លោកចាវ សួរស្តី ម្ចាស់សិប្បកម្មកែច្នៃជលផលនេសាទចាវ សួស្តី បានមានប្រសាសន៍ថា កាលពីឆ្នាំ២០២២ មានការពិបាកមែនទែន មិនទាន់មានផលិតផលអ្វីលក់លើទីផ្សារនោះទេ។ ទើបតែឆ្នាំ២០២៣ សិប្បកម្មអាចមានលទ្ធភាពកែច្នៃ២ ទៅ៣តោន និងសម្រាប់ឆ្នាំ២០២៤បាន៤ ទៅ៥តោន សម្រាប់ផលិតផលទូទៅ។ ក៏ប៉ុន្តែសម្រាប់ឆ្នាំ២០២៥នេះ ក្រោយមានការឧបត្ថម្ភ ក្រោមគម្រោង CAPFISH-Capture លទ្ធភាពផលិតអាចគុណនឹង៤ឯណោះ។

ម្ចាស់សិប្បកម្មរូបនេះបានបញ្ជាក់ផងដែរថា ក្រោមគម្រោងឧបត្ថម្ភ CAPFISH-Capture មានការគាំទ្រសម្ភារ បរិក្ខារ៖ ម៉ាស៊ីនកិនម្សៅ ម៉ាស៊ីនសម្អាត ម៉ាស៊ីនវេចខ្ចប់ស្វ័យប្រវត្តិ ម៉ាស៊ីនខ្ចប់អ៊ុតបឺតខ្យល់ ម៉ាស៊ីនធ្វើ ស្រកាត្រី ម៉ាស៊ីនលាយផ្សំគ្រឿង ម៉ាស៊ីនបោះពុម្ពកាលបរិច្ឆេទ រានហាល ទូដាក់សំលៀកបំពាក់ ធុងក្លាសេទឹកកក ឡាបូលាងដៃ ម៉ាស៊ីនវិភាគសំណើមឌីជីថល ទែម៉ូមែត្រពិនិត្យគុណភាពសាច់។ ដែលការជួយឧបត្ថម្ភលើផ្នែកហិរញ្ញវត្ថុ និងបច្ចេកទេស សម្ភារៈបែបនេះនឹងជួយដល់សិប្បកម្មកែច្នៃ អាចមានលទ្ធភាពផលិតបានច្រើន។

ក្រោមការគម្រោង គម្រោង CAPFISH-Capture របស់អង្គការ UNIDO បានផ្តល់នូវការបណ្តុះបណ្តាលរៀបចំផែនការអាជីវកម្ម និងការគ្រប់គ្រងអាជីវកម្ម។​ ការបណ្តុះបណ្តាល និងការអនុវត្តគោលការណ៍សុវត្ថិភាពម្ហូបអាហារ «ស៊ី ខ្យូ អេស»​ការរចនាប្លង់សហគ្រាសឱ្យស្របតាមលក្ខខណ្ឌតម្រូវនៃវិញ្ញាបនបត្រ CQS,ការបណ្តុះបណ្តាលនិងការអនុវត្តផែនការ បរិស្ថាន និងសង្គមការអភិវឌ្ឍស្លាកសញ្ញាផលិតផល និងកម្រងព័ត៌មានអាជីវកម្ម និងការចូលរួមតាំងពិព័រណ៍ផលិតផលនិងផ្គូផ្គងអាជីវកម្មថ្នាក់ជាតិ។

សូមបញ្ជាក់ថា សមិទ្ធផលសហគ្រាសក្រោមការគាំទ្ររបស់គម្រោងត្រៀមទទួលបានវិញ្ញាបនបត្រ «ស៊ី ខ្យូ អេស» កម្រិតពេញលេញ,បង្កើនបរិមាណលក់ ៨៥%,បង្កើនប្រាក់ចំណូល ៨៥%,បង្កើតការងារថ្មីបាន ២៥% (ស្រី ៣៣%) និងបង្កើនអតិថិជនក្នុងស្រុកថ្មីចំនួន ២០ផងដែរ។