ក្រុងបាត់ដំបង – ថ្ងៃទី១៧ ខែកញ្ញា ឆ្នាំ២០២៥ – នៅក្នុងដំណើរទស្សនកិច្ចក្នុងក្រុងបាត់ដំបង ឯកអគ្គរាជទូតអង់គ្លេសប្រចាំកម្ពុជា លោក Dominic Williams បានសម្តែងការគាំទ្រយ៉ាងខ្លាំងចំពោះសុខភាពផ្លូវភេទ និងសុខភាពបន្តពូជ និងសិទ្ធិ (SRHR) ក៏ដូចជាបេសកកម្មរបស់អង្គការម៉ារីស្តូបអន្តរជាតិកម្ពុជា (MSIC) ដែលជាផ្នែកមួយនៃអង្គការ MSI Reproductive Choices ។ លោកឯកអគ្គរាជទូតបានកោតសរសើរចំពោះការប្តេជ្ញាចិត្តរបស់ អង្គការម៉ារីស្តូបអន្តរជាតិកម្ពុជា (MSIC) ក្នុងការផ្តល់សេវាសុខភាពផ្លូវភេទ និងសុខភាពបន្តពូជ (SRH) ដែលមានគុណភាពខ្ពស់ ជូនដល់ទាំងស្ត្រី និងបុរសក្នុងព្រះរាជាណាចក្រកម្ពុជា។
ចាប់តាំងពីឆ្នាំ ១៩៩៨ មកអង្គការម៉ារីស្តូបអន្តរជាតិកម្ពុជា (MSIC) គឺជាអ្នកផ្តល់សេវាឈានមុខគេ ផ្នែកសុខភាពផ្លូវភេទ និងសុខភាពបន្តពូជគ្រប់ជ្រុងជ្រោយ (SRH) និងដោយអនុវត្តតាមស្តង់ដាដែលបានកំណត់នៅចក្រភពអង់គ្លេស ក៏ដូចជាគោលការណ៍ណែនាំរបស់អង្គការសុខភាពពិភពលោក(WHO) ជាពិសេសក្រសួងសុខាភិបាលនៃព្រះរាជាណាចក្រកម្ពុជា។ ទីតាំងផ្តល់សេវារបស់អង្គការម៉ារីស្តូបអន្តរជាតិកម្ពុជារួមមាន៖ គ្លីនិកចំនួន៨ទីតាំង និងអ្នកផ្តល់សេវានៅតាមបណ្តាខេត្តក្នុងសហគមន៍ចំនួន ៣០ទីតាំង ដែលគេស្គាល់ថា ម៉ារីស្តូបឡេឌី នៅទូទាំងព្រះរាជាណាចក្រកម្ពុជា រួមជាមួយមណ្ឌលព័ត៌មាន ដើម្បីធានាឱ្យបានថាស្ត្រី និងកុមារី ជាពិសេសនៅក្នុងសហគមន៍ជនបទ និងសហគមន៍ក្រីក្រ មានលទ្ធភាពទទួលបានការថែទាំសុខភាពចាំបាច់ និងទទួលបានព័ត៌មានត្រឹមត្រូវទាក់ទងនឹងជម្រើសសុខភាព ។
សិទ្ធិទទួលបានការថែទាំសុខភាពផ្លូវភេទ-សុខភាពបន្តពូជ នៅតែជាបញ្ហាប្រឈម ជាពិសេសសម្រាប់យុវជន ជនមានពិការ ជនរងគ្រោះដោយអំពើហិង្សាផ្លូវភេទ និងយេនឌ័រ ស្ត្រីងាយរងគ្រោះដែលរស់នៅក្នុងភាពក្រីក្រ និងក្រុមជនដែលសង្គមមានបានរាប់បញ្ចូលដទៃទៀត។ ឧបសគ្គដូចជាការមាក់ងាយ កង្វះការទទួលព័ត៌មានត្រឹមត្រូវ និងបញ្ហាហិរញ្ញវត្ថុ គឺជារបាំងរារាំងពួកគាត់ពីការទទួលបានសេវាថែទាំសុខភាពចាំបាច់។ អង្គការម៉ារីស្តូបបានចូលរួមជួយដោះស្រាយ និងបំពេញគម្លាតទាំងនេះដោយផ្តល់ជូននូវសេវាគ្រប់ជ្រុងជ្រោយដោយរក្សាការសម្ងាត់ និងមិនមានការរើសអើង ចាប់ពីមធ្យោបាយពន្យារកំណើត សេវារំលូតដោយសុវត្ថិភាព រហូតដល់ការប្រឹក្សា និង ការថែទាំសុខភាពមាតា។ ជារៀងរាល់ឆ្នាំ អង្គការម៉ារីស្តូបអន្តរជាតិកម្ពុជាបានគាំទ្រដល់អតិថិជនរាប់ម៉ឺននាក់ ដោយជួយការពារការមានគភ៌ដោយចៃដន្យ កាត់បន្ថយអត្រាមរណៈមាតា និងលើកកម្ពស់សុខភាពដើម្បីអនាគតគ្រួសារ និងសហគមន៍។
