ជំងឺមហារីកមិនមែនចេះតែកើតឡើងលើប្រជាពលរដ្ឋនោះទេ នេះដោយសារតែប្រជាពលរដ្ឋមិនយកចិត្តទុកដាក់ថែរក្សាសុខភាពឱ្យបានល្អទេ ទាំងការហូបចុក ការថែទាំសុខភាព អនាម័យ ទម្លាប់ និងការរស់នៅជាដើម។ ដែលជាហេតុធ្វើឱ្យប្រជាពលរដ្ឋក្នុងអាយុច្រើន​ ងាយមានហានិភ័យក្នុងការកើតជំងឺមហារីក និងជំងឺដទៃៗទៀត នេះក៏ព្រោះតែប្រជាពលរដ្ឋមិនមានការយកចិត្តទុកដាក់ចំពោះបញ្ហាសុខភាព។

គួរបញ្ជាក់ដែរថាតាមការឱ្យដឹងរបស់ឧកញ៉ាវេជ្ជបណ្ឌិត គួច ម៉េងលី បានលើកឡើងថា បច្ចុប្បន្ននេះប្រជាពលរដ្ឋកំពុងតែអាហារជាច្រើន ដែលគ្មានការពិនិត្យត្រឹមត្រូវនោះងាយនឹងប៉ះពាល់ចំពោះសុខភាពណាស់ ហើយជាពិសេសប្រភេទអាហារ អាំង ចៀន និងរបស់ផ្អាប់ ដែលទាំងនេះសុទ្ធតែជាអាហារដែលគ្មានគុណភាពត្រឹមត្រូវ ហើយអាហារប្រភេទអាំង និងចៀន ដែលរួមមានទាំងសាច់គោរអាំង ទាំងការចៀនសាច់ឆ្អិនខ្លាំងពេក(ខ្លោច)ដែលមានសារជាតិខ្លាញ់ច្រើន វាងាយនឹងមានផលប៉ះពាល់ដល់សុខភាព ហើយងាយនឹងកើតមានជំងឺមហារីកទៀតផង។

យ៉ាងណាក្ដីបើយោងតាម Helpguide បានលើកឡើងថា ដើម្បីកាត់បន្ថយហានិភ័យនៃជំងឺមហារីកជាច្រើនប្រភេទក៏ដូចជាជំងឺធ្ងន់ធ្ងរផ្សេងទៀតបាន ប្រជាពលរដ្ឋត្រូវតែកែប្រែរបបអាហាររបស់អ្នកជាកត្តាសំខាន់ណាស់សម្រាប់សុខភាពដូចជា ផ្លែឈើ និងបន្លែដែលសំបូរទៅដោយសារធាតុប្រឆាំងអុកស៊ីតកម្មជាច្រើន ដើម្បីជួយបង្កើនប្រព័ន្ធភាពស៊ាំ និងជួយការពារប្រឆាំងនឹងកោសិកាមហារីករបស់អ្នក។

របបអាហារដែលអ្នកត្រូវទទួលទានជាប្រចាំរួមមានរួមមាន៖

១‑របបអាហារផ្លែឈើ និងគ្រាប់ធញ្ញជាតិទាំងអស់ត្រូវបានផ្សារភ្ជាប់ជាមួយនឹងការថយចុះហានិភ័យនៃជំងឺមហារីកបាន ហើយវាមិនច្បាស់ទេថា តើផ្លែឈើណាខ្លះដែលអាចការពារប្រឆាំងនឹងជំងឺមហារីកបានទេ? ប៉ុន្ដែផ្លែឈើគឺជាប្រភេទអាហារសម្រន់ល្អចំពោះសុខភាព។

២‑ការបរិភោគបន្លែដែលមានជាតិផ្ទុកការ៉ូតូណូអ៊ីត (carotenoids) ដូចជាការ៉ុត អាចកាត់បន្ថយហានិភ័យនៃជំងឺមហារីកសួត និងមហារីកបំពង់ក។

៣‑របបអាហារដែលមានបន្លែ ដូចជា ផ្កាខាត់ណាខៀវ, ស្ពៃបៃតង និងសណ្តែក អាចជួយការពារប្រឆាំងនឹងជំងឺមហារីកក្រពះ។

៤‑ការបរិភោគ ផ្លែក្រូច, ផ្លែបឺរី, ផ្លែល្ពៅ និងអាហារផ្សេងទៀតដែលមានវីតាមីន C ខ្ពស់ក៏អាចការពារប្រឆាំងនឹងជំងឺមហារីកបំពង់អាហារផងដែរ។

៥‑អាហារដែលមានជាតិ Lycopene ខ្ពស់ ដូចជាប៉េងប៉ោះ, ផ្លែត្របែក និងឪឡឹក អាចបន្ថយហានិភ័យនៃជំងឺមហារីកក្រពេញប្រូស្តាត។

ដូច្នេះប្រភេទអាហារទាំងនេះអ្នកអាចជាវ ឬរកទិញបាន​ ប៉ុន្តែយល់ល្អប្រភេទផ្លែឈើ ឬបន្លែណាដែលអាចដាំនៅផ្ទះបាន ជាការប្រសើរជាងមុនទៀត៕

អត្ថបទស្រាវជ្រវដោយ៖ម៉ាង វិសិដ្ឋារតន៍