ក្រចកជើងគោចំនួន ១២០ កេស ដែលមានទម្ងន់សរុប ២៤០០គីឡូក្រាម ដែលមានភាពមិនប្រក្រតី ត្រូវបានមន្ត្រីសាខានាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) ខេត្តស្វាយរៀង និងមន្រ្តីនៃអគ្គនាយកដ្ឋានគយ និងរដ្ឋាករកម្ពុជា សហការគ្នាធ្វើការដកហូត នៅតាមច្រកទ្ធារអន្តរជាតិបាវិត នៅថ្ងៃចន្ទ ទី២៨ ខែកញ្ញា ឆ្នាំ២០២០ បន្ទាប់ពីទទួលបានការស្នើសុំកិច្ចសហការត្រួតពិនិត្យការនាំចូលខ្មងជើងគោពីបរទេសចូលមកកម្ពុជា ដែលនាំចូលតាមច្រកទ្ធារអន្តរជាតិបាវិត ខេត្តស្វាយរៀង នេះបើយោងតាមសេចក្តីរាយការណ៍របស់ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF នាយប់ថ្ងៃច័ន្ទនេះ។

ប្រភពដដែលបានបញ្ជាក់ថា សកម្មភាពនៃការត្រួតពិនិត្យ មានការចូលរួមពីមន្ត្រីជំនាញ ដែលបានយកគំរូក្រចកជើងគោមកពិនិត្យនៅមន្ទីពិសោធន៍ខ្នាតតូចរបស់សាខា ក.ប.ប. ខេត្តស្វាយរៀង ដើម្បីស្វែងរកសារធាតុគីមីហាមឃាត់ ដែលធ្វើអោយប៉ះពាល់ដល់សុខភាពប្រជាពលរដ្ឋ។

ជាលទ្ធផល មន្ត្រីជំនាញ ពុំបានរកឃើញមានសារធាតុគីមី Formalin នៅក្នុងគំរូក្រចកជើងគោទាំងនោះទេ។

ដោយឡែក មន្រ្តីសាខាបានរកឃើញក្រចកជើងគោចំនួន ១២០ កេស មានភាពមិនប្រក្រតីទៅលើឯកសារមួយចំនួនដូចជា៖

-គ្មានឯកសារបញ្ជាក់ពីប្រភពដើម

-គ្មានលិខិតអនុញ្ញាតនាំចូល

-ការដឹកជញ្ជូនគ្មានលក្ខណៈបច្ចេកទេស (ទូបង្កក) ។

មន្រ្តីជំនាញបានធ្វើកំណត់ហេតុដកហូតក្រចកជើងគោទាំងនោះ មកដុតកម្ទេចចោលតាមនីតិវិធីនៅទីលានចាក់សំរាមខេត្តស្វាយរៀង។ សូមបញ្ជាក់ផងដែរថា ក្នុងការដុតកម្ទេចចោលនេះ មានការសហការ ពីអាជ្ញាធរដែនដី និងមន្រ្តីនៃសាខាគយខេត្តស្វាយរៀងផងដែរ៕

អត្ថបទដោយ ហៃ សុចិន្តា

ប្រភព អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF