មនុស្សស្រីមិនថា ស្ថិតនៅក្នុងវ័យណាក្តី តែងតែមានក្តីបារម្ភចម្បង២សម្រាប់សុខភាពជីវិត ទី១ គឺរូបសម្រស់ ចំណែកទី២ទៀតនោះ គឺខ្លាចធ្លាក់ខ្លួនឈឺជំងឺកាចសាហាវ។ ផ្សារភ្ជាប់ជាមួយនឹងជំងឺផងដែរ បងប្អូនប្រិយមិត្តអ្នកប្រាដកជាដឹងហើយថា មនុស្សស្រីងាយប្រឈមមុខងាយគេលើបញ្ហារោគស្ត្រីធំៗដូចជា មហារីកសុដន់ និងមហារីកស្បួន។
ទាក់ទិននឹងរឿងរ៉ាវងាយកើតមានចំពោះស្ត្រីខាងលើ ថ្ងៃនេះ Healthy Cambodia នាំពាំនូវសារចែករំលែកពិសេសពីក្រុមគ្រូពេទ្យជំនាញមកពី Prestige Hospital (មន្ទីរពេទ្យ ដឹ ប្រេស្ទីហ៌្ស) បង្ហាញពីតិចនិកចំនួន៨ ប្រសិនបើអនុវត្តន៍រាល់ថ្ងៃ ប្រាកដជាទទួលបានរូបរាងស្អាត ថែមទាំងអាចការពារជំងឺមហាររីកសុដន់ទៅពេលខាងមុខផងដែរ។
យ៉ាងមិញមុននឹងចូលដល់ចំណុចដំណោះស្រាយបង្ការទាំង៨ Healthy Cambodia បង្វែរអារម្មណ៍ប្រិយមិត្តអ្នកអានមកដឹងពីការពន្យល់បកស្រាយរបស់ក្រុមគ្រូពេទ្យជាមុនសិនថា តើអ្វីទៅជាជំងឺមហារីកសុដន់? ហេតុអ្វីបានជាជំងឺមហារីកដោះមានគ្រោះថ្នាក់? តើជំងឺមហារីកសុដន់មានរោគសញ្ញាអ្វីខ្លះ?
តាមរយៈការបកស្រាយរបស់អ្នកជំនាញបានលើកឡើងថា ជំងឺមហារីកសុដន់ គឺជាជំងឺមហារីកមួយដែលភាគច្រើនកើតឡើងចំពោះស្រ្តីហើយមានអត្រាអ្នកស្លាប់ខ្ពស់នៅទូទាំងពិភពលោក និងបន្តកើនឡើងជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះដោយសារតែកង្វះការយល់ដឹងពីស្ត្រីគ្រប់វ័យ។ ជំងឺមហារីកសុដន់ គឺជាជំងឺមួយស្មុគស្មាញ ដែលកោសិកាសុដន់លូតលាស់ខុសធម្មតាដែលមិនអាចគ្រប់គ្រងបាន។ មហារីកសុដន់មានច្រើនប្រភេទអាស្រ័យទៅលើកោសិកាដែលប្រែទៅជាមហារីក។
រោគសញ្ញាទូទៅបំផុតនៃជំងឺមហារីកសុដន់គឺមាន ដុំ ឬ ម៉ាសថ្មី ប៉ុន្តែស្របពេលគ្នានេះ រោគសញ្ញាផ្សេងទៀតក៏អាចកំពុងលេចឡើងផងដែរ។ វាជាពិតជាមានសារសំខាន់ខ្លាំងណាស់ ដែលត្រូវធ្វើការទាមទារពិនិត្យដោយវេជ្ជបណ្ឌិតឯកទេស ប្រសិនបើមានការផ្លាស់ប្តូររូបរាងសុដន់ ឬមិនមានភាពប្រក្រតី។ ខាងក្រោមនេះគឺជារោគសញ្ញាទូទៅមួយចំនួនដែលយើងអាចជួបប្រទះ៖
- មានដុំពក ឬ ឡើងក្រាស់ ដែលមានអារម្មណ៍ខុសពីជាលិកាធម្មតាដែលនៅជុំវិញ
- ផ្លាស់ប្តូរ ទំហំ រូបរាង ឬលក្ខណៈរបស់សុដន់
- ផ្លាស់ប្តូរស្បែកលើសុដន់ដូចជា ឡើងជ្រួញ
- មានការប្រែប្រួលទៅលើក្បាលសុដន់
- ស្បែកសុដន់អាចឡើងក្រហម ឬមានហើម ប្រហាក់ប្រហែលដូចជាផ្លែក្រូចជាដើម
