បញ្ហាធាត់ ឬលើសទម្ងន់ ត្រូវបានអ្នកជំនាញនៅជុំវិញពិភពលោកចាត់ចូលជារឿងគ្រោះថ្នាក់ចម្បងកើតមានចំពោះសុខភាពមនុស្ស ខណៈអត្រានៃការជំងឺធាត់នៅលើពិភពលោកកើនឡើងទ្វេដងចាប់តាំងពីឆ្នាំ ១៩៨០ មកម្ល៉េះ និងបន្តកើនឡើងកាន់តែច្រើនបន្តបន្ទាប់ទៀតមកទល់នាពេលបច្ចុប្បន្ននេះ។
ផ្សារភ្ជាប់ជាមួយនឹងបញ្ហាលើសទម្ងន់នេះ មានបុគ្គលច្រើនណាស់ដែលកំពុងខកចិត្តនឹងខ្លួនឯង ដែលមានរូបរាងមិនស្អាតលើសខ្លាញ់ស្ទើរតែគ្រប់សរីរាង្គនៃដងខ្លួនទាំងមូល និងថែមទាំងរកវិធីដោះស្រាយមិនចេញថែមទៀត។ យ៉ាងណាមិញ ជាដំណោះស្រាយមួយផ្នែកនៅក្នុងការជួយរកផ្លូវសម្រកទម្ងន់ឱ្យបានសម្រេចគោលដៅ បើផ្អែកទៅតាមការចែករំលែករបស់អ្នកគ្រូ វ៉ា សុខលីម ជាគ្រូបង្វឹកផ្ទាល់ខ្លួន (Personal Wellness Coach) បានលើកឡើងនូវបទពិសោធន៍ផ្ទាល់ខ្លួនរបស់អ្នកគ្រូប្រាប់មកកាន់ក្រុមការងារចាបបៃតងឱ្យដឹងថា អ្នកគ្រូក៏មានប្រវត្តិជាអ្នកលើសទម្ងន់ម្នាក់ផងដែរ ហើយអ្នកគ្រូក៏ធ្លាប់មានទម្លាប់មិនល្អដែលបង្កឱ្យឡើងគីឡូ និងធ្លាប់អនុវត្តន៍វិធីសាស្ត្រខុសដែលតែងតែធ្វើឱ្យខ្លួនឯងបរាជ័យលើការសម្រកទម្ងន់ថែមទៀត។
អ្នកគ្រូ វ៉ា សុខលីម បានបកស្រាយជាចំណុចៗឱ្យដឹងថា កត្តាចម្បងដែលជាដើមហេតុធ្វើឱ្យអ្នកគ្រូលើសទម្ងន់នោះគឺបណ្ដាលមកពី៖
១. ចូលចិត្តញុំាអាហារដែលមានរសជាតិដិតៗ ដូចជា ប្រៃ ផ្អែម ផ្អាប់
២. ញុំាគ្រឿងកំប៉ុងភេសជ្ជៈផ្អែមៗច្រើនក្នុងមួយថ្ងៃ
៣. ញុំារបស់ខ្លាញ់ បំពង ហើយចូលចិត្តញុំាមីកំប៉ុងពេលយប់
៤. អ្នកគ្រូ ជាមនុស្សម្នាក់មិនចូលចិត្តហាត់ប្រាណទេ...។
ក្រោយមកពីពេលដែលអ្នកគ្រូចាប់ផ្តើមលើសទម្ងន់ទៅៗពីមួយថ្ងៃទៅមួយថ្ងៃអ្នកគ្រូក៏ចាប់ផ្តើមស្វែងរកវិធីសាស្ត្រសម្រកគីឡូដោយខ្លួនឯងតែក៏ត្រូវបរាជ័យដោយ៖
១. ពុំយល់ពីចំណេះដឹងក្នុងការរៀបចំអាហារឲ្យត្រឹមត្រូវ
២. ញុំាផលិតផលគ្មានប្រភពច្បាស់លាស់ ដោយមិនមានការណែនាំច្បាស់លាស់ពីអ្នកមានបទពិសោធន៍ក្នុងការសម្រកគីឡូ
៣. ចង់បានលទ្ធផលលឿនពេក ប្រើប្រាស់វិធីផ្លូវកាត់ដូចជា បង្អត់អាហារ ញុំាតែផ្លែឈើសុទ្ធ លាយរូបមន្តខ្លួនឯងផ្តេសផ្តាស់ និងអត់ហូបអាហារពេលព្រឹក...ជាដើម។
យ៉ាងណាមិញ បន្ទាប់ពីអនុវត្តន៍នូវវិធីសាស្ត្រដែលពុំទទួលបានលទ្ធផលទាំងនោះមក អ្នកគ្រូ វ៉ា សុខលីម បានរកឃើញនូវវិធីសាស្ត្រថ្មី និងសុវត្ថិភាព ចំនួន៧ចំណុចខ្លឹម ធ្វើឱ្យអ្នកស្រកអស់រហូតដល់ទៅ៨គីឡូឯណោះ៖
១. ញុំាអាហារពេលព្រឹក និងពេលល្ងាច ជាប្រភេទអាហារដែលមានកាឡូរីទាប
២. ញុំាទឹកធម្មតាឱ្យបានគ្រប់គ្រាន់ ២ ទៅ ៣ លីត្រក្នុងមួយថ្ងៃ
៣. ត្រៀមអាហារសម្រន់ពេលឃ្លាន ដូចជា ផ្លែឈើ គ្រាប់ធញ្ញជាតិ ពងទាស្ងោរ....
៤. កាត់បន្ថយអាហារប្រៃ ផ្អែម ផ្អាប់ ខ្លាញ់ និងភេសជ្ជៈផ្អែមៗ
៥. ឆ្លៀតពេលហាត់ប្រាណខ្លះៗ ដូចជា រត់ រំា ជួនកាលទៅក្លឹបហាត់ប្រាណ ទៅតាមពេលវេលាផ្ទាល់ខ្លួន នឹងអ្វីដែលខ្លួនចូលចិត្ត
៦. ត្រូវតាំងចិត្តធ្វើឱ្យបានទៀងទាត់ ជាមួយនឹងភាពរីករាយ
៧. ចូលរួមសិក្ខាសាលាពីសុខភាពបន្ថែម ឬស្តាប់ការចែករំលែកតាមរយៈអនឡាញតាមផេកផ្លូវការដែលចែករំលែកពីចំណេះដឹងសុខភាព ដើម្បីបង្កើនចំណេះដឹងថ្មីៗ...។
ជាសរុបមក អ្នកគ្រូ វ៉ា សុខលីម ប្រាប់បន្ថែមថា អ្វីដែលអ្នកគ្រូបានចែករំលែកនេះ ជាបទពិសោធន៍ផ្ទាល់ខ្លួនពិតដែលអ្នកគ្រូឆ្លងកាត់ និងទទួលបានលទ្ធផលដែលមានដូចក្នុងសព្វថ្ងៃនេះ ដូច្នេះសម្រាប់បងប្អូនដែលកំពុងតែលើសគីឡូ ចូរស្វែងរកវិធីសាស្ត្រណា ដែលមិនប៉ះពាល់ដល់សុខភាព មានការពន្យល់ណែនាំច្បាស់លាស់ពីរបបអាហារនៃការញុំា ព្រោះមានតែចំណេះដឹងរបបអាហារទេ ដែលអាចថែទំាសុខភាព និងរូបរាងយើងបានជារៀងរាល់ថ្ងៃ៕
អត្ថបទដោយ៖ ប៉ាវ ភក្តី