សម្រាប់អំណោយមនុស្សធម៌ដ៏ថ្លៃថ្លាទាំងនេះ រួមមាន ឱសថចំនួន៩មុខ ស្មើនឹង១៦០កេសធំ ៥១៥ប្រអប់តូច និងឃីតចំនួន៣០កញ្ចប់ ដែលជាជំនួយមនុស្សធម៌របស់មូលនិធិចែករំលែកសង្គ្រោះជីវិតសកល (Global Life Sharing) នៃសាធារណរដ្ឋកូរ៉េ។

ជាមួយគ្នានោះ ឯកឧត្តម ម៉ម ប៊ុននាង បានជម្រាបជូនអង្គពិធីអំពីសភាពការណ៍ថ្មីៗនៅតាមបណ្តោយព្រំដែនកម្ពុជា-ថៃ ជាពិសេសភាពអង់អាចក្លាហានរបស់វីរកងទ័ពយើង និងការរួមចំណែកដ៏ធំធេងរបស់សម្តេចតេជោ ហ៊ុន សែន ជាមួយនឹងរាជរដ្ឋាភិបាល ក្នុងការការពារបូរណភាព ទឹកដី និងដែនអធិបតេយ្យជាតិ ពីការឈ្លានពានរបស់កងទ័ពថៃ។

ឯកឧត្តម សុខ សំណាង បានបញ្ជាក់ថា កន្លងមកក្រោមកិច្ចសហប្រតិបត្តិការព្រឹទ្ធសភា ជាមួយមូលនិធិចែករំលែកសង្គ្រោះជីវិតសកល(Global Life Sharing)  នៃសាធារណរដ្ឋកូរ៉េ និងសសមាគមគ្រូពេទ្យព្យាបាលដោយចលនាកម្ពុជា បាននាំមកនូវអំណោយមនុស្សធម៌យ៉ាងច្រើនរបស់ប្រជាជនកូរ៉េ តាមរយៈមូលនិធិចែករំលែកសង្គ្រោះជីវិតសកលកូរ៉េ ជូនដល់ប្រជាពលរដ្ឋកម្ពុជា ជាពិសេសនាពេលថ្មីៗនេះដល់កងទ័ពជួរមុខ និងជនភៀសសឹកកំពុងមានតម្រូវការស្បៀងអាហារ ថ្នាំពេទ្យ និងសម្ភារៈប្រើប្រាស់ផងដែរ។

សូមបញ្ជាក់ថា សម្រាប់វិធីផ្តល់ជូនអំណោយសប្បុរសធម៌នេះ ស្ថិតក្រោមអធិបតីភាពឯកឧត្តម ម៉ម ប៊ុននាងប្រធានគណៈកម្មការអង្កេត បោសសម្អាត និងប្រឆាំងអំពើពុករលួយនៃព្រឹទ្ធសភា កម្ពុជា និងក្រុមសមាជិកព្រឹទ្ធសភាប្រចាំភូមិភាគទី២ ដឹកនាំដោយឯកឧត្តម ឡាន់ ឆន អនុប្រធានក្រុម តំណាងដ៏ខ្ពង់ខ្ពស់របស់ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា ឯកឧត្តមសុខ សំណាង ជំនួយការសម្តេច ប្រធានព្រឹទ្ធសភា នៃព្រះរាជាណាចក្រកម្ពុជាតំណាងអោយមូលនិធិ(GLSK)និងជាប្រធានកិត្តិយសសមាគមគ្រូពេទ្យព្យាបាលដោយចលនាកម្ពុជា លោកប្រធានមន្ទីរពេទ្យ ឯកឧត្តម ប៉ែន កុសល្យ អភិបាលខេត្តត្បូងឃ្មុំផងដែរ៕