ដំណើរទស្សនកិច្ចរបស់លោកឯកអគ្គរាជទូតបានគូសបញ្ជាក់ពីការគាំទ្ររបស់ចក្រភពអង់គ្លេសចំពោះគុណភាព នៃការថែទាំសុខភាព ការយកចិត្តទុកដាក់លើអតិថិជន និងកិច្ចខិតខំជាសកលដើម្បីលើកកម្ពស់សមភាពយេន
ឌ័រ បរិយាបន្នពិការភាព និងយុត្តិធម៌សង្គម។ ជាផ្នែកមួយនៃ MSI Reproductive Choices អង្គការម៉ារីស្តូបអន្តរជាតិកម្ពុជាអនុវត្តស្តង់ដាសកលដែលកំណត់នៅចក្រភពអង់គ្លេសយ៉ាងម៉ត់ចត់ ដើម្បីធានាថាអតិថិជនទទួលបានបទពិសោធន៍នៃការទទួលសេវាថែទាំសុខភាពប្រកបដោយសុវត្ថិភាព និងគុណភាពខ្ពស់នៅគ្រប់ដំណាក់កាលនៃជីវិតរបស់ស្រ្តី និងបុរស។
លោកស្រី ឡេង ស៊ីវហេង នាយិកាអង្គការម៉ារីស្តូបអន្តរជាតិកម្ពុជាប្រចាំកម្ពុជា មានប្រសាសន៍ថា៖
“អង្គការម៉ារីស្តូបអន្តរជាតីកម្ពុជាមានកិត្តិយសក្នុងការស្វាគមន៍លោកឯកអគ្គរាជទូតអង់គ្លេសមកទស្សនកិច្ចគ្លីនិកបាត់ដំបងរបស់យើង និងថ្លែងអំណរគុណយ៉ាងជ្រាលជ្រៅចំពោះការគាំទ្រដល់ សិទ្ធិក្នុងការទទួលបានការថែទាំសុខភាពផ្លូវភេទ-សុខភាពបន្តពូជ នៅកម្ពុជា។ ការគាំទ្ររបស់លោកឯកអគ្គរាជទូតបានគូសបញ្ជាក់ពីសារៈសំខាន់នៃការធានាឱ្យស្ត្រី និងកុមារីទាំងអស់នៅក្នុងគ្រប់កាលៈទេសៈ អាចមានលទ្ធភាពទទួលបានការថែទាំសុខភាពប្រកបដោយគុណភាពខ្ពស់ មិនមានការរើសអើង ដោយមានការចូលរួមគាំទ្រពីបុរស ឬដៃគូ។ ម៉ារីស្តូបនៅតែប្តេជ្ញាចិត្តក្នុងការផ្តល់សិទ្ធិក្នុងការជ្រើសរើសដល់ស្ត្រីដើម្បីធ្វើការសម្រេចចិត្តសម្រាប់អនាគតរបស់ពួកគាត់ និងពង្រឹងសហគមន៍។”
ដំណើរទស្សនកិច្ចនេះគឺជាព្រឹត្តិការណ៍ដ៏សំខាន់មួយទៀតក្នុងការពង្រឹងកិច្ចសហការរវាងស្ថានទូតអង់គ្លេស និង អង្គការម៉ារីស្តូបអន្តរជាតិកម្ពុជា ដើម្បីលើកកម្ពស់លទ្ធភាពក្នុងការទទួលបានសេវាថែទាំសុខភាពបន្តពូជ និងធានាថា នឹងគ្មានស្ត្រី ឬក្មេងស្រីណាម្នាក់ត្រូវបានគេទុកចោល ហើយមិនទទួលបានសេវាសុខភាពដែលដែលគាត់ត្រូវការនោះឡើយ។
សម្រាប់ជំនួយក្នុងការប្រឹក្សាដោយឥតគិតថ្លៃ និងការមកទទួលសេវាសុខភាពផ្លូវភេទ - សុខភាពបន្តពូជ៖
✉️ សូមផ្ញើសារហ្វេសប៊ុកមកកាន់ Marie Stopes Cambodia
🕰រៀងរាល់ថ្ងៃ ចាប់ពីម៉ោង ៧ ព្រឹក ដល់ ៥ ល្ងាច
📞 ០១២ ៩៩៩ ០០២ ឬ ០៩៨ ៩៩៩ ១០២
📱 ផ្ញើសារតាមរយៈ LINE, Viber, WhatsApp, WeChat, Telegram ០៩៣ ២៤ ០៨ ២៣
#UKKH #SRHR #mariestopescambodia #ម៉ារីស្តូប
