លោកយាយ Esther Wojcicki មានវ័យ ៨១ឆ្នាំ ជាអ្នកនិពន្ធសៀវភៅ How to Raise Successful People លក់ដាច់បំផុតមួយ។ លោកយាយមានកូនស្រីចំនួន ៣នាក់ ទី១មានឈ្មោះ Susan ជា CEO របស់ YouTube, ទី២កូនស្រី Janet ជាវេជ្ជបណ្ឌិត ហើយទី៣ កូនស្រី Anne ជាសហស្ថាបនិក និងជា CEO របស់ 23andMe ។ នេះជាមេរៀនរបស់គាត់ចិញ្ចឹមកូនទាំង ៣នាក់ទទួលបានភាពជោគជ័យកម្រិតនេះ៖

កុំយកផ្នត់គំនិតចាស់ហួសសម័យមកបំពាក់ឱ្យក្មេងជំនាន់ក្រោយមានអារម្មណ៍ភ័យខ្លាច។ ប្រជាជនខ្មែរមួយភាគធំ ការចិញ្ចឹមកូនមិនទាន់បានល្អប៉ុន្មានទេ មានដូចជា ស្រែកដាក់កូន បំភ័យកូន សម្លុតកូន និងនិយាយកុហកជាដើម។ សម្រាប់លោកយាយ Esther Wojcicki បានប្រាប់ថា “ខ្ញុំចិញ្ចឹមកូនបានជោគជ័យបែបនេះ ព្រោះតែខ្ញុំបង្រៀនកូនៗ ឱ្យយល់ពីការបរាជ័យក្នុងវិថីជីវិត។” គាត់តែងណែនាំកូនៗ មានចិត្តក្លាហានធ្វើរឿងឱ្យច្រើន ទោះបីបរាជ័យ កុំឱ្យកូនគិតថា វាជារឿងអាក្រក់ តែជារឿងល្អទៅវិញ។

ពេលកូនចេះដើរតិចៗ ហើយអ្នកខ្លាចកូនដើរដួលឈឺ ឱ្យកូនឈប់។ នេះជារបៀបចិញ្ចឹមកូនធំឡើងទន់ខ្សោយ។ ពេលកូនរពឹសខ្លាំង ហើយអ្នកស្រែកដាក់ខ្លាំងៗ ធ្វើឱ្យផ្លូវចិត្តក្មេងដកជាប់អារម្មណ៍នេះដល់ធំ។ សម្រាប់ខ្ញុំបានឆ្លងបទពិសោធន៍នេះ កាលពីតូចរួចមកហើយ។ បងប្អូនខ្ញុំម្នាក់ បានយកពស់មកបន្លាចខ្ញុំឡើងយំខ្លាំងមែនទែន រហូតដល់ពេលខ្ញុំអាយុ ២០ឆ្នាំជាងហើយ អារម្មណ៍ខ្លាចនេះតោងជាប់ក្នុងចិត្តនេះ។

តាមសារព័ត៌មាន CNBC ក៏បានចុះផ្សាយសម្តីរបស់លោកយាយ Wojcicki បញ្ជាក់ថា ពេលទុកចិត្តកូនឱ្យចេះធ្វើអ្វីៗ ដោយខ្លួនឯង ពួកគេតែមានអំណាច និងចេះដឹកនាំជីវិតដោយខ្លួនឯង។ ហើយតួនាទីខ្ញុំជាម្តាយ គ្រាន់តែណែនាំវិធីសាស្រ្ត និងជួយកូនៗ ពេលពួកគេជួបការលំបាកខ្លាំង។ ហើយខ្ញុំធ្វើវាជំនួស ឬធ្វើជាគំរូក៏មានដែរ។”

លោកយាយបានយល់យ៉ាងច្បាស់ថា ពេលកូនគាត់ធំឡើង ការបរាជ័យមានសម្បូរបែបនេះ ហើយត្រូវនឹងពាក្យខ្មែរបុរាណថា “ដំដែកទាន់នៅក្តៅ ប្រដៅកូនចៅទាន់ខ្លួននៅក្មេង។” ការពង្រឹងស្មារតីកូននៅតូច ដល់ធំឡើងពួកគេច្បាស់ជារឹងដៃ រឹងជើង ទោះបីបរាជ័យ ក៏ពួកគេចេះក្រោកងើបដោយខ្លួនឯងយ៉ាងរឹងមាំបំផុត។ សុភាសិតជប៉ុនបង្រៀនកូនៗ ពួកគេថា “បរាជ័យជារឿងធម្មតា” កុំឱ្យកូនពួកគេមានអារម្មណ៍ភ័យខ្លាចរហូតសំងំក្នុងបាតអណ្តូង គ្មានផ្លែផ្កាក្នុងជីវិតអ្វីសោះ៕ អត្ថបទដោយ៖ ទ្រ សុភាព

កូនស្រីទាំង ៣នាក់ក្លាយជាដឹកនាំក្រុមហ៊ុនធំៗ ទាំងពីរនាក់ និងវេជ្ជបណ្ឌិតម្នាក់