មានពលរដ្ឋខ្មែរជាច្រើន បាន​ទុកខ្លួនឯង​រហូតមានជំងឺធ្ងន់ ទើប​រត់រកគ្រូពេទ្យ ដោយចំណាយច្រើនលើការព្យាបាល ខណៈបើចំណាយលើ​ការ​​ពិនិត្យសុខភាពមុន មិនសូវចំណាយច្រើន និងខាតពេលវេលាក្តី។ តែនេះ ជាទម្លាប់ទៅហើយដែលពលរដ្ឋខ្មែរ មិនដែលទៅពិនិត្យសុខភាពឱ្យបានមុន ឬជាទៀងទាត់ ដើម្បីបង្ការជំងឺផ្សេងៗឱ្យបានមុន។

 ឧកញ៉ា វេជ្ជបណ្ឌិតគួច ម៉េងលី ធ្លាប់មានប្រសាសន៍ថា «សម្រាប់​ភាគរយនៃចំនួនពលរដ្ឋខ្មែរដែលពិនិត្យសុខភាពជាប្រចាំ សឹងតែគ្មាន បើ​គិតអត្រា​អ្នករៀនសូត្រចេះដឹងវិញ ប្រហែលមានត្រឹម១០ភាគរយ។ តែបើតាមខ្ញុំដឹង ​ទូទៅមិនសូវមានការចាប់អារម្មណ៍ ទោះជាមានលុយកាក់ក៏ដោយ ព្រោះគិតថា សុខភាព​ល្អហើយមិនអីទេ ចាំ​ធ្វើទុក្ខ ចាំទៅព្យាបាលតែម្តង។ តែទិដ្ឋាភាពជាក់ស្តែង នៅពេល​ជំងឺ​ចេញរោគសញ្ញា ឬធ្វើទុក្ខ មានន័យថាយឺតពេលហើយ វាមិនល្អទេ ព្រោះពិបាកព្យាបាល និយាយជារួមជំងឺអ្វីក៏ដោយ ឱ្យតែចេញសញ្ញាហើយគឺលំបាកព្យាបាលណាស់»។

ដូច្នេះ បានជាគេឱ្យ​ទៅពិនិត្យសុខភាព តាមដាន ផ្នែកសំខាន់ៗនៃរាងកាយយើង តាំងពីបំពងក ​ថ្លើម ក្រពះ តើ​ចំណុចណា ត្រូវពិនិត្យប៉ុន្មានដងខ្លះ? ហើយទាំងអស់នេះ យើងដឹងនៅពេលទៅពិនិត្យសុខភាពជាមួយគ្រូពេទ្យ ជួនកាលយើង​​ស្ទាបប៉ះពាល់ចំណុចប្លែកៗនៃរាងកាយខ្លួនឯងមិនដឹងទេ ដោយសារយើងប៉ះពាល់រាល់ថ្ងៃហើយ តែបើ​គ្រូពេទ្យគេអាចដឹង ថាយើង​​​អាចមានរោគសញ្ញាអ្វី ឬ​​ទើបចាប់ផ្តើមកើតនូវជំងឺណាមួយ ងាយស្រួលការពារទុកមុខ។ ហើយបើយើង​មិនពិនិត្យទាន់ពេល អាច​យឺតពេល ព្យាបាលលែងកើតតែម្តង ដោយសារតែដំណាក់កាលជំងឺក្លាយ​ ឆ្លងរីករាលដាល ឬដល់ដំណាក់កាលធ្ងន់ធ្ងរមើលលែងជា។

ត្រង់ចំណុចនេះសំខាន់ណាស់ សម្រាប់ពលរដ្ឋខ្មែរយើង។ តែការពិនិត្យសុខភាពជាប្រចាំ​៦ខែ ឬ១ឆ្នាំម្តងនឹង ផ្នត់គំនិតនឹង មិនត្រឹមតែពលរដ្ឋខ្មែរមិនសូវដឹងទេ សូម្បីតែគ្រូពេទ្យខ្លួនឯងផ្ទាល់ មិនសូវខ្វល់ មិនសូវចាប់អារម្មណ៍ និងយកចិត្តទុកដាក់ប៉ុន្មានទេ ព្រោះគ្រូពេទ្យពីដើមៗ និងជំនាន់ក្រោយៗនេះ អត់មានវប្បធម៌ដាស់តឿន កាន់បញ្ជីត្រឹមត្រូវ ពន្យល់បញ្ហាខាងលើមិនសូវមាននោះទេ។

ត្រង់ចំណុចនេះដែល វេជ្ជបណ្ឌិត មិញ ចាន់ភក្តី ឯកទេសវិជ្ជសាស្ត្រទូទៅបានផ្តល់បទសម្ភាសដល់ក្រុមការងារ Healthy Cambodia ថា ពលរដ្ឋខ្មែរគួរតែពិនិត្យសុខភាពឱ្យបានទៀងទាត់ កុំបណ្តោយឱ្យខ្លួនរហូតមានជំងឺធ្ងន់ធ្ងរ អាចពិបាកព្យាបាល និងចំណាយលុយច្រើនណាស់។ បើយើង​ចាយ​លុយលើការពិនិត្យសុខភាពមុន មិនសូវចំណាយច្រើននោះទេ តែបើទុករហូតមានជំងឺ​ខ្លាំង នោះនឹងចំណាយពេលព្យាបាល​យូរ និងចំណាយលុយច្រើន។

លោកវេជ្ជបណ្ឌិតរូបនេះ លើកទឹកចិត្តពលរដ្ឋខ្មែរយើងឱ្យងាកមក គិតអំពីសុខភាពឱ្យបានល្អ កុំ​ធ្វេសប្រហែសឱ្យសោះ ព្រោះពាក់ព័ន្ធនឹងអាយុជីវិត។ បើសុខភាពយើងល្អ នោះកិច្ចការងារផ្សេងៗ ក៏ដើររលូនតាមនោះដែរ តែបើយើងធ្លាក់ខ្លួនឈឺហើយ អ្វីៗនឹង​ពិបាក​។

ជាការពិតណាស់ ពលរដ្ឋខ្មែរមិនទាន់ទម្លាប់ទៅពិនិត្យសុខភាពឱ្យបានគ្រប់ៗគ្នានោះទេ និយាយភាគរយវិញតិចណាស់។ ដូច្នេះចាប់ពីពេលនេះតទៅ អ្នកដែលបានអានអត្ថបទនេះ គួរគិតពិចារណាឡើងវិញ ហើយឆ្លៀតទៅពិនិត្យសុខភាព និង​មន្ទីរពេទ្យណាមួយដោយការចំណាយមិនច្រើនពេកនោះទេ ឬក៏អាច​តេសាកសួរព័ត៌មានគ្រូពេទ្យជាមុនក៏បាន៕

អត្ថបទដោយ៖ម៉ន វុទ្ធា