អ្នកស្រាវជ្រាវបានបង្ហាញថា យូហ្គាមានសក្តានុពលក្នុងការបង្កើនលទ្ធភាពមានកូន នៅពេលរួមបញ្ចូលគ្នាជាមួយនឹងការព្យាបាលការមានកូនផ្សេងទៀតផងដែរ។ ទោះបីជាវិធីនៃការធ្វើលំហាត់ប្រាណនេះមិនអាចបង្កើនគុណភាពមេជីវិតឈ្មោល ឬស៊ុតដោយផ្ទាល់ក៏ដោយ ប៉ុន្តែវាក៏មានតួនាទីយ៉ាងសំខាន់ក្នុងការលើកកម្ពស់ឱ្យរាងកាយមានសុខភាពល្អ ដែលជះឥទ្ធិពលវិជ្ជមានដល់ដំណើរការនៃការមានគភ៌។ នេះបើយោងតាមប្រភព Healthline។
នៅក្នុងនោះដែរ បើយោងតាមប្រភព babycentre បានលើកឡើងថា លំហាត់ប្រាណដែលសម្រួលដល់ចលនានៃរាងកាយ គឺល្អសម្រាប់ការមានផ្ទៃពោះកូនភ្លោះរួមមាន លំហាត់ប្រាណហែលទឹក លំហាត់ប្រាណអាងត្រគាក លំហាត់ប្រាណយូហ្គា និងលំហាត់ដើរ។ នៅក្នុងនោះអ្នកក៏ត្រូវដឹងរឿងទាំង៣នេះផងដែររួមមាន៖
១.ការរក្សាទម្ងន់ឱ្យមានសុខភាពល្អ៖ ការឡើងទម្ងន់ក៏ជាកត្តាមួយដែលចូលរួមចំណែកដល់ភាពគ្មានកូនទាំងបុរស និងស្ត្រីផងដែរ។ ហើយរួមជាមួយនឹងការទទួលទានអាហារដែលមានសុខភាពល្អ ការធ្វើលំហាត់ប្រាណមានសារៈសំខាន់នៅក្នុងកម្មវិធីសម្រកទម្ងន់។ ប្រសិនបើអ្នកទើបតែចាប់ផ្តើមហាត់ យូហ្គាគឺជាជម្រើសដ៏ល្អមួយ គាំទ្ររាងកាយឱ្យមានចលនាបត់បែន និងរក្សាទម្ងន់ឱ្យមានសុខភាពល្អ។
២.ការកាត់បន្ថយភាពតានតឹង៖ ការសិក្សាមួយបានបង្ហាញថា ស្ត្រីជាច្រើនដែលកំពុងទទួលការព្យាបាលគ្មានកូនប្រឈមមុខនឹងការថប់បារម្ភ និងបញ្ហាធ្លាក់ទឹកចិត្ត។ សូម្បីតែបុរសក៏អាចជួបប្រទះនឹងស្ថានភាពនេះដែរ ដោយសារតែសម្ពាធការងារ បញ្ហាជីវិត ឬក៏ការព្យាបាល។ អ្នកជំនាញនិយាយថា ការរួមបញ្ចូលយូហ្គា និងការអនុវត្តន៍ផ្នែកផ្សេង (ដូចជាការដកដង្ហើមមួយៗ) ទៅក្នុងទម្លាប់ប្រចាំថ្ងៃរបស់អ្នកនឹងជួយកាត់បន្ថយភាពតានតឹង និងធ្វើឱ្យមុខងារប្រព័ន្ធភាពស៊ាំប្រសើរឡើងវិញ។
៣.តុល្យភាពនៃអ័រម៉ូន៖ រាងកាយ ផ្លូវចិត្ត ផ្លូវដង្ហើម និងតុល្យភាពអ័រម៉ូនមានទំនាក់ទំនងជាមួយគ្នា។ ដូច្នេះនៅពេលដែលភាពតានតឹងត្រូវបានគ្រប់គ្រង កម្រិតអរម៉ូនក៏ត្រូវបានគ្រប់គ្រងដូចគ្នាផងដែរ។ ការអនុវត្តយូហ្គាជារៀងរាល់ថ្ងៃធ្វើឱ្យប្រសើរឡើងនូវអន្តរកម្មរវាងខួរក្បាល និងអរម៉ូន (neuroendocrine) ដែលមានន័យថា អរម៉ូនមានតុល្យភាពប្រសើរជាងមុន។ វានឹងបង្កើនចំណង់ផ្លូវភេទ និងមុខងារបន្តពូជ ដែលត្រូវអនុវត្តទាំងស្ត្រី និងបុរស។
៤.គាំទ្រដល់ការផលិតមេជីវិតឈ្មោល៖ ចំនួនមេជីវិតឈ្មោលទាបចំពោះបុរស គឺជាបញ្ហាដែលធ្វើឱ្យបុរសពិបាកក្នុងការមានកូន ដែលវាអាចបណ្តាលមកពីរបៀបរស់នៅ ឬកត្តាបរិស្ថានដូចជា ធាត់ ការជក់បារី ឬការប៉ះពាល់នឹងសារធាតុគីមីមួយចំនួន។ អ៊ីចឹងការបញ្ចូលលំហាត់ប្រាណយូហ្គាទៅក្នុងជីវិតប្រចាំថ្ងៃនឹងជួយបុរសកាត់បន្ថយភាពតានតឹង និងការថប់បារម្ភ គ្រប់គ្រងមុខងាររបស់រាងកាយ និងគាំទ្រដល់ការផលិតមេជីវិតឈ្មោល កែលម្អសុខភាពបន្តពូជ ក៏ដូចជាការពារភាពគ្មានកូន។
ដូច្នេះសម្រាប់ការធ្វើលំហាត់ប្រាណយូហ្គា អ្នកធ្វើការមើលវីដេអូននៅក្នុងយូធូប ដែលមានគេបង្ហាត់បង្រៀនជាច្រើន ហើយប្រសិនបើអ្នកទើបតែហាត់យូហ្គាដំបូង អ្នកត្រូវចាប់ផ្តើមយឺតៗមួយៗ ផ្តោតលើការដកដង្ហើមរបស់អ្នក និងធ្វើចលនាដែលងាយស្រួលបំផុត។ នេះគឺជាក្បាច់សាមញ្ញៗមួយចំនួនសម្រាប់អ្នកចាប់ផ្តើមដំបូង។