បច្ចុប្បន្នមានប្រភេទជំងឺជាច្រើនបានកំពុងកើតលើស្រ្តី ក្នុងនោះជំងឺមហារីកក្រពេញអូវែ ក៏ត្រូវបានចាក់ទុកជាប្រភេទជំងឺមួយដ៏គ្រោះថ្នាក់ចំពោះស្រ្តី ។ ជាការពិតណាស់ ក្រពេញអូវែ មានតួនាទីយ៉ាងសំខាន់ ក្នុងការផលិតមេជីវិតញី អ័រម៉ូនអ៊ឺសត្រូសែន និងអ័រម៉ូនប្រូហ្គេស្តេរូន ដើម្បីជួយសម្រួលនៃដំណើររបស់រាងកាយ ព្រមទាំងការលូតលាស់ផ្សេងៗ​ទៀត ។

យោងតាមការចុះផ្សាយរបស់គេហទំព័រ www.mayoclinic.org ជំងឺមហារីកក្រពេញអូវែ ដែលកើតលើស្រ្តី ក្នុងដំណាក់កាលដំបូងៗ គ្មានរោគសញ្ញាច្បាស់លាស់ណាមួយ ដែលនាំឲ្យយើងចាប់អារម្មណ៍ទេ ក្នុងករណីនេះ លោកអ្នកជាពិសេសស្រ្តីខ្លួនឯង គួរប្រុងប្រយ័ត្នប្រសិនបើមានរោគសញ្ញាដូចខាងក្រោមនេះ !

រោគសញ្ញាគួរចាប់អារម្មណ៍៖  ហើមប៉ោង ឬមានដុំអ្វីមួយត្រង់ពោះ មានអារម្មណ៍ថាឆាប់ឆ្អែតទោះញ៉ាំតិចក៏ដោយ ស្រកទម្ងន់ មានអារម្មណ៍ថាមិនសុខស្រួលត្រង់ម្ដុំក្រគៀក មានបញ្ហាប្រព័ន្ធបញ្ចេញចោល ដូចជាមានទល់លាមកជាដើម និងនោមញឹកញាប់ខុសធម្មតា ។

មូលហេតុ៖ គេមិនទាន់ដឹងច្បាស់លាស់នៅឡើយទេ ពីមូលហេតុនៃជំងឺនេះ ប៉ុន្តែគេដឹងត្រឹមថា ជំងឺមហារីកក្រពេញអូវែនេះ មានច្រើនប្រភេទ ហើយប្រភេទខ្លះក៏អាចកើតលើស្រ្តីដែលមានវ័យក្មេងនៅឡើយ ។  

ការការពារ៖ គ្មានមធ្យោបាយច្បាស់លាស់ណាមួយដើម្បីការពារកុំឲ្យកើតជំងឺប្រភេទនេះបានទេ ប៉ុន្តែលោកអ្នកអាចកាត់បន្ថយហានិភ័យ និងផលវិបាកធ្ងន់ធ្ងរបានតាមរយៈ ការប្រឹក្សាជាមួយគ្រូពេទ្យជំនាញ ប្រសិនបើលោកអ្នកមានសមាជិកគ្រួសារធ្លាប់កើតជំងឺនេះ ធ្វើការពិនិត្យសុខភាពជាប្រចាំ(មួយឆ្នាំឲ្យបានម្ដង) ជាពិសេសស្រ្តីដែលមានវ័យកាន់តែចាស់ មានរបបអាហារត្រឹមត្រូវ និងរក្សាតុល្យភាពទម្ងន់រាងកាយឲ្យបានល្អជាដើម ៕

អត្ថបទដោយវេជ្ជបណ្ឌិត៖ ហួ ភារ៉ា