១. ទម្លាប់គិតវិជ្ជមាន ទើបមានចិត្តតស៊ូតាមក្តីស្រមៃ៖ តាមលោកគ្រូ នឹម ឈុន្នី បានលើកឡើងថា ជាការពិតណាស់នៅពេលអ្នកមានអារម្មណ៍ធុញថប់ ឬតានតឹងវាពិតជាពិបាកក្នុងការគិតអំពីរឿងវិជ្ជមាន នេះជាបញ្ហារបស់ជីវិតដែលកើតលើមនុស្សគ្រប់គ្នា។ នៅពេលអ្នកមានអារម្មណ៍តានតឹងឬធុញថប់នោះ ចូរចំណាយពេលបន្តិចដើម្បីនឹកគិតមើលពីរូបភាពអនុស្សាវរីយ៍ល្អៗ ពីអតីតកាលដែលអ្នកបានឆ្លងកាត់ គឺនឹកដល់សេចក្ដីល្អដែលអ្នកបានធ្វើចំពោះអ្នកដទៃ ស្ដាប់ចម្រៀងឬបទភ្លេងដែលខ្លួនពេញចិត្ត បានផ្ងើសារទៅកាន់មនុស្សជាទីស្រលាញ់ហើយបញ្ជាក់ពីក្ដីស្រលាញ់ដែលអ្នកមានចំពោះពួកគាត់ក្នុងនាមជាកូន ជាប្តីជាប្រពន្ធ ជាឪពុកម្ដាយ និងជាមិត្តភក្តិ។ ការរៀនរលឹកមេរៀនជីវិតបែបនេះឱ្យអ្នកកើតចិត្តចេះតស៊ូ មិនថាអ្នកជាអ្នករកស៊ីនិងអ្នកធ្វើការនោះទេ ត្រូវតែរំលឹកថាជីវិតនេះតែងមានឡើងមានចុះជារឿងធម្មតាទេ សូម្បីអ្នករកស៊ីក៏មានចំណេញមានខាតដែរ។ រឿងសំខាន់ការបើកចិត្តទទួលស្គាល់ការពិតហើយបន្តគិតវិជ្ជមាន ទើបផ្លូវចិត្តរឹងមាំហើយជីវិតរបស់អ្នកក៏ទៅមុខដែរ។

២. សមាធិឱ្យអ្នកចេះរស់ជាមួយខ្លួនឯង៖ គុណប្រយោជន៍សមាធិ លោកគ្រូ នឹម ឈុន្នី បានលើកសាច់រឿងមួយមានបុរសម្នាក់បានសួរព្រះពុទ្ធថា តើការសមាធិមានប្រយោជន៍អ្វីខ្លះ? ព្រះអង្គបានញញឹមហើយឆ្លើយតបថា ពេលអ្នកព្យាយាមធ្វើសមាធិ អ្នកនឹងបាត់បង់របស់មួយចំនួនដូចជាបាត់បង់កំហឹង បាត់បង់ការប្រកាន់ច្រើន បាត់បង់ការថប់បារម្ភ និងបាត់បង់សេចក្តីភ័យខ្លាចនៅក្នុងដំណើរជីវិត។ ពេលអ្នកធ្វើសមាធិត្រឹមតែ ៥ទៅ១០នាទីជាប្រចាំថ្ងៃនោះ ជួយឱ្យអ្នកមានសមត្ថភាពរស់នៅជាមួយបច្ចុប្បន្នភាពហើយរៀនស្គាល់ពីខ្លួនឯងបានច្រើនជាងមុន។ មូលហេតុដែលបណ្តាលឱ្យមនុស្សភាគច្រើនចេះមានអារម្មណ៍តានតឹងកើតឡើងញឹកញាប់ដោយសារតែពួកគេចូលចិត្តរត់ទៅរកអតីតកាលនិងអនាគត ដូច្នេះហើយការសមាធិអាចដឹកនាំចិត្តរបស់អ្នកឱ្យមករស់នៅក្នុងផ្ទះរបស់ខ្លួន (បច្ចុប្បន្នភាព) ហើយឱ្យអ្នកបានក្រេបរសជាតិគំនិតស្ងប់ស្ងាត់។ គោលបំណងនៃការធ្វើសមាធិឱ្យអ្នកចេះគ្រប់គ្រងលើខ្លួនឯង កុំឱ្យអារម្មណ៍គ្រប់គ្រងលើជីវិតរបស់អ្នក។ នេះជាឥទ្ធិពលរបស់សមាធិជួយលាងជម្រះអារម្មណ៍អវិជ្ជមានចេញពីផ្លូវចិត្តរបស់អ្នក ហើយវានៅសល់របស់ម្យ៉ាងគឺថាមពលផ្លូវចិត្ត សេចក្តីរីករាយ និងក្តីស្រឡាញ់អាណិតចំពោះអ្នកដទៃតែប៉ុណ្ណោះ៕ ដកស្រង់ពីសៀវភៅ លំហូរចិត្ត

អ្នកអាចទិញសៀវភៅ លំហូរចិត្ត ទិញតាមនេះ https://t.me/BusinessCambodiaBook