មានបងប្រុសម្នាក់បាននិយាយពិសោធន៍របស់ខ្លួនក្នុងការផឹកស្រាច្រើនពេក គាត់បានលើកឡើងថា លុយខំរករាប់ឆ្នាំត្រូវមកចំណាយព្យាបាលនឹងជំងឺតែពីរបីថ្ងៃតែប៉ុណ្ណោះ។ អ្នកឃើញទេ! ស្រាបំផ្លាញ់សុខភាពកម្រិតណាពេលផឹកវាជាប្រចាំថ្ងៃលើសកម្រិតនោះ។
ផ្អែកតាមការឱ្យដឹងពីប្រភព statista ប្រទេសកម្ពុជាបានជាប់ចំណាត់ថ្នាក់លេខរៀងទី៣ នៅក្នុងតំបន់អាស៊ីដែលមានប្រជាជនផឹកស្រាច្រើន ខណៈដែលប្រទេសឡាវជាប់លេខ២ និងប្រទេសវៀតណាមជាប់លេខ១។ តាមការសិក្សាគេបានរកឃើញថា ការទទួលទានគ្រឿងស្រវឹងកំពុងមានការកើនឡើងខ្លាំងនៅជុំវិញពិភពលោក ក្នុងនោះវៀតណាម កម្ពុជា និងឡាវបានឃើញការប្រើប្រាស់គ្រឿងស្រវឹងកើនឡើងពី ៤០ទៅ ៩០% ដែលជាចំនួនខ្ពស់បំផុតនៅអាស៊ី និងពិភពលោក។
យោងតាម WHO បានបញ្ជាក់ថា គ្រឿងស្រវឹងមិនមែនជាផ្នែកនៃរបបអាហារធ្វើឱ្យអ្នកមានសុខភាពល្អនោះទេ។ វានាំឱ្យកើតជំងឺកាចទាំង ៤នេះ ខូចថ្លើម មហារីក ជំងឺបេះដូង និងជំងឺផ្លូវចិត្ត។ ហើយអ្នកត្រូវចាំថា អាល់កុលតិចតួចតែងតែល្អសម្រាប់សុខភាពរបស់អ្នក ហើយគ្មានជាតិអាល់កុលសោះគឺល្អបំផុត។
យោងតាមរបាយការណ៍ពីអង្គការ Alcohol Rehab Guide, សារជាតិអាល់កុល គឺជា ឃាតកសម្ងាត់មួយ ខណៈWHOប៉ាន់ប្រមាណថាជាតិអាល់កុលនៅក្នុងគ្រឿងស្រវឹងនេះ បានសម្លាប់មនុស្ស៣លាននាក់នៅទូទាំងពិភពលោកជារៀងរាល់ឆ្នាំ។ លើសពីនេះ គ្រឿងស្រវឹងក៏ជាមូលហេតុនៃ ៥,៣%នៃការស្លាប់របស់មនុស្សក្នុងពិភពលោកជារៀងរាល់ឆ្នាំផងដែរ៕ អត្ថបទដោយ៖ ទ្រ សុភាព