១. អ្នកបរិភោគអាហារស្រស់ៗ មានបន្លែការ៉ុត សាឡាត់ ផ្លែប៉េងប៉ោះ ផ្កាខាត់ណាខៀវ ផ្សិត និងម្ទេស​ប្លោក។ មានផ្លែឈើដូចជាផ្លែប័រ ផ្លែល្ហុង ផ្លែក្រូចថ្លុង ផ្លែចេក និងផ្លែឪឡឹក... ព្រោះប្រភេទអាហារបែបនេះ ជួយរំលាយជាតិខ្លាញ់ឱ្យអ្នកអាយុវែងផងដែរ។ តាមលោកយាយ Deborah Szekely មានអាយុ ១០២ឆ្នាំជាអ្នកហូបអាហារបួសហូបបន្លែហូបផ្លែឈើ ហើយហូបសាច់ម្តងម្កាលតែប៉ុណ្ណោះ។ ហើយគាត់ផឹកភេសជ្ជៈបៃតង និងទឹកខ្ញីជួយប៉ូវសុខភាពឱ្យស្រកគីឡូ និងការពារជំងឺផងដែរ។

២. ការចម្អិនអាហារដោយខ្លួនឯង៖ លោកតា Jack Van Nordheim មានអាយុ ១០១ឆ្នាំ។ អាថ៌កំបាំងធ្វើឱ្យគាត់មានអាយុវែង ព្រោះតែគាត់ចូលចិត្តចម្អិនអាហារនៅផ្ទះដោយខ្លួនឯងអស់រាប់សិនឆ្នាំមកហើយ។ ហើយគាត់ព្យាយាមហូបអាហារកែច្នៃតិចបំផុត ដើម្បីចៀសវាងជំងឺធ្លាក់ទឹកចិត្ត ជំងឺទឹកនោមផ្អែមប្រភេទទី២ ជំងឺមហារីក និងជំងឺបេះដូង។ តាមការសិក្សាឆ្នាំ ២០១៧នៅក្នុងទស្សនាវដ្តី International Journal of Nutrition and Physical Activity Behavior បានរកឃើញថា អ្នកចម្អិនអាហារនៅផ្ទះ ៥ដងក្នុងមួយសប្តាហ៍ជួយឱ្យអ្នកស្រកគីឡូដោយបន្ថែមផ្លែឈើ និងបន្លែឱ្យខ្លួនឯង ដើម្បីឱ្យអ្នកមានរាងស្អាត មានអាយុវែងដោយមានសុខភាពល្អ។

៣. ញ៉ាំល្មម ៨០%៖ តាមគោលការណ៍ជប៉ុនហូបអាហារត្រឹម ៨០% ជួយសម្រកគីឡូ ព្រោះរាងកាយប្រើប្រាស់អស់អាហារដែលអ្នកបានហូប។ តាមលោកវេជ្ជបណ្ឌិត Shigeaki Hinohara ដែលមានវ័យ ១០៥ឆ្នាំបានលើកឡើងថា អាហារពេលព្រឹក ខ្ញុំផឹកកាហ្វេ ទឹកដោះគោមួយកែវ និងទឹកក្រូចមួយស្លាបព្រាដាក់ជាមួយប្រេងអូលីវមួយស្លាបព្រា។ ពីព្រោះប្រេងអូលីវល្អសម្រាប់សរសៃឈាម និងរក្សាស្បែករបស់ខ្ញុំឱ្យមានសុខភាពល្អ។

លោកតាបានបន្តថា សម្រាប់អាហារពេលថ្ងៃត្រង់ ខ្ញុំមានទឹកដោះគោ និងខូគីពីរបី ឬគ្មានអ្វីសោះ មកពីខ្ញុំផ្តោតអារម្មណ៍លើកិច្ចការ ធ្វើឱ្យខ្ញុំមិនឃ្លានអាហារនោះទេ។ អាហារពេលល្ងាចមានបន្លែ ត្រី និងបាយបន្តិច ហើយពីរដងក្នុងមួយសប្តាហ៍ ដែលខ្ញុំហូបសាច់គ្មានខ្លាញ់ត្រឹម ១០០ ក្រាម។ គាត់មានរាងកាយរឹងមាំ និងសុខភាពផ្លូវចិត្តសន្តិភាព គាត់មិនបណ្តោយឱ្យខ្លួនក្លាយជាមនុស្សធាត់ទេ គាត់ហូបអាហារត្រឹមតែ ៨០%ប៉ុណ្ណោះ ដើម្បីអារម្មណ៍ល្អ និងសុខភាពរឹងមាំ៕ អត្ថបទដោយ៖ ទ្រ សុភាព