ប្រទាលកន្ទុយក្រពើ គឺជាប្រទាលដែលត្រូវបានគេដឹងថាវាមានគុណប្រយោជន៍ច្រើនខ្លាំងណាស់ ទាំងសម្រាប់សុខ ស្បែក និងសម្រស់។ ដូច្នេះ Healthy Cambodia នឹងលើកយកពីគុណប្រយោជន៍ច្រើនយ៉ាងរបស់ប្រទាលកន្ទុយក្រពើមកជម្រាបជូនប្រិយមិត្តឱ្យបានកាន់តែច្បាស់ រួមទាំងទិកនិកដែលប្រើប្រាស់ឱ្យបាន ត្រឹមត្រូវផងដែរ។

យោងតាមគេហៈទំព័រ PharmEasy Blogបានលើកឡើងពីអត្ថប្រយោជន៍របស់ប្រទាលកន្ទុយក្រពើយ៉ាងដូច្នេះថា ៖ ប្រទាលកន្ទុយក្រពើ គឺជាបណ្ដុំសារធាតុដែលសម្បូរដោយសារជាតិចិញ្ចឹមខ្ពស់សម្រាប់ស្បែកខ្លួន មុខ និងសក់ លើសពីនេះវាជួយដល់ការរំលាយអាហារនិងថែមទាំងជួយបង្កើនភាពសាំទៀតផង។គួរបញ្ជាក់ថា វាត្រូវបានគេយកទៅផលិតជាជែលឬ សារធាតុផ្សំក្នុងគ្រឿងថែរក្សាសម្រស់ ទាំងស្បែក និងសរសៃសក់ ទាំងនេះគឺ ដោយសារតែសារធាតុដ៏សម្បូរបែបរបស់វានោះឯង។

ទន្ទឹមនឹងដែរ ខាងក្រោមនេះ គឺជាគុណប្រយោជន៍ដ៏លើសលប់របស់វាចំពោះស្បែករបស់អ្នក៖

ជួយការពារកម្ដៅថ្ងៃ៖ ប្រទាលកន្ទុយក្រពើ ត្រូវបានគេយកទៅផលិតធ្វើជាជែល ដែលមានលក្ខណៈសម្បត្តិត្រជាក់និងប្រឆាំងការរលាក។ ពិសេសជាងនេះ បប្រទាលកន្ទុយក្រពើ ត្រូវបានគេចាត់ទុកថា​ជាឱសថធម្មជាតិសម្រាប់ការការពារការលាក់ស្បែកដោយពន្លឺព្រះអាទិត្យ ឬ ស្បែកដែលឆេះ។

ជួយធ្វើឱ្យស្បែកមានសំណើម៖ វាអាចជួយឱ្យស្បែកមានសំណើមខ្ពស់ មិនធ្វើឱ្យមានជាតិខ្លាញ់នៅលើផ្ទៃមុខ និង ស្បែកឡើយ។ លើសពីនេះ សារធាតុដ៏សំខាន់របស់វា បានជួយបង្រួមគល់រោម បណ្ដឹងស្បែក ឱ្យតឹង ម៉ដ្ឋ ទន់មានពន្លឺស្រស់ថ្លាពីខាងក្នុង។

ប្រឆាំងនឹងភាពចាស់នៃស្បែក៖ វាសម្បូរទៅដោយវីតាមីន C និងE, Beta-caroteneដ៏សម្បូរបែប។ ដូច្នេះហើយ ទើបវាមានលក្ខណៈប្រឆាំងនឹងភាពចាស់ លើសពីនេះ វាក៏មានលក្ខណៈសម្បតិ្តប្រឆាំងនឹងមេរោគ ប្រឆាំងនិងការលាកផងដែរ។ អ្វីដែលកាន់តែពិសេសលើសលប់របស់វានោះ​ គឺវាអាចជួយលុបបំបាត់ស្នាមជាំនៅលើស្បែក ផលិតខូឡាជែនក្នុងរាងកាយ បានយ៉ាងល្អបំផុត។

ព្យាបាលរបួស៖ ជាការពិត បន្ទាលកន្ទុយក្រពើត្រូវបានគេដឹងថា មានអត្ថប្រយោជន៍ក្នុងការព្យាបាល ការរលាកនិងរងរបួសផ្សេងៗទៀត។ នេះ គឺដោយសារតែសារធាតុរ​បស់វា ជួយបង្កើនការព្យាបាលស្នាមរបួស ពោលគឺ កាត់បន្ថយពេលវេលានៃការជាសះស្បើយ។

គួររម្លឹកថា ក្រោយពីជួយព្យាបាលការលាកហើយ បន្ទាប់មកវាជួយពន្លឿនដល់ការលូតលាស់របស់កោសិកាស្បែកដល់ទៅ ៨ដងផងដែរ ហើយវាក៏ត្រូវបានគេដឹងផងដែរថា សាធាតុរបស់វានឹងជ្រៀបចូលទៅក្នុងស្រទាប់អេពីដេ ពោលគឺ ស្រទាប់ខាងក្រៅនៃស្បែកលឿនជាងទឹក។

ទន្ទឹមនឹងនេះ គេហៈទំព័រ Prevention ក៏បានលើកឡើងស្រដៀងគ្នាថា សារធាតុនៅក្នុង អាឡូវ៉េរ៉ា គឺពិតជាបានជួយផ្ដល់សំណើមដល់ស្បែក ធ្វើឱ្យស្បែក ទន់ ភ្លឺរលោងនិង ជួយបណ្ដុះកោសិកាថ្មីដល់ស្បែកលឿនបំផុត។ យ៉ាងណាមិញ លោកអ្នកអាចប្រើអាឡូវ៉េរ៉ាបានតាម រយៈជែលបន្ទន់ស្បែក ស្ក្រាប់ខាត់ស្បែក ក្រែមជួយបណ្ដុះកោសិកាស្បែកដែលមានផ្សំឡើងពីធាតុផ្សំរបស់អាឡូវ៉េរ៉ាបាន ។ ក្នុងនោះផងដែរ លោកអ្នកមិនគួរយកវាមកប្រើដោយផ្ទាល់នោះទេ​ ព្រោះវាអាចធ្វើឱ្យប៉ះពាល់ស្បែក ប្រសិនបើអ្នកធ្វើការលាងសម្អាតជ័ររបស់វាមិនបានត្រឹមត្រូវ។

ដូច្នេះ ប្រសិនបើលោកអ្នក កំពុងជួបបញ្ហាស្បែកមិនស្អាត ស្បែកមានបញ្ហារោល ក្រហម ​ស្បែកមុខឡើងមុន ឬចង់ពន្យាភាពចាស់នៃស្បែក កាត់បន្ថយភាពជ្រីវជ្រួញ លោកអ្នកអាចជ្រើសយកគ្រឿងថែរក្សាសម្រស់ដែលមានធាតុផ្សំរបស់ អាឡូវ៉េរ៉ាបាន។

អត្ថបទដោយ ៖ តឹក ស៊ីថា​ ( Tek Sitha)

​