មិនថាផ្នែកណាមួយនៃរាងកាយឡើយ ឱ្យតែមានការប្រែប្រួលសុទ្ធតែជាសញ្ញាដែលអ្នកគួរសង្កេត។ សូម្បីពណ៌ទឹកនោមរបស់អ្នកក៏ដូចគ្នា សុខៗស្រាប់តែមានការប្រែប្រួលពណ៌ខុសធម្មតាសុទ្ធតែជាសញ្ញា ដែលអ្នកមិនគួរព្រងើយកន្ដើយ វាអាចបង្ហាញពីស្ថានភាពសុខភាពតម្រងនោមឬក្រលៀន ប្លោកនោម ក្រពេញប្រូស្តាត និងអាចជាសញ្ញានៃជំងឺផ្សេងៗទៀតកើតលើរាងកាយអ្នកយ៉ាងស្ងប់ស្ងៀតផងដែរ។ ដូចដែលលោកអ្នកដឹងហើយថា ជំងឺតម្រងនោមជាជំងឺអ្នកមាន ត្រូវចំណាយពេលនិងលុយច្រើនណាស់ក្នុងការព្យាបាល ករណីធ្ងន់ធ្ងរអាចនឹងតម្រូវឱ្យមានការលាងឈាមឬប្តូរតម្រងនោមដើម្បីសង្គ្រោះជីវិត ហេតុនេះការដឹងមុន គឺជាមធ្យោបាយល្អបំផុតដែលអាចនាំអ្នកផុតពីគ្រោះថ្នាក់។

ផ្អែកតាមការចែករំលែកពីវេជ្ជបណ្ឌិត Aman Gupta ឯកទេសតម្រងនោម បានចែករំលែកពីការស្វែងយល់ពណ៌ទឹកនោម ក្នុងគេហទំព័រHealthshots ដែលមនុស្សគ្រប់គ្នាគួរយល់ដឹង៖

១ ពណ៌ទឹកនោមជាធម្មតា​វាមានពណ៌លឿងស្រាល

២ ពណ៌ក្រហម ឬមានឈាមតាមទឹកនោម មិនគួរប្រហែសឡើយ អាចជាសញ្ញាដំបូងនៃជំងឺមហារីកប្លោកនោមនិងក្រពេញប្រូស្ដាត(សម្រាប់បុរស) និងអាចមកពីមូលហេតុផ្សេងទៀតដូចជាការមានក្រួសនៅប្លោកនោម ឬផ្លូវទឹកនោមជាដើម។

៣ ពណ៌ផ្កាឈូក ឬពណ៌ទឹកក្រូចអាចបណ្តាលមកពីអាហារមួយពណ៌ណាមួយ ដែលមានក្នុងអាហារដែលអ្នកញ៉ាំដូចជាស្រកានាគក្រហម មើមយេន ឬមកពីការលេបថ្នាំដូចជា rifampicin និងpyridiumជាដើម ។ ប៉ុន្តែប្រសិនបើអ្នកសង្កេតឃើញថាខ្លួនឯងមិនបានទទួលទានអាហារមានពណ៌ខុសប្រក្រតីទេ ហើយមានពណ៌បែបនេះមិនបាត់គួរទៅជួបគ្រូពេទ្យ។

៤ ទឹកនោមគ្មានពណ៌អ្វីទាំងអស់ ពណ៌សថ្លា អាចបណ្ដាលមកពីអ្នកផឹកទឹកច្រើនពេក ឬលើសជាតិទឹក។

៥ ពណ៌ត្នោតក្រម៉ៅ អាចមកពីអ្នកលេបថ្នាំមួយចំនួន ហើយក៏អាចជាសញ្ញានៃជំងឺថ្លើមផងដែរ។

៦ ពណ៌ខៀវ ឬបៃតង ជាករណីកម្រអាចកើតឡើងក្រោយពីអ្នកវះកាត់ណាមួយ ឬជាការឆ្លងមេរោគតាមទឹកនោម។

៧ ករណីទឹកនោមមានដុំពក ពពុះ មានក្លិន អាចជាសញ្ញានៃការខ្វះជាតិទឹក ការឆ្លងមេរោគតាមទឹកនោម ។

ជាមួយគ្នានេះ ប្រភពដដែលក៏បានឱ្យដឹងពីវិធីក្នុងការថែរក្សាសុខភាពតម្រងនោម ឱ្យបានល្អប្រសិនបើអ្នកសង្កេតឃើញថាមានប្រែពណ៌ដំបូងៗ អ្នកអាចសង្កេតមើលអាហារដែលអ្នកញ៉ាំ និងទឹកដែលអ្នកផឹក មានតិចពេកឬច្រើនពេកទេ រួចសាកល្បងផ្លាស់ប្តូរវា។ ត្រូវចាំថាធ្វើម៉េចកុំឱ្យរាងកាយខ្វះជាតិទឹក ហើយសញ្ញាដែលអ្នកគួរឆាប់ទៅជួបគ្រូពេទ្យជំនាញនោះ ប្រសិនបើនៅមានឈាម ឬទឹកនោមពណ៌ក្រហម មានពពុះ គ្រើមៗ មានក្លិនមិនល្អ អមដោយការឈឺចាប់ណាមួយ គួរកុំទុកយូរ ត្រូវឆាប់ទៅពិនិត្យជាមួយគ្រូពេទ្យជំនាញឱ្យបានដឹងច្បាស់។ ការឆាប់ទៅជួបគ្រូពេទ្យ ក្នុងករណីថាប្រសិនបើអ្នកពិតជាមានបញ្ហាកើតឡើងលើតម្រងនោមមែន អាចទប់ស្កាត់កុំឱ្យមានបញ្ហាធ្ងន់ធ្ងរបានទាន់ពេលវេលា៕

អត្ថបទដោយ៖ Senghong