គល់ស្លឹកគ្រៃ គឺជារុក្ខជាតិម៉្យាងដែលមានដើមកំណើតដំបូងគេមកពីប្រទេសឥណ្ឌា និងស្រីលង្ការ ហើយមកទល់នាពេលបច្ចុប្បន្ននេះ ក៏ត្រូវបានគេដាំដុះសាយភាយពាសពេញតំបន់អាស៊ីផងដែរ។ យ៉ាងណាមិញ បើនិយាយពីការប្រើប្រាស់នូវគល់ស្លឹកគ្រៃក្នុងប្រទេសកម្ពុជាវិញ ក្រៅពីយកទៅធ្វើគ្រឿងទេសបង់ក្នុងម្ហូប រុក្ខជាតិប្រភេទនេះ ក៏មានអត្ថប្រយោជន៍ក្នុងការជួយថែសុខភាពអ្នកទទួលទាន និងបង្ការបញ្ហាជំងឺមួយចំនួនថែមទៀត ប្រសិនបើគិតទៅតាមក្បួនវេជ្ជសាស្ត្របុរាណ។
ជាក់ស្តែងបើផ្អែកតាមរយៈប្រភព webmd បានលើកឡើងពីគុណប្រយោជន៍ពិតរបស់ស្លឹកគ្រៃឱ្យដឹងថា គ្រឿងទេសផ្ទះបាយ១មុខនេះ មានប្រយោជន៍ទាំងស្លឹកទាំងគល់ ដោយវាមានផ្ទុកនូវសារជាតិ កាល់ស្យូម វីតាមីន C ជាតិដែក ម៉ង់ហ្គាណែស...ដែលសុទ្ធសឹងតែជាសារធាតុពិសេសក្នុងការជួយទ្រទ្រង់ដល់សរីរាង្គ។ ហើយក្នុងលក្ខខណ្ឌចំពោះអ្នកមានបញ្ហាធុញធប់ ស្ត្រេសតប់ប្រមល់ក្នុងខ្លួន ការសាកល្បងពិសារតែគល់ស្លឹកក្តៅឧណ្ហៗ អាចជាជម្រើសដ៏ល្អបំផុតពីព្រោះថា ក្លិនធម្មជាតិដែលជះចេញពីតែ គួបផ្សំជាមួយនឹងសារជាតិដែលមានក្នុងស្លឹកគ្រៃ នឹងចូលទៅកាត់បន្ថយអាការអារម្មណ៍មិនល្អ សម្រួលដល់ចរន្តឈាមរត់។
លើសពីនេះទៅទៀត ប្រភេទតែក្តៅៗធ្វើចេញពីគល់ស្លឹកគ្រៃ ក៏អាចជួយបំបាត់រោគអាការឈឺចុកចាប់ពេលមករដូវ បង្ការការឆ្លងមេរោគផ្សិត ឬបាក់តេរីផ្សេងៗ កាត់បន្ថយការរលាក ឈឺសាច់ដុំ និងរោគគ្រេច-ថ្លោះ...បានដូចគ្នា។
ចំណែកឯលក្ខណៈពិសេសផ្សេងៗ ប្រសិនបើយោងតាមប្រភពបន្ថែម medicalnewstoday បានបង្ហាញពីលទ្ធផលនៃការសិក្សានៅឆ្នាំ ២០១៥ បានឱ្យដឹងដែរថា ការផឹកតែស្លឹកគ្រៃជាប្រចាំរយៈពេល ៣០ថ្ងៃ អាចបង្កើនកំហាប់អេម៉ូក្លូប៊ីន បរិមាណកោសិកា និងចំនួនកោសិកាឈាមក្រហមនៅក្នុងខ្លួន។ ចំពោះការលើកឡើងនេះ គឺយោងទៅតាមទិន្នន័យធ្វើតេស្តលើមនុស្ស ១០៥នាក់ ក្នុងរយៈពេលចន្លោះពី១០ទៅ៣០ថ្ងៃ ក្រោយពីបញ្ចប់ការសិក្សា។
ដោយឡែក ក្នុងទិសដៅណែនាំបន្ថែម សម្រាប់សក្តានុពលនៃស្លឹកគ្រៃក៏អាចជះផលមិនល្អមួយចំនួន ចំពោះអ្នកដែលកំពុងមានបញ្ហា ស្បែកងាយប្រតិកម្ម និងស្ត្រីមានផ្ទៃពោះ។ ដូច្នេះក្នុងករណីប្រសិនចង់ទទួលទាន ឬប្រើប្រាស់នូវប្រភេទផលិតណាមួយដែលផ្សំចេញពីស្លឹកគ្រៃ សូមពិគ្រោះជាមួយនឹងក្រុមគ្រូពេទ្យជាមុនសិន ចៀសវាងការកើតបញ្ហាធំដល់សុខភាព៕
អត្ថបទដោយ៖ប៉ែត ធីតា