សាច់សត្វ គឺជាផ្នែកមួយនៃចំណីរអាហារយ៉ាងសំខាន់សម្រាប់ប្រជាជនទូទាំងពិភពលោកបរិភោគប្រចាំថ្ងៃ ខណៈវាសម្បូរដោយប្រូតេអ៊ីន និង អត្ថប្រយោជន៍ជាច្រើនផ្សេងទៀតផងដែរ។ ប៉ុន្តែកាលពីពេលថ្មីៗនេះ មានរឿងគួរឱ្យសោកស្តាយនិងភ្ញាក់ផ្អើលកើតឡើង ពោលគឺមានសត្វគោចេញរោគសញ្ញាឆ្លងមេរោគFMD ដែលធ្វើឱ្យមនុស្សខ្លាច មិនចង់បរិភោគសាច់សត្វបន្តទៀត។
នៅថ្ងៃទី៣ ខែមិថុនា ឆ្នាំ២០២២កន្លងមកនេះ កាសែតCNA បានចុះផ្សាយឱ្យដឹងថា មានកសិករចិញ្ចឹមគោ ជនជាតិឥណ្ឌូនេស៊ី លោក Dio Nurdin Setiawan អាយុ ៣០ ឆ្នាំ បានកត់សម្គាល់ឃើញមានភាពមិនប្រក្រតីនៅក្នុងគោមួយក្បាលរបស់គាត់កាលពីដើមខែឧសភា។ រោគសញ្ញាមានដូចជា គ្រុនក្តៅខ្លាំង, ហៀរសំបោរ, ដកដង្ហើមលឿន និងបង្ហាញការខ្វះចំណង់អាហារ ចំណែកឯ ទឹកមាត់របស់វាក៏មានពពុះផងដែរ។ បន្ទាប់មក ក្នុងរយៈពេលប៉ុន្មានថ្ងៃក្រោយមក សត្វគោផ្សេងៗទៀតចាប់ផ្តើមបង្ហាញរោគសញ្ញាដូចគ្នា ហើយ ជើងគោចាប់ផ្តើមពងបែក និង រមាស់។
លោក Setiawan ដែលជាម្ចាស់គោ ធ្វើជាកសិករអស់រយៈពេល៧ឆ្នាំមកហើយនោះ គាត់ថា “គាត់មិនដែលឃើញសត្វគោរងគ្រោះ ឈឺច្រើនបែបនេះទេ។” លុះដល់ថ្ងៃទី ៥ ខែឧសភា មន្ត្រីមកពីទីភ្នាក់ងារបសុសត្វបានទៅដល់កសិដ្ឋាន ហើយរកឃើញថាគោទាំង២០ក្បាលបានធ្វើតេស្តវិជ្ជមានសម្រាប់ជំងឺ(FMD) ។ សូមរម្លឹកផងដែរថា ជំងឺFMD គឺជាជំងឺមេរោគដ៏កាចសាហាវនៃសត្វពាហនៈ ដែលអាចជះផលប៉ះពាល់សេដ្ឋកិច្ចយ៉ាងខ្លាំង នេះបើយោងតាមអង្គការសុខភាពសត្វពិភពលោក (WOAH)។ អ្វីដែលគួរឱ្យបារម្ភគឺ ជំងឺនេះរីករាលដាលយ៉ាងឆាប់រហ័ស ដូច្នេះបន្ទាប់ពីគោមួយឆ្លងវា សត្វគោផ្សេងទៀតនៅក្នុងក្រោលក៏បានឆ្លងដែរ។
កន្លងមក ក្នុងប្រទេសឥណ្ឌូណេស៊ី ធ្លាប់បានប្រកាសថាប្រទេខ្លួនគ្មាន ជំងឺFMD ទៀតទេនៅក្នុងឆ្នាំ១៩៨៦ ប៉ុន្តែក្រោយហេតុការណ៍នេះកើតឡើង ក្រុមមន្ត្រីបានប្រកាសនៅដើមខែឧសភាថា ជំងឺឆ្លងFMDនេះ បានរីករាលដាលក្នុងចំណោមសត្វគោនៅឯតំបន់ជ្វាខាងកើត ហើយវាបានកើតឡើងក្លាយជាការភ្ញាក់ផ្អើលមួយសម្រាប់ប្រទេសទាំងមូល៕
រៀបរៀងអត្ថបទដោយ៖ កញ្ញា លីហួយ