ថ្ងៃក្ដៅខ្លាំងណាស់! កុំភ្លេចផឹកភេសជ្ជៈ៣មុខនេះ ជួយបំពេញជាតិទឹក រសជាតិឆ្ងាញ់ ផឹកហើយស្រស់ស្រាយ

ឱ្យតែពេលថ្ងៃម្ដងៗចេញក្រៅ១នាទីមិនទាន់ទេ ដឹងតែបែកញើសជោកខ្លួនមិនខាន ។ ដូច្នេះហើយនៅអំឡុងខែក្ដៅបងប្អូនកុំភ្លេចរកភេសជ្ជៈផឹកឱ្យបានគ្រប់គ្រាន់ ដើម្បីជួយទៅបំពេញជាតិទឹកក្នុងរាងកាយ ការពារកុំឱ្យខ្សោះជាតិទឹក អស់កម្លាំង ឈឺក្បាលវិលមុខជាដើម ព្រោះតែនៅក្រោមកម្ដៅថ្ងៃយូរពេក។

អាស្រ័យហេតុនេះហើយ ដើម្បីការពារបញ្ហាសុខភាពកើតឡើងនៅអំឡុងខែក្ដៅ បងប្អូនអាចរកភេសជ្ជៈ3មុខនេះផឹកបានព្រោះអាចជួយធ្វើឱ្យបងប្អូនមានកម្លាំងមកវិញ ការពារខ្សោះជាតិទឹក ផឹកហើយធ្វើឱ្យអារម្មណ៍ស្រស់ស្រាយឡើងវិញ។

១.ទឹកធម្មតា៖ គឺមិនអាចខ្វះបានឡើយ មិនថាស្ថិតនៅរដូវណាក៏ដោយ កាន់តែត្រូវការខ្លាំងបន្ថែមទៀតនៅខែក្ដៅបែបនេះ។ អ្នកគួរតែទម្លាប់ផឹកទឹកគ្រប់គ្រាន់ បើមិនដូច្នេះទេ អាចប្រឈមនឹងខ្សោះជាតិទឹកក្នុងខ្លួនប្រឈមនឹង វិលមុខ ឈឺក្បាល អស់កម្លាំងឡើងមកជាដើម។ ព្រោះប្រសិនណាផឹកមិនបានគ្រប់ ហើយត្រូវនឹងរដូវនេះទៀត ប្រយ័ត្នមានបញ្ហាសុខភាពឡើយមក។

២.ទឹកអំពៅ៖ គឺមានជាតិស្ករ ដូច្នេះប្រសិនណាអ្នកកំពុងតែអស់កម្លាំង ក្ដៅខ្លាំង ពេលចេញក្រៅម្ដងៗអ្នកអាចជ្រើសទឹកអំពៅសម្រាប់ផឹកបាន ព្រោះវាមានរសជាតិឆ្ញាញ់ តម្លៃក៏សមរម្យ ផឹកហើយមានកម្លាំងមកវិញ ជាពិសេសយើងបានជួយលើស្ទួយបងប្អូនខ្មែរយើង​ ដែលពួកគាត់បានប្រកបរបរលក់ទឹកអំពៅផងដែរ។ បញ្ជាក់កុំផឹកច្រើនកែវពេក ព្រោះទឹកអំពៅមានជាតិស្ករ ប្រយ័ត្នលើសជាតិស្ករក្នុងឈាមវិញ។ លើសពីនេះសម្រាប់បងប្អូនដែលមានជំងឺគួរពិគ្រោះជាមួយពេទ្យជាមុនសិនព្រោះអ្នកមានជំងឺប្រចាំកាយខ្លះមិនអាចផឹកទឹកអំពៅបានទេ ដូចអ្នកលើសជាតិស្ករក្នុងឈាមស្រាប់ជាដើម។

៣.ទឹកដូង៖ ជាការពិតណាស់ ក្រៅពីទឹកអំពៅបងប្អូន​ អាចជ្រើសរើសយកទឹកដូងសម្រាប់ផឹកនារដូវក្ដៅនេះ ។ ព្រោះទឹកដូងគឺជាទឹកផ្លែឈើ ធម្មជាតិ ដែលមានរសជាតិឆ្ងាញ់ និងអាចផ្ដល់ជាតិទឹកបានច្រើនសម្រាប់រាងកាយរបស់បងប្អូនផងដែរ។ ក៏ប៉ុន្ដែសម្រាប់បងប្អូនដែលមានជំងឺគួរពិគ្រោះជាមួយពេទ្យជាមុនសិនព្រោះអ្នកមានជំងឺប្រចាំកាយខ្លះមិនអាចផឹកទឹកដូងបានទេ។

ជាចុងក្រោយនខែក្ដៅបែបនេះ សូមបងប្អូនពិសារទឹកឱ្យបានគ្រប់គ្រាន់ ២ទៅ៣លីត្រក្នុង១ថ្ងៃដើម្បីរក្សាជាតិទឹកក្នុងរាងកាយរបស់បងប្អូនបានល្អ ចៀសវាងមានបញ្ហាសុខភាពកើតមានឡើង។ មួយវិញទៀតក្រៅពីផឹកទឹកធម្មតា បងប្អូនអាចជ្រើសទឹកផ្លែឈើ២មុខខាងលើមកផឹកបាន រសជាតិឆ្ងាញ់ជួយសុខភាពទៀត៕