វិធីសាស្ត្រនៅក្នុងការតមអាហារត្រូវបានគេបែងចែកជាច្រើនប្រភេទច្រើនរូបភាពផ្សេងៗគ្នា ដោយពឹងផ្អែកទៅលើរាងកាយរបស់អ្នកសម្រកទម្ងន់គ្រប់រូបជាមួយរបបអាហារសុខភាព គ្មានជាតិស្ករ ប្រៃ ខ្លាញ់ ដែលបង្កឱ្យធាត់ឡើយ។ ដោយឡែក បើទោះបីជារបបអាហារសុខភាពខ្លាំងកម្រិតណាក្តី ក៏មានបុគ្គលមួយចំនួនគាត់នៅតែមានបញ្ហាស្រកយឺត ឬស្រកហើយឡើងមកវិញ ប្រសិនបើហ៊ានតែញុំាខុសតែ១ពេល។

ផ្សាភ្ជាប់ជាមួយនឹងបញ្ហាខាងលើ ថ្ងៃនេះផងដែរ Healthy Cambodia នឹងយកនូវក្បួនតមអាហារចំនួន៥យ៉ាងដកស្រង់ចេញពីគេហទំព័រ medicalnewstoday ដោយក្បួនទាំងនេះត្រូវបានគេជឿថា មានប្រសិទ្ធភាព និងទទួលបានផលលឿនបំផុតក្នុងរយៈខ្លី៖

១. តមអាហារ ១២ម៉ោងក្នុង១ថ្ងៃ៖ ការតមអាហាររយៈពេល ១២ម៉ោងក្នុង១ថ្ងៃនេះ គឺមិនតម្រូវឱ្យញុំាអ្វីទាំងអស់នៅចន្លោះម៉ោង ៧យប់ ដល់ម៉ោង៧ព្រឹក។តែអាចញុំាទឹកបាន។

២. តមអាហារ ១៦ម៉ោងក្នុង១ថ្ងៃ៖ ចំពោះក្បួននេះភាគច្រើនគេកំណត់ឱ្យមនុសស្សប្រុសតមអាហាររយៈពេល ១៦ម៉ោង ចំណែកឯស្ត្រីអាចតមត្រឹមតែ១៤ម៉ោងក្នុង១ថ្ងៃ។ ក្បួនតមនេះ តម្រូវឱ្យឈប់ញុំាអ្វីទាំងអស់ចាប់ពីម៉ោង៨យប់ រហូតដល់អាហារថ្ងៃត្រង់ នាថ្ងៃបន្ទាប់តែម្តង។

៣. តមអាហារ ២ថ្ងៃក្នុង១សប្តាហ៍៖ ក្បួនតមនេះត្រូវបានគេស្គាល់ថា ជាប្រភេទក្បួនអាហារ ៥:២ ដោយក្នុងរយៈ៥ថ្ងៃ ត្រូវបរិភោគបរិមាណស្តង់ដារ (របបអាហារសុខភាព) និងកាត់បន្ថយការទទួលទានកាឡូរីនៅ ២ថ្ងៃទៀត។ មានន័យថា ក្នុងអំឡុងពេលនៃការតមអាហារ ២ថ្ងៃ ចំពោះបុរសជាទូទៅទទួលទានត្រឹមតែ ៦០០កាឡូរី និងស្ត្រីទទួលទានបានត្រឹមតែ ៥០០កាឡូរីបានហើយ។

៤. តមអាហារឆ្លាស់ថ្ងៃ៖ ការតមអាហារថ្ងៃឆ្លាស់ថ្ងៃគ្នា (១ថ្ងៃញុំាអាហារស្តង់ដារនិង១ថ្ងៃទៀតកាត់បន្ថយកាឡូរី) គឺជាក្បួនសម្រាប់អ្នកពិបាកនៅក្នុងការកាត់បន្ថយរបបអាហារ ដោយនៅក្នុងថ្ងៃដែលតមនោះ ត្រូវកំណត់ញុំាតែ ៥០០ កាឡូរីប៉ុណ្ណោះ។

៥. Fasting ២៤ម៉ោងប្រចាំសប្តាហ៍៖ ការតមអាហារទាំងស្រុងរយៈពេល ១ ឬ២ថ្ងៃក្នុងមួយសប្តាហ៍ ត្រូវបានគេស្គាល់ថាជា ការមិនបរិភោគអាហាររយៈពេល ២៤ម៉ោងប្រចាំសប្តាហ៍ ដោយគម្រោងរបបអាហារនៅក្នុងថ្ងៃតមនោះមានតែ ទឹក តែ និងភេសជ្ជៈដែលគ្មានកាឡូរីផ្សេងទៀត។

គូសបញ្ជាក់បន្ថែមដែរថា​ ចំពោះក្បួនតមទាំង៥ខាងលើនេះ ចំពោះអ្នកដែលមានបញ្ហាសុខភាព ឬជាអ្នកជំងឺក្រពះ ពោះវៀន មុននឹងជ្រើសក្បួនណាមួយមកអនុវត្តន៍ត្រូវមានការប្រឹក្សាយោបល់ឱ្យបានច្បាស់ពីក្រុមអ្នកជំនាញ កុំទទួលទានតាមចិត្តខ្លួនឯង ព្រោះវាអាចនឹងធ្វើឱ្យស្ថានភាពជំងឺប្រចាំកាយកាន់តែវិវត្តន៍ទៅរកស្ថានភាពមិនល្អក្នុងលក្ខខណ្ឌកាន់របបអាហារខុសក្បួន៕

អត្ថបទដោយ៖ ប៉ាវ ភក្តី