យោងតាមអង្គការសុខភាពពិភពលោក (WHO) បញ្ជាក់ថា មហារីកមាត់នេះនាំឱ្យប៉ះពាល់ដល់បបូរមាត់ អណ្តាត ឬបំពង់កជាដើម។ ជំងឺនេះភាគច្រើនកើតលើបុរស និងមនុស្សវ័យចំណាស់ដោយសារកត្តាផឹកស្រាច្រើន និងការជក់បារី។ ខាងក្រោមនេះជាសញ្ញាព្រមានចំនួន ៤ អ្នកអាចកើតជំងឺមហារីកមាត់៖
១. ដំបៅមាត់៖ ការដំបៅមាត់កម្រជាសះស្បើយក្នុងរយៈពេលពីរសប្តាហ៍អាចជាសញ្ញាព្រមាននៃជំងឺមហារីកមាត់។ ដំបៅមាត់ជាធម្មតាវាជាសះស្បើយយ៉ាងឆាប់រហ័សបំផុត។ ដំបៅទាំងនេះអាចលេចឡើងនៅលើបបូរមាត់ អញ្ចាញធ្មេញ ឬនៅខាងក្នុងថ្ពាល់ ហើយអាចហូរឈាម និងបណ្តាលឱ្យមិនខ្លួនស្រួលជាដើម។ ចូរអ្នកពិនិត្យមើលដំបៅក្នុងមាត់របស់អ្នកឱ្យបានទៀងទាត់ ដើម្បីរកមើលការខូចខាតឬមានសញ្ញាអ្វីខ្លះដើម្បីការពារជាមុន។
២. ស្ពឹកនិងឈឺចាប់ក្នុងមាត់យូរ៖ ការឈឺចាប់យូរ រាងស្ពឹកៗ មានអារម្មណ៍ក្ហាយក្នុងមាត់ បំពង់ក ឬបបូរមាត់អាចបណ្តាលមកពីជំងឺមហារីកមាត់។ សញ្ញាទាំងនេះច្រើនតែច្រឡំថាជាបញ្ហាធ្មេញ ឬសរសៃប្រសាទ។ ការស្ពឹកអណ្តាត ឬថ្គាមអាចជាសញ្ញាការដុំសាច់ដុះ។ អ្នកគួរយកចិត្តទុកដាក់លើការឈឺចាប់នៅលើមុខ, ក, ឬមាត់ដែរ។
៣. ពិបាកលេប ឬទំពារ៖ការច្រាលជាតិអាស៊ីត ឬការឆ្លងអាចបណ្តាលឱ្យមានរោគសញ្ញាដូចជាពិបាកលេប ការទំពារ និងអណ្តាតគ្មានរសជាតិ ប៉ុន្តែពួកវាក៏ត្រូវបានផ្សារភ្ជាប់ទៅនឹងជំងឺមហារីកមាត់ផងដែរ។ អ្នកជំងឺអាចមានអារម្មណ៍ថាមានដុំក្នុងបំពង់ក ឬមានអារម្មណ៍ថាអាហារជាប់បំពង់ក។ បើរោគសញ្ញាទាំងនេះនៅតែបន្តកើតមានរយៈពេលយូរ អ្នកជំងឺគួរតែទៅជួបគ្រូពេទ្យជាបន្ទាន់។
៤. ដង្ហើមមានក្លិនអាក្រក់ជាប់រហូត៖ មហារីកមាត់អាចបណ្តាលឱ្យមានក្លិនមាត់មិនល្អឬក្លិនស្អុយ។ ការរីកលូតលាស់កោសិកាមហារីកមាត់ ជាពិសេសក្នុងដំណាក់កាលលឿន វាអាចបញ្ចេញសារធាតុដែលរួមចំណែកដល់ក្លិនមាត់មិនល្អ។ ក្លិនមាត់មិនល្អជាប់រហូតនោះ វាអាចជាសញ្ញាដំបូងនៃជំងឺមហារីកមាត់ផងដែរ៕ យោងតាមគេហទំព័រ Vnexpress ៕ អត្ថបទដោយ៖ ទ្រ សុភាព