អង្គការសុខភាពពិភពលោក (WHO) បាននិយាយនៅថ្ងៃពុធ ១៣ ឧសភា ថាមេរោគដែលបង្កឡើងដោយ Covid-19 អាចនឹងឆ្លងរាលដាលដូចជាវីរុស HIV ដែលការព្រមាននេះធ្វើឡើងប្រឆាំងនឹងការព្យាករណ៍ដែលថាតើ Covid-19 នឹងរលាយបាត់នៅពេលណា នេះបើតាមសេចក្តីរាយការណ៍របស់ THE STRAITS TIMES នៅថ្ងៃព្រហស្បតិ៍នេះ។
អ្នកជំនាញផ្នែកសង្គ្រោះបន្ទាន់របស់ WHO លោក Mike Ryan បានប្រាប់សន្និសីទសារព័ត៌មានតាមអ៊ិនធឺណិតថា"វាចាំបាច់ណាស់ក្នុងការពិភាក្សាពីបញ្ហានេះ ព្រោះវីរុសនេះអាចនឹងក្លាយជាមេរោគឆ្លងផ្សេងទៀតនៅក្នុងសហគមន៍របស់យើងហើយវាអាចនឹងមិនរលាយបាត់ទៅណានោះទេ" ។
លោកបានបន្ថែមថា“ខ្ញុំគិតថាវាសំខាន់ណាស់ដែលយើងមានភាពប្រាកដនិយមហើយខ្ញុំមិនគិតថានរណាម្នាក់អាចព្យាករណ៍បានទេថាតើជំងឺនេះនឹងរលាយបាត់នៅពេលណា” ។
ទោះយ៉ាងណា លោក Mike បានបញ្ជាក់ថា “ពិភពលោកមានការគ្រប់គ្រងខ្លះៗទាក់ទងនឹងជំងឺនេះបានហើយយើងកំពុងខិតខំយ៉ាងខ្លាំងទៅលើវ៉ាក់សាំងដែលគេរំពឹងទុកថាត្រូវបានរកឃើញេ”។ ផងដែរ លោកបានពណ៌នាវាថាជាបាតុភូត “ចន្ទគ្រាសដ៏ធំ (Massive Moonshot)” ។
សូមជម្រាបជូនថា មកទល់នឹងបច្ចុប្បន្ន វ៉ាក់សាំងជាង ១០០ ប្រភេតកំពុងត្រូវបានបង្កើតឡើងដែលរួមមានការធ្វើតេស្តព្យាបាលជាច្រើន។ លោក Tedros Adhanom Ghebreyesus អគ្គនាយកអង្គការ WHO បានបន្ថែមថា“វាស្ថិតនៅក្នុងដៃរបស់យើង ហើយវាគឺជារឿងរបស់យើងទាំងអស់គ្នាក្នុងការចូលរួមចំណែកដើម្បីបញ្ឈប់ការរាតត្បាតនេះ” ។
យោងតាមរបាយការណ៍របស់ទីភ្នាក់ងារសារព័ត៌មាន Reuters បានអោយដឹង ថារដ្ឋាភិបាលនៅជុំវិញពិភពលោកកំពុងជជែកពីការបើកសេដ្ឋកិច្ចរបស់ពួកគេឡើងវិញ បើទោះបីជាវីរុសបានកំពុងឆ្លងដល់មនុស្សជិត ៤,៣ លាននាក់ និងបណ្តាលអោយមនុស្សស្លាប់ជាង ២៩១.០០០ នាក់ និងបន្តរីករាលដាល។
កាលពីថ្ងៃពុធ សហភាពអឺរ៉ុប (EU) បានជំរុញឱ្យមានការបើកព្រំដែនជាបណ្តើរៗ នៅទីតាំងដែលបានបិទដោយជំងឺរាតត្បាតប៉ុន្តែអ្នកជំនាញផ្នែកសុខភាពសាធារណៈនិយាយថាត្រូវមានការប្រុងប្រយ័ត្នខ្ពស់ដើម្បីចៀសវាងការផ្ទុះឡើងថ្មី។ លោកស្រី Maria van Kerkhove អ្នកជំនាញផ្នែកជំងឺរាតត្បាតរបស់ WHO បានប្រាប់សន្និសីទកាសែតថា“ យើងត្រូវដឹងថាវាត្រូវការពេលវេលាខ្លះ ដើម្បីចាកចេញពីជំងឺរាតត្បាតនេះ“៕
ប្រភព THE STRAITS TIMES
ប្រែសម្រួលដោយ ហៃ សុចិន្តា