មហារីកសុដន់មិនមែនជាជំងឺឆ្លង ឬអាចឆ្លងពីមនុស្សម្នាក់ទៅមនុស្សម្នាក់នោះទេ ។ រហូតមកដល់ពេលនេះ គេមិនទាន់រកឃើញថាមានមេរោគឬបាក់តេរីណាមួយដែលជាប់ទាក់ទងនឹងការវិវត្តនៃជំងឺមហារីកសុដន់ឡើយ។ ភាគច្រើននៃជំងឺនេះកើតឡើងចំពោះស្រ្តីដែល៖ មានអាយុលើសពី៤០ឆ្នាំ, ស្រ្តីដែលលើសទម្ងន់, ហានិភ័យចំពោះស្រ្តីដែលផឹកគ្រឿងស្រវឹងច្រើន, មានប្រវត្តិគ្រួសារធ្លាប់កើតជំងឺមហារីក,សុដន់មានប្រវត្តិក្នុងការប៉ះពាល់វិទ្យុសកម្មខ្លាំង, មានប្រវត្តិទាក់ទងនឹងជំងឺបន្តពូជ, ប្រើប្រាស់ថ្នាំជក់ច្រើន, ប្រើប្រាស់ថ្នាំព្យាបាលអរម៉ូនក្រោយពេលអស់រដូវ។ អាស្រ័យហេតុនេះហើយ ក្នុងទិសដៅកាត់បន្ថយ ក៏ដូចជាបង្ការហានិភ័យនៃជំងឺមហារីកសុដន់ទៅថ្ងៃមុខនារីៗគ្រប់រូបគួរអនុវត្តន៍តាមវិធីខាងក្រោម៖
១. រក្សាទម្ងន់ក្នុងកម្រិតមួយដែលល្អ
២. ត្រូវហាត់ប្រាណ លេងកីឡា ដើម្បីជំរុញរាងកាយឲ្យសកម្ម
៣. ត្រូវញាំបន្លែ ផ្លែឈើ ជាប្រចាំ
៤. ជៀសវាងការផឹកគ្រឿងស្រវឹង ឬ ប្រើប្រាស់ថ្នាំជក់ផ្សេងៗ
៥. ពន្យារការបំបៅដោះកូន
៦. ជៀងវាងប្រើប្រាស់ថ្នាំពន្យារកូន ជាពិសេសចំពោះស្រ្តីមានអាយុលើស៣៥ឆ្នាំ
៧. ជៀសវាងប្រើប្រាស់ថ្នាំអរម៉ូនផ្សេងៗ
៨. ជៀសវាងការប៉ះពាល់ទៅនឹងវិទ្យុសកម្មខ្លាំង
បន្ថែមជាមួយគ្នាផងដែរថា ការពិនិត្យរកមហារីកសុដន់ ត្រូវបានក្រុមពេទ្យជំនាញបញ្ជាក់ថាមានវិធីសាស្ត្រផ្សេងៗជាច្រើនដូចជា ការប្រើប្រាស់ម៉ាស៊ីន Mammogram, Ultrasound និង MRI លើសុដន់ជាដើម។ ប្រសិនបើអ្នកមានរោគសញ្ញាដែលអាចមានសង្ស័យថាមានមហារីកសុដន់ អ្នកនឹងត្រូវធ្វើតេស្តបន្ថែមទៀតដើម្បីដឹងឲ្យច្បាស់ថាវាជាជំងឺមហារីកឬយ៉ាងណា ។ ការធ្វើកោសល្យវិច័យត្រូវបានធ្វើនៅពេល ថតកាំរស្មីអ៊ិច និងការធ្វើតេស្តរូបភាពផ្សេងៗទៀត ឬការពិនិត្យលើរូបរាងកាយ ដែលអាចបង្ហាញពីការផ្លាស់ប្តូរទ្រង់ទ្រាយសុដន់ដែលអាចជាជំងឺមហារីក។ វាគឺជាវិធីតែមួយគត់ដើម្បីដឹងច្បាស់ថាតើវាជាមហារីកឬយ៉ាងណា។
ជារួមមកវិញសម្រាប់អត្ថបទមួយនេះ នឹងមិនមែនល្អមានអត្ថប្រយោជន៍ល្អសម្រាប់តែមនុស្សស្រីនោះទេ ចំពោះបុរសគ្រប់រូបក៏គួរតែយល់ដឹងបន្ថែមផងដែរ ដើម្បីរក្សាទុកជាចំណេះដឹងបន្ថែមសម្រាប់ណែនាំបន្តទៅកាន់មនុស្សជាទីស្រលាញ់របស់លោកអ្នកមិនថា ភរិយា បងប្អូន មីង អ៊ុំ ឬ កូនចៅ នៅថ្ងៃនេះ និងទៅពេលខាងលើមុខ ក្នុងទិសរួមចំណែកកាត់បន្ថយការកើតជំងឺកាចហាវ «មហារីកសុដន់»។
សម្រាប់ព័ត៌មានបន្ថែម ដើម្បីធ្វើការណាត់ជួបពិគ្រោះយោបល់ជាមួយវេជ្ជបណ្ឌិតជំនាញទូទៅ និងវេជ្ជបណ្ឌិតឯកទេស បងប្អូនប្រិយមិត្តអ្នកអានអាចទំនាក់ទំនងតាមលេខ ០២៣ ២៦៦ ៩៩៩/០៨៥ ៦៨៩ ៥៦៨/០៦៧ ៦៨៩ ៥៦៨។ ឬអាចទៅកាន់ទីតាំងផ្ទាល់ដែលមាន អាស័យដ្ឋានផ្ទះលេខ ១៦ និង ១៨ ផ្លូវ ២១ ជិតផ្សារកាប់គោ(វិមានឯករាជ្យ) សង្កាត់ទន្លេបាសាក់ ខណ្ឌចំការមន រាជធានីភ្នំពេញ៕
