផ្តើមម៉ាស្សាវានៅលើដៃ និងដងខ្លួនរបស់អ្នក។ អ្នកនឹងសម្គាល់ឃើញលទ្ធផលជាមួយនឹងការប្រើប្រាស់ជាប្រចាំ៕ អត្ថបទដោយ៖ កញ្ញា សារួ