ជាទូទៅ ស្រ្តីជាច្រើនតែងតែដឹងថានៅពេលមានផ្ទៃពោះគឺគេតម្រូវចាំបាច់ឱ្យញ៉ាំថ្នាំជាតិដែកជារៀងរាល់ថ្ងៃដើម្បីជំនួយទៅដល់ការលូតលាស់របស់កូន ជួយឱ្យកូនរឹងមាំ ទាំងឆ្អឹងនិងរាងកាយ។ ប៉ុន្តែនៅមានថ្នាំមួយប្រភេទទៀតដែលមានសារសំខាន់ជាងថ្នាំជាតិដែកដែលស្រ្តីមានផ្ទៃពោះគ្រប់រូបមិនអាចខ្វះបាន។

ជាការពិតណាស់ យោងតាមការសម្ភាសន៍ផ្ទាល់ជាមួយ វេជ្ជបណ្ឌិត កែវ ច័ន្ទមុន្នី ឯកទេសសម្ភព និង រោគស្រ្តី មប្រើការនៅមន្ទីរពេទ្យ សម្ភព សោភា បានបញ្ជាក់ច្បាស់ៗថា ថ្នាំ អាស៊ីតហ្វូលិក(folic acid) គឺសំខាន់និងចាំបាច់ខ្លាំងបំផុតសម្រាប់ស្រ្តីមានផ្ទៃពោះគ្រប់រូប ត្រូវញ៉ាំជារៀងរាល់ថ្ងៃរាប់ចាប់តាំងពីពេលដឹងថាមានផ្ទៃពោះខែដំបូង។ ថ្នាំអាស៊ីតហ្វូលិក គឺវាមានតួនាទីជំនួយទៅដល់ប្រព័ន្ធសរសៃប្រសាទកុមារ ជំនួយខួរក្បាល ការពារពិការភាពផ្សេងៗ។

បន្ថែមពីលើនេះទៀត បើតាមការបញ្ជាក់បន្ថែមពី CDC អាមេរិក គឺគេណែនាំឱ្យស្រ្តីមានផ្ទៃពោះញ៉ាំថ្នាំអាស៊ីតហ្វូលិក ៤០០ មីក្រូក្រាម (mcg) ជារៀងរាល់ថ្ងៃ បន្ថែមពីលើការទទួលទានអាហារដែលមានជាតិ folate ពីរបបអាហារផ្សេងៗគ្នា ដើម្បីជួយការពារពិការភាពពីកំណើតសំខាន់ៗមួយចំនួននៃខួរក្បាលទារក (anencephaly) និងជំនួយឆ្អឹងខ្នងទារកកុំឱ្យកោង។ ជម្រើសកាន់តែ CDC ណែនាំឱ្យស្រ្តីគ្រប់រូបដែលមានគម្រោងយកកូនត្រូវញ៉ាំថ្នាំអាស៊ីហ្វូលិក ៤០០ មីក្រូក្រាម (mcg) ជារៀងរាល់ថ្ងៃ មុនពេលយកកូនមួយខែ ហើយបន្តញ៉ាំរហូតដល់មានផ្ទៃពោះបាន៣ខែ។

ក្រៅពីញ៉ាំថ្នាំគ្រាប់ អ្នកក៏អាចទាញយកជាតិអាស៊ីតហ្វូលិកពីអាហារមួយចំនួនដូចជា គ្រាប់ធញ្ញជាតិ នំបុ័ង ផ្លែពោត ដំឡូង...ជាដើមសុទ្ធសឹងតែជាអាហារដែលផ្ទុកទៅដោយសារធាតិអាស៊ីតហ្វូលិក។

សរុបមកវិញដើម្បីយល់ដឹងកាន់តែច្បាស់អំពីរបៀបញ៉ាំថ្នាំអាស៊ីតហ្វូលិក ម៉ាក់ត្រូវទៅពិគ្រោះយោបល់ជាមួយគ្រូពេទ្យជំនាញផ្នែកសម្ពព ដើម្បីទទួលយកថ្នាំអាស៊ីតហ្វូលិកញ៉ាំឱ្យបានគ្រប់គ្រាន់ ការពារកូនអ្នកឱ្យគេងផុតពីពិការភាព និងខូចខួរក្បាល៕

អត្ថបទដោយ៖ មឿន គន្ធា