ទឹកដីខ្មែរយើងមានរុក្ខជាតិចម្រុះជាច្រើនដុះលើផ្ទៃប្រទេស ហើយរុក្ខជាតិខ្លះមិនត្រឹមតែបន្ថែមឱជារសសម្រាប់ម្ហូបអាហារទេ ថែមទាំងអាចជាថ្នាំបន្ធូរបន្ថយអាការរោគបានថែមទៀត។ថ្ងៃនេះចាបបៃតងនឹងនាំឱ្យបងប្អូនស្គាល់នូវរក្ខជាតិក្រវាញមានឈ្មោះជាភាសាអង់គ្លេសថា (Siam Cardamom) ដើមក្រវាញមានអត្ថប្រយោជន៍ច្រើនជួយដល់សុខភាព ដែលគេអាចយកវាទៅធ្វើជាឱសថព្យាបាល និងដាក់ក្នុងសម្លបានថែមទៀតផង។

ជាការពិតណាស់​ក្រវាញ បើតាមវចនានុក្រម សម្ដេច ជួន ណាត​ បាននិយាយថា ក្រវាញឈ្មោះប្រទាលមួយប្រភេទ មានផ្លែប្រើជាថ្នាំកែរោគ, ច្រើនមានតែនៅទីភ្នំក្នុងស្រុកថ្ពង, ខែត្រពោធិ៍សាត់, ខែត្របាត់ដំបង។

ជាក់ស្ដែងយោងតាមរយៈប្រភពsciencedirect បានឱ្យដឹងថាក្រវាញគឺពិតជាអាចមានសមត្ថភាពការពារហានិភ័យជំងឺក្រពះ ចុករោយ ស្ពឹកស្រពន់ដៃជើង ស្រវាំងភ្នែក រលាកទងសួត ការឆ្លងមេរោគ​ ជំងឺបេះដូង ជួយគ្រប់គ្រងជាតិស្ករនៅក្នុងឈាម ជួយឱ្យឈាមតរត់ស្រួល បន្ថយកអាការឈឺធ្មេញ…ជាដើម ។ជាពិសេសត្រូវបានគេរកឃើញថាក្រវាញមានសមត្ថភាពជួយដល់ការអសមត្ថភាពផ្លូវភេទផងដែរ។

បើតាមការឱ្យដឹងពីក្រសួងបរិស្ថានបានឱ្យដឹងដែរថា ក្រវាញគឺអាចជាឱសថ ព្រោះផ្លែមានធាតុក្តៅអាចធ្វើឱ្យដើរខ្យល់ស្រួល និងជាថ្នាំព្យាបាលក្រពះ ចុកសៀត និងអាហារមិនរលាយ។ ស្លឹកសម្រាប់ព្យាបាលស្ពឹកស្រពន់ និងហើមអញ្ចាញធ្មេញ។ មើមយកធ្វើថ្នាំពៅកម្លាំង និងផ្កាអាចព្យាបាលការស្រវាំងភ្នែក។

តួយ៉ាងក្រវាញគេក៏អាចយកវាទៅធ្វើជាគ្រឿងទេសបានដែរ និងដាក់ក្នុងសម្លម្ជូរសាច់គោ ឆា ស៊ុបប៉ូវកម្លាំងផងដែរ នៅតាមបណ្ដាប្ររទេសអាស៊ីមួយចំនួនរួមទាំងប្រទេសកម្ពុជាយើងផងដែរ៕

អត្ថបទដោយ៖ប៉ែត ធីតា